പമ്പ: ശനിയാഴ്ച്ച പമ്പ തീരത്ത് നടക്കുന്ന അയ്യപ്പസംഗമത്തിനായുള്ള പന്തല്‍ പണി അവസാന ഘട്ടത്തില്‍. 1.85 കോടി രൂപ ചെലവില്‍ പൂര്‍ണമായി ശീതീകരിച്ച വിധത്തിലാണ് പ്രധാന പന്തല്‍. 38,500 ചതുരശ്ര അടി വിസ്തൃതിയുള്ള പന്തലില്‍ 3000 പേര്‍ക്ക് ഇരിക്കാം. ഗ്രീന്‍ റൂം, മീഡിയ റൂം, വി.ഐ.പി ലോഞ്ച് എന്നിവയും പന്തലില്‍ സജ്ജീകരിച്ചിട്ടുണ്ട്. 

മൂന്ന് പ്രധാന പന്തലിന്റെ മേല്‍ക്കൂരയുടെ പണികള്‍ അവസാനിക്കാറായി. ഹില്‍ടോപ്പിലാണ് പ്രതിനിധികള്‍ക്കുള്ള ഭക്ഷസൗകര്യം ഏര്‍പ്പെടുത്തിയിരിക്കുന്നത്. 500 പേര്‍ക്ക് ഇരിക്കാവുന്ന ഇവിടെയാണ് സെമിനാറും നടക്കുക. 

ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഇന്‍ഫ്രാസ്ട്രക്ചര്‍ ആന്‍ഡ് കണ്‍സ്ട്രക്ഷനാണു ക്രമീകരണങ്ങളുടെ ചുമതല. പമ്പാ മണപ്പുറവും നദിയും പൂര്‍ണമായും വൃത്തിയാക്കിയിട്ടുണ്ട്. ചാലക്കയം-പമ്പ റോഡിന്റെ പണികളും പമ്പാമണപ്പുറത്തെ ശുചിമുറികളുടെ അറ്റകുറ്റപ്പണികളും പെയിന്റിങ് ജോലികളും തീര്‍ന്നു.

ഇതിന് പുറമെ അയ്യപ്പ സംഗമത്തിനുള്ള പ്രതിനിധികളെ തീരുമാനിക്കാന്‍ സ്‌ക്രീനിംഗ് നടത്താനും തീരുമാനിച്ചിട്ടുണ്ട്. പ്രതിനിധികളുടെ എണ്ണം 3500 ആയി ചുരുക്കും. ആദ്യം വന്ന 3000 പേരെ ഇതിനായി തെരഞ്ഞെടുക്കും. ഓണ്‍ലൈനായി ഇതുവരെ 4590 പേരാണ് അപേക്ഷ നല്‍കിയത്.  ഇതോടെ രജിസ്‌ട്രേഷന്‍ നടപടി അവസാനിപ്പിച്ചു.