ഡല്‍ഹി: ഇന്ത്യയുടെ പതിനഞ്ചാം ഉപരാഷ്ട്രപതിയായി സിപി രാധാകൃഷ്ണന്‍ ഇന്ന് സത്യപ്രതിജ്ഞ ചെയ്തു.  രാവിലെ 10 മണിക്ക് രാഷ്ട്രപതി ഭവനില്‍ നടന്ന സത്യപ്രതിജ്ഞ ചടങ്ങില്‍ രാഷ്ട്രപതി ദ്രൗപതി മുര്‍മു സത്യവാചകം ചൊല്ലി കൊടുത്തു. പ്രധാനമന്ത്രിയും കേന്ദ്രമന്ത്രിമാരും ബി.ജെ.പി നേതാക്കളും ഉള്‍പ്പെടെ ചടങ്ങില്‍ പങ്കെടുത്തിരുന്നു.

മഹാരാഷ്ട്ര ഗവര്‍ണര്‍ ആയിരിക്കുന്ന സമയത്താണ് രാധാകൃഷ്ണന്‍ ഉപരാഷ്ട്രപതി പദവിയിലേക്ക് തെരഞ്ഞെടുക്കപ്പെടുന്നത്. ഉപരാഷ്ട്രപതി തെരഞ്ഞെടുപ്പില്‍ 152 വോട്ടുകളുടെ ഭൂരിപക്ഷത്തിലാണ് രാധാകൃഷ്ണന്‍ വിജയിച്ചത്. പ്രതിപക്ഷ മുന്നണിയുടെ സ്ഥാനാര്‍ത്ഥി ജസ്റ്റിസ് ഡി സുദര്‍ശന്‍ റെഡ്ഢിയെ മറികടന്നുകൊണ്ടാണ് രാധാകൃഷ്ണന്‍ വിജയിച്ചത്. രഹസ്യ ബാലറ്റ് അടിസ്ഥാനത്തിലായിരുന്നു വോട്ടെടുപ്പ്. 

CP Radhakrishnan takes oath as 15th Vice President of India

Read @ANI Story | https://t.co/V4ALZP6zz5#CPRadhakrishnan #VicePresident #oath pic.twitter.com/KcDQCN9avH

— ANI Digital (@ani_digital) September 12, 2025

ആരോഗ്യകാരണങ്ങള്‍ ചൂണ്ടിക്കാട്ടി ജഗദീപ് ധന്‍കര്‍ രാജിവച്ചതിന് പിന്നാലെയാണ് പുതിയ ഉപരാഷ്ട്രപതിക്കായുള്ള തെരഞ്ഞെടുപ്പ് നടന്നത്. കാലാവധി പൂര്‍ത്തിയാക്കാന്‍ രണ്ടുവര്‍ഷം ബാക്കിനില്‍ക്കെയാണ് ജഗദീപ് ധന്‍ഘഡ് രാജിവച്ചത്. 

തമിഴ്‌നാട് തിരുപ്പൂര്‍ സ്വദേശിയാണ് സിപി രാധാകൃഷ്ണന്‍. തമിഴ്നാട് ബി.ജെ.പി മുന്‍ അധ്യക്ഷനായിരുന്ന രാധാകൃഷ്ണന്‍ ആര്‍.എസ്.എസിലൂടെയാണ് സംഘടനാ പ്രവര്‍ത്തനം ആരംഭിച്ചത്. ജനസംഘത്തിന്റെ നേതാവായിരുന്നു. വിദ്യാര്‍ഥി കാലഘട്ടം മുതലുള്ള അദ്ദേഹത്തിന്റെ ആര്‍.എസ്.എസ് ബന്ധമാണ് ഉപരാഷ്ട്രപതി സ്ഥാനത്തേക്ക് വരെ തുണയായതും. കോയമ്പത്തൂരില്‍ നിന്ന് ലോക്സഭയിലേക്ക് തെരഞ്ഞെടുക്കപ്പെട്ടു. 1998ല്‍ കോയമ്പത്തൂര്‍ മണ്ഡലത്തെ ഡിഎംകെയില്‍ നിന്ന് പിടിച്ചെടുത്താണ് രാധാകൃഷ്ണന്‍ തമിഴ്‌നാട്ടില്‍ ബിജെപിക്ക് മേല്‍വിലാസം ഉണ്ടാക്കിയത്. 

ALSO READ: യു.എന്‍ രക്ഷാസമിതിയില്‍ ഖത്തറിന് പൂര്‍ണ പിന്തുണ; ഇസ്‌റാഈലിന്റെ പേരെടുത്ത് പറയാതെ ആക്രമണത്തെ അപലപിച്ച് അംഗരാജ്യങ്ങള്‍  

2023ല്‍ ജാര്‍ഖണ്ഡ് ഗവര്‍ണറായി നിയോഗിക്കപ്പെട്ട രാധാകൃഷ്ണന്‍ പിന്നീട് മഹാരാഷ്ട്ര ഗവര്‍ണര്‍, , പുതുച്ചേരി ലെഫ്റ്റനന്റ് ഗവര്‍ണറായും സേവനമനുഷ്ഠിച്ചിട്ടുണ്ട്.