ഗുവാഹത്തി: ബി.ജെ.പി ഭരിക്കുന്ന അസമില്‍ വിവാദവും വര്‍ഗീയസ്വഭാവവുമുള്ള ഭൂമി കൈമാറ്റ നടപടിക്രമങ്ങള്‍ക്ക് അംഗീകാരം നല്‍കി മുഖ്യമന്ത്രി ഹിമന്ത ബിശ്വ ശര്‍മ. നിയമം അനുസരിച്ച് വ്യത്യസ്ത മതവിഭാഗങ്ങള്‍ക്കിടയില്‍ നടക്കുന്ന ഭൂമി കൈമാറ്റങ്ങള്‍ക്ക് സംസ്ഥാന സര്‍ക്കാരിന്റെ മുന്‍കൂര്‍ അനുമതി നിര്‍ബന്ധമാക്കി. ഇതുവഴി ഹിന്ദുക്കള്‍ക്ക് മുസ്ലിംകള്‍ക്കോ തിരിച്ചോ ഇനി ഭൂമി വില്‍ക്കാനോ വാങ്ങാനോ കഴിയില്ല. സംസ്ഥാനത്തെ ഭൂമി ഉടമസ്ഥതയുമായി ബന്ധപ്പെട്ട സുതാര്യത ഉറപ്പാക്കാനും മതപരമായ സംഘര്‍ഷങ്ങള്‍ ഒഴിവാക്കാനും ലക്ഷ്യമിട്ടാണ് പുതിയ നടപടിക്രമങ്ങളെന്ന് ഹിമന്ത ബിശ്വ ശര്‍മ്മ അവകാശപ്പെട്ടു. സംസ്ഥാനത്ത് ലാന്‍ഡ് ജിഹാദ് നടക്കുകയാണെന്ന് ഹിമന്തബിശ്വ തുടര്‍ച്ചയായി ആരോപിച്ചുവരുന്നതിനിടെയാണ് പുതിയ നീക്കം.

ഇത്തരം ഭൂമി ഇടപാടുകള്‍ നിരീക്ഷിക്കേണ്ട സാഹചര്യമുണ്ട്. വ്യത്യസ്ത മതക്കാര്‍ തമ്മില്‍ ഭൂമി വില്‍ക്കുന്നതിനും വാങ്ങുന്നതിനുമുള്ള ശുപാര്‍ശ വന്നാല്‍ ഡെപ്യൂട്ടി കമ്മിഷണര്‍ അക്കാര്യം റവന്യു വകുപ്പിനെ അറിയിക്കണം. റവന്യുവകുപ്പിലെ നോഡല്‍ ഓഫിസര്‍ ഇതുസംബന്ധിച്ച അനുമതി ബന്ധപ്പെട്ട പോലിസിലെ സ്‌പെഷല്‍ ബ്രാഞ്ചിന് അയക്കും. ഭൂമി ഇടപാടില്‍ വഞ്ചന, ഭീഷണി, കള്ളപ്പണം തുടങ്ങിയ ഘടകങ്ങള്‍ ഉണ്ടോയെന്നും ദേശസുരക്ഷയ്ക്ക് ഭീഷണിയാണോയെന്നും സ്‌പെഷല്‍ ബ്രാഞ്ച് പരിശോധിക്കും. എല്ലാം ശരിയായെങ്കില്‍ മാത്രമെ അനുമതി ലഭിക്കൂവെന്നാണ് മുഖ്യമന്ത്രി പറഞ്ഞത്.

കേരളം പോലുള്ള സംസ്ഥാനങ്ങളില്‍ നിന്നുള്ള സന്നദ്ധ സംഘടനകള്‍ അസമില്‍ ഭൂമി വാങ്ങുന്നതായും അത് ഭാവിയില്‍ ദേശസുരക്ഷയ്ക്ക് ഭീഷണിയാവുമെന്നും മുഖ്യമന്ത്രി ആരോപിച്ചു. ഫലത്തില്‍ മുസ്ലിംകള്‍ക്കും മുസ്ലിം മാനേജ്‌മെന്റുകള്‍ക്കും ഇനി അസമില്‍ ഭൂമി ആവശ്യമാണെങ്കില്‍ അത് മുസ്ലിംകളില്‍നിന്ന് മാത്രം വാങ്ങേണ്ടിവരും. സംസ്ഥാനത്തിന് പുറത്തുള്ള സന്നദ്ധസംഘടനകള്‍ക്കും അസമില്‍ ഭൂമി വാങ്ങാന്‍ കഴിയില്ല. നിയമം നടപ്പിലാക്കുന്നതിനുള്ള വിശദമായ മാര്‍ഗനിര്‍ദേശങ്ങള്‍ ഉടന്‍ പുറത്തിറക്കുമെന്നും സര്‍ക്കാര്‍ അറിയിച്ചു.

വിദ്യാഭ്യാസ സ്ഥാപനങ്ങള്‍ക്ക് അംഗീകാരം ലഭിക്കണമെങ്കിലും സ്‌പെഷല്‍ ബ്രാഞ്ചിന്റെ അനുമതി വേണ്ടിവരും. നിലവില്‍ കേരളം ആസ്ഥാനമായ മുസ്ലിം സംഘടനകള്‍ക്ക് കീഴില്‍ അസമില്‍ വിദ്യാഭ്യാസസ്ഥാപനങ്ങള്‍ പ്രവത്തിക്കുന്നുണ്ട്.

ALSO READ: ആര്‍എസ്എസ് ശതാബ്ദി ആഘോഷം: ക്ഷണിച്ചെങ്കിലും ഗള്‍ഫ്, അറബ് പ്രതിനിധികള്‍ വിട്ടുനിന്നു; പങ്കെടുത്തത് 50 ലധികം നയതന്ത്രജ്ഞര്‍

The BJP led Assam government has approved a Standard Operating Procedure (SOP) for inter-religious land transfers, introducing clear guidelines to prevent disputes. The move aims to balance development needs with social harmony ensuring transparency in land deals across different faith communities in the state.