ന്യൂഡൽഹി: ടൂത്ത് പേസ്റ്റുകൾ ഉൾപ്പെടെയുള്ള നിത്യോപയോഗ വസ്തുക്കൾ വ്യാജമായി നിർമ്മിക്കുന്ന ഒരു അനധികൃത ഫാക്ടറി ഡൽഹി പൊലിസ് കണ്ടെത്തി. സംഭവത്തിൽ ഒരാൾ അറസ്റ്റിലായിട്ടുണ്ട്. ടൂത്ത്പേസ്റ്റിന് പുറമെ, ആന്റാസിഡ് പൊടിയും മറ്റും ഇവിടെ നിന്ന് കണ്ടെത്തി.പാക്കേജിംഗിനും വിതരണത്തിനും തയ്യാറായ വലിയ അളവിൽ ഉള്ള വ്യാജ വസ്തുക്കളും അസംസ്കൃത വസ്തുക്കളും കണ്ടെത്തി. 

ചെറുകിട ബിസിനസ്സിന്റെ മറവിലാണ് യൂണിറ്റ് പ്രവർത്തിച്ചിരുന്നതെന്ന് അന്വേഷണ ഉദ്യോഗസ്ഥർ കണ്ടെത്തി. ജനപ്രിയ ബ്രാൻഡുകളുടെ അനുകരണ ഉൽപ്പന്നങ്ങൾ വ്യാജവുമായി നിർമിച്ച് വരികയായിരുന്നു ഇവിടെ. ക്ലോസ് അപ് പോലുള്ള പ്രമുഖ ടൂത്ത്പേസ്റ്റുകളുടെ വ്യാജനെയും ഇവിടെ നിന്നും കണ്ടെടുത്തു. വ്യാജ ക്ലോസ്-അപ്പ് ടൂത്ത് പേസ്റ്റുകളും ഇനോ സാഷെകളുമാണ് ഉൽപ്പാദിപ്പിക്കപ്പെടുന്ന ഏറ്റവും പ്രധാനപ്പെട്ട ഇനങ്ങളിൽ ഉള്ളത്.

25,000-ത്തിലധികം നിറച്ച ടൂത്ത് പേസ്റ്റ് ട്യൂബുകളും 15,000-ത്തിലധികം ഒഴിഞ്ഞ ട്യൂബുകളും പാക്കേജിംഗ് മെറ്റീരിയലുകളും പിടിച്ചെടുത്തു. ട്യൂബുകളുടെ ഫില്ലിംഗിനും സീലിംഗിനും ഉപയോഗിക്കുന്ന മെഷീനുകളും പിടിച്ചെടുത്തിട്ടുണ്ട്. 220 കാർട്ടണുകൾ, രണ്ട് ഗൺ മെഷീനുകൾ എന്നിവയും പിടിച്ചെടുത്തു.

ഡൽഹിയിലുടനീളമുള്ള വിവിധ വിപണികളിലേക്ക് മായം ചേർത്ത സാധനങ്ങൾ വിതരണം ചെയ്യുന്നുണ്ടായിരുന്നുവെന്നാണ് റിപ്പോർട്ട്. കാഴ്ചയിൽ ഒറിജിനലിനെ പോലെ തോന്നിക്കുന്ന ഇവ ഉപഭോക്താക്കളും ചെറുകിട കച്ചവടക്കാരും ധാരാളമായി വാങ്ങി ഉപയോഗിച്ചിരുന്നു. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടെന്നും ഇവരെ പിടികൂടാനുള്ള ശ്രമങ്ങൾ ആരംഭിച്ചതായും പൊലിസ് അറിയിച്ചു.