വെസ്റ്റ് ബാങ്ക്: അധിനിവേശ വെസ്റ്റ് ബാങ്കിനെ ജോർദാനുമായി ബന്ധിപ്പിക്കുന്ന അലൻബി ബ്രിഡ്ജ് അടച്ചിടുന്നു. ജോർദാൻ അധികൃതർ ഈ വാർത്ത സ്ഥിരീകരിച്ചിട്ടുണ്ട്. ദശലക്ഷക്കണക്കിന് ഫലസ്തീനികളെ ഈ തീരുമാനം പ്രതികൂലമായി ബാധിക്കും. കാരണം ഫലസ്തീനികൾക്ക് മറ്റ് മാർഗങ്ങളിലൂടെ പുറത്തേക്ക് പോകാൻ അനുമതിയില്ല. ബുധനാഴ്ച മുതൽ ഉത്തരവ് പ്രാബല്യത്തിൽ വരുമെന്ന് ഇസ്റാഈൽ അറിയിച്ചതായി ഫലസ്തീൻ ജനറൽ അതോറിറ്റി ഫോർ ബോർഡേഴ്സ് ആൻഡ് ക്രോസിംഗ്സിന്റെ മേധാവി നസ്മി മുഹന്ന പറഞ്ഞു.

ALSO READ: ഫലസ്തീനെ അംഗീകരിക്കാൻ മടിച്ച് ഇറ്റലി; സർക്കാരിനെ തിരുത്താൻ പ്രതിഷേധവുമായി പതിനായിരങ്ങൾ തെരുവിൽ, സ്‌കൂളുകളും റോഡുകളും അടച്ചു  

ഇനിയൊരു അറിയിപ്പ് ഉണ്ടാകുന്നത് വരെ വെസ്റ്റ് ബാങ്കിലേക്കുള്ള ചരക്കുനീക്കം നിർത്തിവെച്ചതായി ജോർദാനിലെ പൊതു സുരക്ഷാ അതോറിറ്റി ഫേസ്ബുക്കിലൂടെ അറിയിച്ചു. 

ഫലസ്തീനികൾക്ക് മറ്റു രാജ്യങ്ങളിലേക്ക് സഞ്ചരിക്കാനുള്ള ഏക വഴിയാണിത്. നയതന്ത്രജ്ഞരും വിദേശികളും ബെൻ ഗുരിയൺ വിമാനത്താവളത്തിന് പകരം ഇതാണ് ഉപയോഗിക്കാറ്. ഫലസ്തീനെ 140-ലധികം രാജ്യങ്ങൾ അംഗീകരിച്ചതിന് തൊട്ടുപിന്നാലെയാണ് ഇസ്റാഈൽ നീക്കം. പാശ്ചാത്യ രാജ്യങ്ങൾ ഫലസ്തീനെ പരമാധികാര രാജ്യമായി അം​ഗീകരിച്ചതിൽ ഇസ്റാഈലിന് വിറളി പൂണ്ടിരിക്കുകയാണെന്ന് വിദ​ഗ്ധർ വ്യക്തമാക്കി.

ALSO READ: ഫലസ്തീനെ രാഷ്ട്രമായി അംഗീകരിച്ച് ഫ്രാൻസ്; പൂർണപിന്തുണയുമായി ഇമ്മാനുവൽ മാക്രോൺ, കൂടുതൽ രാജ്യങ്ങൾ മുന്നോട്ട് 

രാജ്യത്തെ രാഷ്ട്രീയ നേതൃത്വമാണ് ഉത്തരവ് പുറപ്പെടുവിച്ചതെന്ന് ഇസ്റാഈൽ മാധ്യമങ്ങൾ റിപ്പോർട്ട് ചെയ്തു. "ക്രോസിംഗ് കൈകാര്യം ചെയ്യുന്ന ഉദ്യോഗസ്ഥർക്ക് അതിർത്തി അടച്ചതിന്റെ വിശദീകരണം ഇതുവരെ ലഭിച്ചിട്ടില്ല." ചാനൽ 11-ന്റെ സൈനിക ലേഖകൻ ഇറ്റേ ബ്ലൂമെന്റൽ പറഞ്ഞു.

കഴിഞ്ഞ ആഴ്ച രണ്ട് ഇസ്റാഈലികൾ കൊല്ലപ്പെട്ട ആക്രമണത്തിന് പിന്നാലെ അതിർത്തി അടച്ചിരുന്നു. എന്നാൽ ദിവസങ്ങൾക്ക് മുമ്പ്  ഇത് ഭാഗികമായി തുറന്നിരുന്നു. ഗസ്സയിലേക്കുള്ള സഹായം എത്തിക്കാനും ഈ അതിർത്തിയാണ് ഉപയോഗിക്കുന്നത്. ഇത് വെസ്റ്റ് ബാങ്കില മുഴുവൻ ഫലസ്തീനികളെയും പ്രായോഗികമായി തടവിലാക്കുന്നതിന് തുല്യമാണെന്ന് ഫലസ്തീൻ രാഷ്ട്രീയക്കാരൻ മുസ്തഫ ബർഗൗട്ടി പ്രതികരിച്ചു. 

israel, sweating over western countries recognizing palestine, has ordered the shutdown of allenby bridge, the key crossing between west bank and jordan. this will isolate millions of palestinians, restricting travel and aid, amid heightened regional tensions and diplomatic fallout.