തിരുവനന്തപുരം: 2025 കേരള ക്രിക്കറ്റ് ലീഗ് കിരീടം സ്വന്തമാക്കി കൊച്ചി ബ്ലൂ ടൈഗേഴ്‌സ്. തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ നടന്ന കലാശപ്പോരാട്ടത്തിൽ നിലവിലെ ചാമ്പ്യന്മാരായ ഏരീസ് കൊല്ലം സെയിലേഴ്‌സിനെ 75 റൺസിന്‌ വീഴ്ത്തിയാണ് കൊച്ചി കിരീടം ചൂടിയത്. മത്സരത്തിൽ ആദ്യം ബാറ്റ് ചെയ്ത കൊച്ചി ബ്ലൂ ടൈഗേഴ്‌സ് നിശ്ചിത ഓവറിൽ എട്ട് വിക്കറ്റ് നഷ്ടത്തിൽ 181 റൺസാണ് നേടിയത്. മറുപടി ബാറ്റിങ്ങിനിറങ്ങിയ കൊല്ലം സെയിലേഴ്സ് 16.3 ഓവറിൽ 106 റൺസിന്‌ പുറത്താവുകയായിരുന്നു. 

സൂപ്പർതാരം സഞ്ജു സാംസൺ ഇല്ലാതെയാണ് കൊച്ചി ഫൈനൽ പോരാട്ടത്തിനിറങ്ങിയത്. ഏഷ്യ കപ്പിന്റെ ഭാഗമായി ഇന്ത്യൻ ടീമിനൊപ്പം നേരത്തെ തന്നെ സഞ്ജു യുഎഇയിലേക്ക് പോയിരുന്നു. കൊച്ചിയുടെ ബൗളിങ്ങിൽ ജെറിൻ പിഎസ് മൂന്ന് വിക്കറ്റുകളും ക്യാപ്റ്റൻ സാലി സാംസൺ, കെഎം ആസിഫ്, മുഹമ്മദ് ആസിഫ് എന്നിവർ രണ്ട് വിക്കറ്റുകളും നേടി മിന്നും പ്രകടനം നടത്തിയപ്പോൾ കൊല്ലം തകരുകയായിരുന്നു. 24 പന്തിൽ പുറത്താവാതെ 23 റൺസ് നേടിയ വിജയ് വിശ്വനാഥ് ആണ് കൊല്ലം നിരയിൽ കാര്യമായി പിടിച്ചു നിന്നത്. ബാക്കിയുള്ള താരങ്ങൾക്കൊന്നും തിളങ്ങാൻ സാധിച്ചില്ല.

നേരത്തെ ആദ്യം ബാറ്റ് ചെയ്ത കൊച്ചി ബ്ലൂ ടൈഗേഴ്‌സിനായി വിനൂപ് മനോഹരൻ മിന്നും പ്രകടനമാണ് നടത്തിയത്. 30 പന്തിൽ 70 റൺസാണ് വിനൂപ് അടിച്ചെടുത്തത്. ഒമ്പത് ഫോറുകളും നാല് സിക്സുമാണ് താരം നേടിയത്. അവസാന ഓവറുകളിൽ തകർത്തടിച്ച അൽഫി ഫ്രാൻസിസ് ജോണും കൊച്ചിയെ മികച്ച സ്കോറിലേക്ക് നയിച്ചു. 25 പന്തിൽ പുറത്താവാതെ 47 റൺസാണ് താരം നേടിയത്. അഞ്ചു ഫോറുകളും മൂന്ന് സിക്സുമാണ് അൽഫി ഫ്രാൻസിസ് ജോൺ നേടിയത്. 

കൊല്ലം സെയിലേഴ്സ് ബൗളിങ്ങിൽ പവൻ രാജ്, ഷറഫുദീൻ എന്നിവർ രണ്ട് വിക്കറ്റുകൾ വീതം നേടി തിളങ്ങി. അജയ്ഘോഷ് എൻഎസ്, എൻ സജീവൻ അഖിൽ, അമൽ എജി, വിജയ് വിശ്വനാഥ് എന്നിവർ ഓരോ വിക്കറ്റും നേടി.

Kochi Blue Tigers won the 2025 Kerala Cricket League title. Kochi won the title by defeating defending champions Aries Kollam Sailors by 75 runs in the final match held at the Greenfield Stadium in Thiruvananthapuram.