കോഴിക്കോട്: അമീബിക് മസ്തിഷ്ക ജ്വരം പിടിപെട്ട് കോഴിക്കോട് മെഡിക്കൽ കോളേജിൽ ചികിത്സയിൽ കഴിയുന്ന രണ്ട് പേരുടെ ആരോഗ്യനില അതീവ ഗുരുതരമായി തുടരുന്നു. കാസർകോഡ്, മലപ്പുറം ജില്ലകളിലെ സ്വദേശികളാണ് വെന്റിലേറ്ററിൽ തുടരുന്നത്. ഇവർ ഉൾപ്പെടെ മെഡിക്കൽ കോളേജിൽ അമീബിക് മസ്തിഷ്ക ജ്വരം ബാധിച്ച് ഒമ്പത് ആളുകളാണ് നിലവിൽ ചികിത്സയിൽ ഉള്ളത്.

രോഗം സ്ഥിരീകരിച്ച താമരശ്ശേരി സ്വദേശിയായ ഏഴ് വയസുകാരന്റെ ആരോഗ്യനില മെച്ചപ്പെട്ടതിന് പിന്നാലെ ഇന്നലെ ഡിസ്ചാർജ് ചെയ്തിരുന്നു. ഈ കുട്ടിയുടെ സഹോദരി ഉൾപ്പെടെയുള്ള അഞ്ചു ആളുകളാണ് കോഴിക്കോട് മെഡിക്കൽ കോളേജിൽ ഒരു മാസത്തിനിടെ മസ്തിഷ്ക ജ്വരം ബാധിച്ച് മരണപ്പെട്ടത്. രോഗം നിയന്ത്രിക്കാനായുഉള്ള പ്രതിരോധ പ്രവർത്തനങ്ങൾ ഊർജിതമാകുമ്പോഴും ഓരോ ദിവസവും പുതിയ കേസുകൾ റിപ്പോർട്ട് ചെയ്യുന്നതാണ് ആശങ്ക പടർത്തുന്നത്.