തിരുവനന്തപുരം: പത്ത് ദിവസത്തെ ഓണം അവധിക്ക് ശേഷം സംസ്ഥാനത്തെ സ്‌കൂളുകള്‍ ഇന്ന് തുറക്കും. ഈ ആഴ്ച തന്നെ ഓണപ്പരീക്ഷയുടെ ഫലം പ്രഖ്യാപിക്കും. സര്‍ക്കാര്‍, എയ്ഡഡ് സ്‌കൂളുകളില്‍ ഓണപ്പരീക്ഷയിലെ എഴുത്തു പരീക്ഷയില്‍ മിനിമം മാര്‍ക്ക് സംവിധാനം ഇത്തവണമുതല്‍ നടപ്പാക്കുന്നുണ്ട്. ഇതുപ്രകാരം വിദ്യാർഥികള്‍ ഓരോവിഷയത്തിനും മിനിമം മാര്‍ക്ക് നേടേണ്ടതുണ്ട്. 

കഴിഞ്ഞവര്‍ഷം വര്‍ഷാന്ത്യ പരീക്ഷയില്‍ മിനിമം മാര്‍ക്ക് സംവിധാനവും പഠനപിന്തുണയും നല്‍കിയിരുന്നു. ഇത്തവണ അത് ഓണപ്പരീക്ഷ മുതല്‍ നടപ്പാക്കുകയാണ്. 
അഞ്ച് മുതല്‍ ഒമ്പത് വരെ ക്ലാസുകളില്‍ ഓരോ വിഷയത്തിനും 30 ശതമാനം മാര്‍ക്ക് ലഭിക്കാത്തവര്‍ക്ക് ഈ മാസം രണ്ടാഴ്ച സ്‌പെഷല്‍ ക്ലാസ് നടത്തും. 

ഇനി ക്രിസ്മസ് അവധിക്കായി സ്‌കൂളുകള്‍ അടയ്ക്കുന്നത് ഡിസംബര്‍ 19നാണ്. അർധവാര്‍ഷിക പരീക്ഷകള്‍ ഡിസംബര്‍ 11മുതല്‍ 18വരെയാണ്  നടക്കുക. ക്രിസ്മസ് അവധി കഴിഞ്ഞ് ഡിസംബര്‍ 29ന് സ്‌കൂളുകള്‍ തുറക്കും. പിന്നീട് മധ്യവേനല്‍ അവധിക്കായി മാര്‍ച്ച് 31ന് സ്‌കൂളുകള്‍ അടയ്ക്കും.