കോഴിക്കോട്: അമീബിക് മസ്തിഷ്‌ക ജ്വരം ബാധിച്ച് സംസ്ഥാനത്ത് ഒരാള്‍ കൂടി മരിച്ചു. വണ്ടൂര്‍ സ്വദേശി ശോഭനയാണ് മരിച്ചത്. കോഴിക്കോട് മെഡിക്കല്‍ കോളജില്‍ ചികിത്സയിലായിരുന്നു. ഈ മാസം നാലിനാണ് ശോഭനക്ക് അമീബിക് മസ്തിഷ്‌ക ജ്വരം സ്ഥിരീകരിച്ചത്. 

അമീബിക് മസ്തിഷ്‌ക ജ്വരം ബാധിച്ച് അടുത്തിടെയായി സംസ്ഥാനത്ത് ഒന്നിലേറെ മരണങ്ങള്‍ റിപ്പോര്‍ട്ട് ചെയ്തിരുന്നു. ശനിയാഴ്ച രാവിലെ അമീബിക് മസ്തിഷ്‌ക ജ്വരം ബാധിച്ച് ചികിത്സയിലായിരുന്ന വയനാട് ബത്തേരി സ്വദേശിയായ രതീഷ് മരണപ്പെട്ടു.  കോഴിക്കോട് മെഡിക്കല്‍ കോളേജില്‍ 10 പേര്‍ ഈ രോഗം ബാധിച്ച് ചികിത്സയിലുണ്ടെന്നാണ് സൂചന. ഇതില്‍ രണ്ട് പേരുടെ ആരോഗ്യനില അതീവ ഗുരുതരമാണെന്ന് റിപ്പോര്‍ട്ടുണ്ടായിരുന്നു.

ALSO READ: പേടിക്കണം, അമീബിക് മസ്തിഷ്‌ക ജ്വരത്തെ

 മലപ്പുറം സ്വദേശിയായ 10 വയസ്സുള്ള ഒരു കുട്ടിക്കും അമീബിക് മസ്തിഷ്‌ക ജ്വരം സ്ഥിരീകരിച്ചിരുന്നു. ഈ കുട്ടിയും കോഴിക്കോട് മെഡിക്കല്‍ കോളേജില്‍ ചികിത്സയില്‍ തുടരുകയാണ്. ഗുരുതരാവസ്ഥയില്‍ കഴിയുന്ന രോഗികള്‍ക്ക് മറ്റ് ആരോഗ്യപ്രശ്‌നങ്ങളും ഉള്ളതിനാല്‍, അവരുടെ നിലയെക്കുറിച്ച് ഡോക്ടര്‍മാര്‍ ആശങ്ക പ്രകടിപ്പിച്ചിട്ടുണ്ട്.

അമീബിക് മസ്തിഷ്‌ക ജ്വര കേസുകള്‍ വര്‍ധിക്കുന്ന സാഹചര്യത്തില്‍, പ്രതിരോധ പ്രവര്‍ത്തനങ്ങള്‍ ശക്തിപ്പെടുത്താന്‍ ആരോഗ്യവകുപ്പ് തീരുമാനിച്ചിട്ടുണ്ട്. തദ്ദേശ സ്ഥാപനങ്ങള്‍ കേന്ദ്രീകരിച്ച് രോഗപ്രതിരോധ നടപടികള്‍ ഊര്‍ജിതമാക്കാനാണ് നിര്‍ദേശം. രോഗം വ്യാപിക്കുന്നത് തടയുന്നതിനായി ജനങ്ങള്‍ക്കിടയില്‍ ബോധവത്കരണവും ആരോഗ്യവകുപ്പ് നടത്തിവരുകയാണ്.
 

Kerala reports another fatal case of amoebic meningoencephalitis (brain fever). Shobhana, a resident of Vandoor, succumbs to the rare infection. Health authorities on alert.