ദുബൈ: രാജ്യത്തെ സ്‌കൂളുകളില്‍ പഠിക്കുന്ന വിദ്യാര്‍ത്ഥികള്‍ക്ക് മരുന്ന് കഴിക്കാന്‍ മുന്‍കൂര്‍ അനുമതി വാങ്ങണമെന്ന് സര്‍ക്കാര്‍. രക്തസമ്മര്‍ദം, പ്രമേഹം, ആസ്ത്മ തുടങ്ങിയ രോഗങ്ങളുള്ള വിദ്യാര്‍ത്ഥികള്‍ക്ക് മരുന്ന് നല്‍കാനാണ് സ്വകാര്യ സ്‌കൂളുകള്‍ പുതിയ മാര്‍ഗനിര്‍ദേശം പുറപ്പെടുവിച്ചിരിക്കുന്നത്. വിദ്യാര്‍ഥികള്‍ കഴിക്കുന്ന മരുന്നുകളെ സംബന്ധിച്ചും ഔദ്യോഗിക മെഡിക്കല്‍ റിപ്പോര്‍ട്ടും നല്‍കണമെന്ന് സ്‌കൂള്‍ അധികൃതര്‍ രക്ഷിതാക്കളോട് ആവശ്യപ്പെട്ടു. വിദ്യാര്‍ഥികളുടെ ആരോഗ്യസുരക്ഷ ഉറപ്പാക്കാനാണ് നടപടിയെന്ന് അധികൃതര്‍ അറിയിച്ചു. 

ALSO READ: ദുബൈയിലെത്തിയ ഇന്ത്യന്‍ യൂട്യൂബറുടെ ഐഫോണ്‍ നഷ്ടമായി, അടുത്ത വിമാനത്തില്‍ ഫ്രീയായി നാട്ടിലെത്തിച്ചു; ദുബൈ പൊലിസിന്റെ പ്രകടനമികവിന് കൈയടി 

വിദ്യാര്‍ഥിക്ക് വിട്ടുമാറാത്ത രോഗമുണ്ടെങ്കില്‍ മാതാപിതാക്കള്‍ ഇക്കാര്യം സ്‌കൂള്‍ അഡ്മിനിസ്‌ട്രേഷനെയും നഴ്‌സിനെയും അറിയിക്കണം. വിദ്യാര്‍ഥിയുടെ ആരോഗ്യവിവരങ്ങള്‍ സ്‌കൂള്‍ അധികൃതരുമായി പങ്കിടുന്നത് വിദ്യാര്‍ഥികളുടെ ആരോഗ്യം സസൂക്ഷ്മം നിരീക്ഷിക്കാന്‍ സഹായിക്കുമെന്ന് അധികൃതര്‍ ഫറഞ്ഞു. വിദ്യാര്‍ഥികളുടെ സംരക്ഷണം ഉറപ്പാക്കാന്‍ രക്ഷിതാക്കള്‍ തങ്ങളോട് പൂര്‍ണമായും സഹകരിക്കണമെന്ന് അധികൃതര്‍ ആവശ്യപ്പെട്ടു.

ഇന്‍സുലിന്‍, ആന്റിബോയട്ടിക് തുടങ്ങിയ മരുന്നുകള്‍ സ്‌കൂള്‍ സമയത്ത് വിദ്യാര്‍ഥികള്‍ക്ക് നല്‍കേണ്ടതുണ്ടെങ്കില്‍ ഇക്കാര്യം സ്‌കൂള്‍ അധികൃതരെ അറിയിക്കണം. വിദ്യാര്‍ഥിയുടെ പേര്, മരുന്ന്, സമയം, മരുന്നിന്റെ അളവ് എന്നിവ വ്യക്തമാക്കുന്ന ഡോക്ടറുടെ കുറിപ്പടിയുടെ കൂടെയാണ് മരുന്നുകള്‍ സ്‌കൂള്‍ ക്ലിനിക്കില്‍ നല്‍കേണ്ടത്.

ക്ലിനിക്കുകളില്‍ മരുന്ന് നല്‍കുമ്പോള്‍ പാലിക്കേണ്ട നിയമങ്ങളെക്കുറിച്ചും സ്‌കൂളുകള്‍ വിശദീകരിച്ചു. വ്യവസ്ഥകള്‍ പാലിച്ചില്ലെങ്കില്‍ വിദ്യാര്‍ഥികള്‍ക്ക് മരുന്ന് നല്‍കില്ല.

ഒറിജിനല്‍ പാക്കേജിംഗ്

കൃത്യമായി ലേബല്‍ ചെയ്ത മരുന്നുകളായിരിക്കണം നഴ്‌സിനെ ഏല്‍പ്പിക്കേണ്ടത്. മരുന്നുകള്‍ ക്ലാസ് മുറികളിലേക്ക് കൊണ്ടുവരാന്‍ വിദ്യാര്‍ഥികളെ അനുവദിക്കില്ല.

ഡോക്ടറുടെ കുറിപ്പടി

ഡോക്ടറുടെ കുറിപ്പടി ഇല്ലാതെ വിദ്യാര്‍ഥികള്‍ക്ക് നല്‍കില്ലെന്ന് സ്‌കൂളുകള്‍ പറയുന്നു. കുറിപ്പടിയില്‍ മരുന്ന്, മരുന്നിന്റെ അളവ്, സമയം എന്നീ കാര്യങ്ങള്‍ വ്യക്തമാക്കിയിരിക്കണം. 

നേരിട്ട് എത്തിക്കണം

രക്ഷിതാക്കള്‍ വിദ്യാര്‍ഥികളുടെ മരുന്നുകള്‍ ക്ലിനിക്കിലേക്ക് നേരിട്ട് എത്തിക്കണം. ഇവിടെ വെച്ച് മരുന്ന് നല്‍കേണ്ട സമയത്ത് നഴ്‌സ് കുട്ടിക്ക് മരുന്ന് നല്‍കും.

സമ്മത പത്രത്തില്‍ ഒപ്പിടണം

അധ്യയന വര്‍ഷത്തിന്റെ തുടക്കത്തില്‍ അധികൃതര്‍ വിതരണം ചെയ്യുന്ന സമ്മത പത്രത്തില്‍ രക്ഷിതാക്കള്‍ നിര്‍ബന്ധമായും ഒപ്പിടണം.

A new law in the UAE mandates that students must obtain prior permission before taking medication at school. The regulation aims to ensure student safety and proper management of health conditions during school hours.