ന്യൂഡൽഹി: ഉപയോഗത്തിലൂടെയുള്ള വഖ്ഫ് സംവിധാനം ഇല്ലാതാക്കിയതും വഖ്ഫ് സ്വത്തുക്കൾ നിർബന്ധമായും രജിസ്റ്റർ ചെയ്യണമെന്ന ഭേദഗതിയിലെ 36ാം വ്യവസ്ഥയും സ്റ്റേ ചെയ്യാൻ സുപ്രിംകോടതി വിസമ്മതിച്ചത് വലിയ തോതിൽ വഖ്ഫ് സ്വത്തുക്കൾ നഷ്ടപ്പെടാൻ ഇടയാക്കും. ആകെയുള്ള എട്ടു ലക്ഷം സ്വത്തുക്കളിൽ നാലു ലക്ഷവും ഉപയോഗത്തിലൂടെ വഖ്ഫ് സ്വത്തുക്കളായി മാറിയവയാണ്. 

പഴയകാല രേഖകൾ ലഭ്യമല്ലാത്തതിനാൽ ഇത്തരത്തിലുള്ള സ്വത്തുക്കളിൽ 80 ശതമാനവും രജിസ്റ്റർ ചെയ്യപ്പെട്ടിട്ടില്ല. രജിസ്‌ട്രേഷൻ നിർബന്ധമാക്കുകയും ഉപയോഗത്തിലൂടെയുള്ള വഖ്ഫ് അനുവദിക്കുന്ന 1995 ലെ യഥാർത്ഥ വഖ്ഫ് നിയമത്തിലെ സെക്ഷൻ 3(ആർ)(ഐ) ഇല്ലാതാക്കുകയും ചെയ്തതോടെയാണ് ഈ സ്വത്തുക്കൾ നഷ്ടപ്പെടുന്ന സാഹചര്യമുണ്ടായത്. സ്വത്തുക്കൾ രജിസ്റ്റർ ചെയ്യേണ്ട ചുമതല  മുതവല്ലിക്കായിരുന്നു.

1923 ലെ നിയമത്തിൽ വഖ്ഫ് രജിസ്‌ട്രേഷൻ നിർബന്ധമായിരുന്നുവെന്നും 102 വർഷമായിട്ടും അത് ചെയ്തിട്ടില്ലെങ്കിൽ ഇപ്പോൾ അവർക്ക് ഒരു പരാതിയും ഉന്നയിക്കാൻ കഴിയില്ലെന്നും സുപ്രിംകോടതി ബെഞ്ച് ചൂണ്ടിക്കാട്ടി. പഴയ പല വഖ്ഫുകൾക്കും ഇപ്പോൾ ഒരു ആധാരവും ലഭ്യമാകില്ലെന്ന ഹരജിക്കാർ ഉന്നയിച്ച വാദം സംബന്ധിച്ച്, പഴയ നിയമപ്രകാരം, രജിസ്‌ട്രേഷനായി അപേക്ഷ സമർപ്പിക്കുന്നതിന് വഖ്ഫ് ആധാരത്തിന്റെ പകർപ്പ് നിർബന്ധമല്ലെന്ന് കോടതി നിരീക്ഷിച്ചു. യഥാർത്ഥ ആധാരം ലഭ്യമല്ലെങ്കിൽ, വഖ്ഫിന്റെ ഉത്ഭവം, സ്വഭാവം, വസ്തുക്കൾ എന്നിവയെക്കുറിച്ച് അപേക്ഷകന് അറിയാവുന്നിടത്തോളം വിവരങ്ങൾ നൽകി അപേക്ഷ നൽകാമായിരുന്നു.

30 വർഷമായി മുതവല്ലികൾ രജിസ്‌ട്രേഷനായി അപേക്ഷ നൽകേണ്ടതില്ലെന്ന് തീരുമാനിക്കുകയും  ഇപ്പോൾ അപേക്ഷയോടൊപ്പം വഖ്ഫ് രേഖയുടെ പകർപ്പ് നൽകണമെന്ന് ആവശ്യപ്പെടുന്ന വ്യവസ്ഥ ഏകപക്ഷീയമാണെന്ന് വാദിക്കുകയും ചെയ്യുന്നത് അംഗീകരിക്കാൻ കഴിയില്ല. അതിനാൽ, വഖ്ഫുകളിൽ നിക്ഷിപ്തമായ ഭൂമി സർക്കാർ പ്രഥമദൃഷ്ട്യാ പിടിച്ചെടുക്കുമെന്ന ഹരജിക്കാരുടെ വാദം നിലനിൽക്കില്ലെന്നും കോടതി പറഞ്ഞു.