കോഴിക്കോട്: കുന്നംകുളം പൊലിസ് സ്റ്റേഷനിലെ ദൃശ്യങ്ങൾ പുറത്തുവന്നതിന് പിന്നാലെ  കസ്റ്റഡി മർദനവുമായി ബന്ധപ്പെട്ട പരാതികൾ പുനഃപരിശോധിക്കുന്നു. യൂത്ത് കോൺഗ്രസ് നേതാവിനെ പൊലിസ് മർദിക്കുന്ന ദൃശ്യങ്ങൾ പുറത്തായതോടെ സമാനമായ നിരവധി പരാതികളും ആരോപണങ്ങളും സംസ്ഥാനത്തുടനീളം ഉയർന്നിരുന്നു. 

തുടർച്ചയായുള്ള ഇടത് ഭരണത്തിൽ പൊലിസ് മർദിച്ചുവെന്നാരോപിച്ചുള്ള പരാതികൾ സംബന്ധിച്ചാണ് പുനഃപരിശോധന നടത്തുന്നത്. ഇന്റലിജൻസ് എ.ഡി.ജി.പി ഇത് സംബന്ധിച്ചുള്ള നിർദേശം രഹസ്യാന്വേഷണ വിഭാഗത്തിന് കൈമാറി. 
സംസ്ഥാനത്തുടനീളം പൊലിസുകാർ മർദിച്ചെന്ന പരാതികൾ എത്രയുണ്ടെന്നതുൾപ്പെടെയുള്ള വിശദമായ വിവരങ്ങളാണ് ശേഖരിക്കുന്നത്. പരാതി നൽകിയ വ്യക്തികളുടെ വിവരങ്ങൾ, സ്വീകരിച്ച നടപടികൾ, ആരോപണവിധേയരായ ഉദ്യോഗസ്ഥർ തുടങ്ങിയ വിവരങ്ങളാണ് ശേഖരിക്കുന്നത്.  

പൊലിസ് സ്‌റ്റേഷനുകളിൽ ക്രൂരമർദനം നടന്നിട്ടും പല പരാതികളിലും നടപടി സ്വീകരിക്കാത്തത് കഴിഞ്ഞ ദിവസങ്ങളിൽ പുറത്തുവന്നിരുന്നു. മുഖ്യമന്ത്രിക്കുൾപ്പെടെ പരാതികൾ നൽകിയിട്ടും പലതിലും നടപടി ഉണ്ടായിട്ടില്ലെന്നത് വിവാദമാവുകയും ചെയ്തു. ആരോപണ വിധേയരായ ഉദ്യോഗസ്ഥർക്ക് പ്രമോഷൻ  ലഭിച്ച സംഭവങ്ങളും പുറത്തുവന്നിരുന്നു. 

കുന്നംകുളം സ്‌റ്റേഷനിൽ യൂത്ത്‌കോൺഗ്രസ് നേതാവിനെ മർദിച്ച പൊലിസുകാരെ പിരിച്ചുവിടും വരെ പ്രതിഷേധം സംഘടിപ്പിക്കുമെന്ന് വ്യക്തമാക്കി കോൺഗ്രസ് രംഗത്തെത്തിയതോടെ ആഭ്യന്തരവകുപ്പും പ്രതിക്കൂട്ടിലായി. വരാനിരിക്കുന്ന നിയമസഭാ സമ്മേളനത്തിലും പ്രതിപക്ഷം വിഷയം ആളിക്കത്തിക്കാനുള്ള സാഹചര്യം കണക്കിലെടുത്താണ് പൊലിസ് സ്‌റ്റേഷനിൽ നിന്ന് നേരിട്ട മർദനങ്ങളും ദുരനുഭവങ്ങളും സംബന്ധിച്ചുള്ള പരാതികൾ പുനഃപരിശോധിക്കുന്നത്. 

ജില്ലാ പൊലിസ് മേധാവിമാർ, സംസ്ഥാന പൊലിസ് മേധാവി, മനുഷ്യാവകാശ കമ്മിഷൻ തുടങ്ങിയവർക്ക് നൽകിയ പരാതികൾ സംബന്ധിച്ചുള്ള വിവരങ്ങളും ശേഖരിക്കും. ജനമൈത്രി  സ്‌റ്റേഷനിലെ 'ഇടിയൻ പൊലിസി' നെതിരേ സ്വീകരിച്ച നടപടികൾ വിശദീകരിച്ച് ഇപ്പോഴുള്ള വിവാദത്തിന് തടയിടുകയെന്നതാണ് ഇതുവഴി ലക്ഷ്യം വയ്ക്കുന്നതെന്നാണ് വിവരം. 

പൊലിസ് സേനാംഗങ്ങൾ പൊതുജനങ്ങളുമായി ഇടപെടുമ്പോൾ പാലിക്കേണ്ട മര്യാദയെ കുറിച്ച് 1965 മുതൽ മാറി വന്ന സംസ്ഥാന പൊലിസ് മേധാവിമാർ 10 ലേറെ തവണ മാർഗനിർദേശങ്ങൾ പുറപ്പെടുവിച്ചിരുന്നു. മുഖ്യമന്ത്രി പലപ്പോഴും ഇത്തരം സംഭവങ്ങളുണ്ടാകരുതെന്ന മുന്നറിയിപ്പ് നൽകിയിട്ടും 'മർദന മുറ' സ്‌റ്റേഷനിൽ നിന്ന് പൂർണമായും ഒഴിവാക്കാൻ സാധിച്ചിട്ടില്ല.