സമീപകാലങ്ങളിൽ റെഡ് ബോൾ ക്രിക്കറ്റിൽ സ്ഥിരതയാർന്ന പ്രകടനം നടത്തുന്ന താരമാണ് സർഫറാസ് ഖാൻ. ആഭ്യന്തര ക്രിക്കറ്റിൽ മികച്ച പ്രകടനങ്ങൾ കാഴ്ചവെച്ചിട്ടും അടുത്തിടെ അവസാനിച്ച ഇംഗ്ലണ്ടിനെതിരെയുള്ള അഞ്ചു ടെസ്റ്റ് മത്സരങ്ങളുടെ പരമ്പരയിൽ സർഫറാസ് ഖാന് അവസരം ലഭിച്ചിരുന്നില്ല. താരത്തെ ഇന്ത്യൻ ടീമിലെടുക്കാത്തതിനെതിരെ ധാരാളം വിമർശങ്ങളും നിലനിന്നിരുന്നു.

ഇപ്പോൾ ഇന്ത്യൻ ടീമിൽ സർഫറാസ് ഖാന് അവസരം ലഭിക്കാത്തതിൽ നിരാശ പ്രകടിപ്പിച്ചിരിക്കുകയാണ് വെസ്റ്റ് ഇൻഡീസ് ഇതിഹാസം ക്രിസ് ഗെയ്ൽ. ശുഭങ്കർ മിശ്രയുടെ യൂട്യൂബ് ചാനലിൽ നൽകിയ അഭിമുഖത്തിലാണ് ഗെയ്ൽ സർഫറാസ് ഖാനെക്കുറിച്ച് സംസാരിച്ചത്. 

''ടെസ്റ്റ് ടീമിൽ ഇടം നേടാൻ അദ്ദേഹം അർഹനാണെന്ന് ഞാൻ വിശ്വസിക്കുന്നു. ന്യൂസിലൻഡിനെതിരെയുള്ള ടെസ്റ്റിൽ ഇന്ത്യയിൽ സെഞ്ച്വറി പോലും അദ്ദേഹം നേടിയിരുന്നു. എന്നിട്ടും അദ്ദേഹത്തെ ടീമിൽ ഉൾപ്പെടുത്തിയില്ല. അദ്ദേഹം ശരീരഭാരം കുറച്ച പോസ്റ്റ് ഞാൻ അടുത്തിടെ കണ്ടു. എന്നാൽ ഇതിനു മുമ്പും അദ്ദേഹത്തിന്റെ ഫിറ്റ്നസിൽ ഒരു തകരാറും ഉണ്ടായിരുന്നില്ല. അദ്ദേഹം നന്നായി കളിക്കുന്നുണ്ട്. ഇപ്പോൾ റൺസ് നേടുന്നു. ഫസ്റ്റ് ക്ലാസ് ക്രിക്കറ്റിൽ അദ്ദേഹം ട്രിപ്പിൾ സെഞ്ച്വറി നേടി. ഫിറ്റ്നസ് അദ്ദേഹത്തെ ഒഴിവാക്കാനുള്ള ഒരു കാരണമാവരുത്. ഇന്ത്യക്ക് വളരെയധികം കഴിവുള്ള താരങ്ങളുണ്ട്. അദ്ദേഹം തീർച്ചയായും ഇന്ത്യൻ ടീമിൽ അവസരം അർഹിക്കുന്നുണ്ട്'' ഗെയ്ൽ പറഞ്ഞു. 

കഴിഞ്ഞ വർഷം ന്യൂസിലാന്റിനെതിരായ ടെസ്റ്റ് പരമ്പരയിൽ 150 റൺസ് നേടിയ സർഫ്രാസിന്റെ പ്രകടനം ഏറെ ശ്രദ്ധിക്കപ്പെട്ടിരുന്നു. എന്നാൽ അതിന് ശേഷം ബോർഡർ ഗവാസ്‌കർ ട്രോഫിയിൽ ഓസ്‌ട്രേലിയക്കെതിരെ ഒരു മത്സരത്തിൽ പോലും താരം കളിച്ചിരുന്നില്ല.

കഴിഞ്ഞ രണ്ട് മാസങ്ങൾക്കുള്ളിൽ 17 കിലോഗ്രാം ഭാരം കുറച്ചുകൊണ്ട് സർഫറാസ് ഖാൻ ശ്രദ്ധ നേടിയിരുന്നു. താരത്തിന്റെ ഭാരം കുറച്ചുകൊണ്ടുള്ള ചിത്രങ്ങൾ സോഷ്യൽ മീഡിയയിൽ വൈറൽ ആവുകയും ചെയ്തിരുന്നു. ഏഷ്യ കപ്പ് അവസാനിച്ചാൽ വെസ്റ്റ് ഇൻഡീസിനെതിരെയുള്ള പരമ്പരയാണ് ഇന്ത്യയുടെ മുന്നിലുള്ളത്. നിലവിലെ പ്രകടനം കണക്കിലെടുത്തുകൊണ്ട് താരത്തിന് ഇന്ത്യൻ ടെസ്റ്റ് ടീമിൽ അവസരം ലഭിക്കുമോയെന്ന് കണ്ടുതന്നെ അറിയണം. 

West Indies legend Chris Gayle has expressed his disappointment over Sarfaraz Khan not getting a chance in the Indian team