തിരുവനന്തപുരം: തിരുവനന്തപുരം ജനറൽ ആശുപത്രിയിൽ ശസ്ത്രക്രിയയ്ക്കിടെ യുവതിയുടെ നെഞ്ചിൽ ഗൈഡ് വയർ കുടുങ്ങിയ സംഭവത്തിൽ ഡോക്ടർക്കെതിരെ കന്റോൺമെന്റ് പൊലിസിൽ പരാതി. ശസ്ത്രക്രിയ നടത്തിയ ഡോ. രാജീവ് കുമാറിനെതിരെയാണ് യുവതിയുടെ കുടുംബം പരാതി നൽകിയത്. സംഭവത്തിൽ ഡോക്ടറുടെ ഭാഗത്ത് ഗുരുതര വീഴ്ചയുണ്ടായെന്ന് പരാതിയിൽ ആരോപിക്കുന്നു. ഇന്ന് പൊലിസ് സുമയ്യയുടെ മൊഴി രേഖപ്പെടുത്തും.

ALSO READ: ശസ്ത്രക്രിയക്കിടെ യുവതിയുടെ നെഞ്ചിൽ ട്യൂബ് കുരുങ്ങിയ സംഭവം; ആരോഗ്യ വകുപ്പിന്റെ വിശദീകരണം, പരാതി ലഭിച്ചില്ലെങ്കിലും അന്വേഷണം നടത്തിയെന്ന് വാദം

2023-ൽ തൊണ്ടയിലെ തൈറോയ്ഡ് സംബന്ധമായ പ്രശ്നത്തിന് ചികിത്സ തേടി സുമയ്യ തിരുവനന്തപുരം ജനറൽ ആശുപത്രിയിൽ പ്രവേശിപ്പിക്കപ്പെട്ടത്. മൾട്ടി ഗോയിറ്റർ രോഗം കണ്ടെത്തിയതിനെ തുടർന്ന് തൈറോയ്ഡ് ഗ്രന്ഥി നീക്കം ചെയ്യുന്ന ശസ്ത്രക്രിയ നടത്തി. ഡോ. രാജീവ് കുമാറാണ് ശസ്ത്രക്രിയ നിർവഹിച്ചത്. ശസ്ത്രക്രിയക്ക് ശേഷം ഞരമ്പ് കിട്ടാതെ വന്നതിനാൽ രക്തവും മരുന്നുകളും നൽകാൻ സെൻട്രൽ ലൈൻ ഇട്ടു. ഈ ലൈനിന്റെ ഗൈഡ് വയർ തിരികെ എടുക്കാതിരുന്നതാണ് പ്രശ്നത്തിന് കാരണമായത്.

ശസ്ത്രക്രിയക്ക് ശേഷം സുമയ്യക്ക് നെഞ്ചിൽ ട്യൂബ് കുരുങ്ങിയത് മൂലം ദുരിതമനുഭവിക്കേണ്ടി വന്നു. തുടർന്ന് ശ്രീ ചിത്ര തിരുനാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജി (എസ്സിടിഐഎംഎസ്ടി) ഉൾപ്പെടെയുള്ള ആശുപത്രികളിൽ ചികിത്സ തേടി. എക്സ്-റേ പരിശോധനയിൽ ട്യൂബ് ധമനികളോട് ഒട്ടിപ്പോയതായി കണ്ടെത്തി. ഇനി ശസ്ത്രക്രിയയിലൂടെ ട്യൂബ് നീക്കം ചെയ്യാൻ സാധിക്കില്ലെന്നാണ് വിദഗ്ധ ഡോക്ടർമാർ പറയുന്നത്.ഇതിനെ തുടർന്ന് ആരോഗ്യ വകുപ്പ് വിശദീകരിച്ചത്, വയർ നെഞ്ചിൽ തുടരുന്നത് ആരോഗ്യ പ്രശ്നങ്ങൾക്ക് കാരണമാകില്ലെന്നാണ്. എന്നാൽ, ഈ വിശദീകരണത്തിനെതിരെ രൂക്ഷ വിമർശനം ഉയർന്നിട്ടുണ്ട്.

സുമയ്യയും കുടുംബവും ഡോക്ടറുടെ ഗുരുതര വീഴ്ചക്ക് നീതി ആവശ്യപ്പെടുന്നു. കൂടാതെ, വിദഗ്ധ ചികിത്സ ലഭ്യമാക്കണമെന്നും അവർ ആവശ്യപ്പെട്ടു.