പാലക്കാട്: മണ്ണാര്‍ക്കാട് വാഹനപരിശോധനക്കിടെ ഓട്ടോറിക്ഷയില്‍ നിന്ന് വന്‍ സ്‌ഫോടക ശേഖരം പിടികൂടി. തച്ചമ്പാറ സ്വദേശിയായ സന്ദീപിന്റെ ഓട്ടോറിക്ഷയിലാണ് സ്‌ഫോടക വസ്തുക്കള്‍ കണ്ടെടുത്തത്. 405 ജലാറ്റിന്‍ സ്റ്റിക്കുകള്‍, 399 ഡിറ്റനേറ്ററുകള്‍ എന്നിവയാണ് പിടികൂടിയത്. 

ആനമൂളി ഫോറസ്റ്റ് ചെക്ക് പോസ്റ്റിന് സമീപം പൊലിസ് നടത്തിയ വാഹന പരിശോധനയിലാണ് ഓട്ടോറിക്ഷയില്‍ കൊണ്ടുപോവുകയായിരുന്ന സ്‌ഫോടക വസ്തുക്കള്‍ പിടികൂടിയത്. മണ്ണാര്‍ക്കാട് നിന്ന് അട്ടപ്പാടിയിലെ പുതൂരിലേക്കാണ് സ്‌ഫോടക വസ്തുക്കള്‍ കടത്താന്‍ ശ്രമിച്ചതെന്ന് പ്രതി പൊലിസിനോട് പറഞ്ഞു. സംഭവത്തില്‍ അന്വേഷണം തുടരുകയാണ്. 

ALSO READ: സംസ്ഥാനത്ത് ലേണേഴ്സ് ടെസ്റ്റിൽ മാറ്റം; ചോദ്യങ്ങളുടെ എണ്ണവും, പാസ് മാർക്കും വർധിപ്പിച്ചു; മാറ്റം ഒക്ടോബർ ഒന്ന് മുതൽ പ്രാബല്യത്തിൽ 

നേരത്തെയും പാലക്കാട് ജില്ലയുടെ വിവിധ ഭാഗങ്ങളില്‍ നിന്ന് സ്‌ഫോടക വസ്തുക്കള്‍ കണ്ടെത്തിയിരുന്നു. കഴിഞ്ഞ മാസം വടക്കന്തറ വ്യാസ വിദ്യാപീഠം പ്രീ പ്രൈമറി സ്‌കൂളിന് സമീപം സ്‌ഫോടക വസ്തുക്കള്‍ കണ്ടെത്തിയിരുന്നു. ഇതില്‍ ചിലത് പൊട്ടിത്തെറിച്ച് പത്ത് വയസുള്ള കുട്ടിക്ക് പരിക്ക് പറ്റിയിരുന്നു. ആര്‍എസ്എസ് നിയന്ത്രണത്തിലുള്ള സ്‌കൂളിലാണ് സ്‌ഫോടനമുണ്ടായത്. സംഭവ സ്ഥലത്ത് നിന്ന് 4 സ്‌ഫോടക വസ്തുക്കളാണ് കണ്ടെത്തിയത്. 

സമാനമായി കല്ലേക്കാട് വാടക വീട്ടില്‍ നിന്ന് സ്‌ഫോടക വസ്തുക്കള്‍ കണ്ടെത്തിയിരുന്നു. സംഭവത്തില്‍ ബിജെപി പ്രവര്‍ത്തകന്‍ സുരേഷ്, പൂളക്കാട് സ്വദേശി ഫാസില്‍, കല്ലേക്കാട് സ്വദേശി നൗഷാദ് എന്നിവരെ പൊലിസ് റിമാന്റ് ചെയ്തു. സുരേഷിന് വടക്കന്തറയിലെ വ്യാസ വിദ്യാപീഠം സ്‌കൂളിലെ സ്‌ഫോടനത്തിലും പങ്കുണ്ടെന്നാണ് വിവരം.

police found 405 gelatin sticks, 399 detonators from an auto rikshaw near aanamooli check post palakkad.