കാസർ​കോട്: നോട്ട് ബുക്കിൽ ഫലസ്തീൻ പതാക വരച്ച വിദ്യാർഥികളെ സ്കൂളിൽ നിന്ന് പുറത്താക്കി. കാസർകോട് ‍ജി.വി.എച്ച്.എസ്.എസ് കുഞ്ചത്തൂർ ​ഗവ. ഹയർസെക്കന്ററിയിലെ രണ്ട് വിദ്യാർഥികളെയാണ് അധ്യാപകർ സ്കൂളിൽ നിന്ന് പുറത്താക്കിയത്.  വിദ്യാർഥികൾ അറിയിച്ചതിനെ തുടർന്ന് രക്ഷിതാക്കൾ സ്കൂളിലെത്തി അധ്യാപകരുടെ പ്രവൃത്തിയെ ചോദ്യം ചെയ്തു. ഇതോടെ സംഭവത്തിൽ പ്രതിഷേധിച്ച് പ്രദേശവാസികളും നാട്ടുകാരും സ്കൂളിലേക്ക് എത്തിയതോടെ സംഘർഷാവസ്ഥ ഉടലെടുത്തു.

ALSO READ: ഗർഭിണിയായിരിക്കെ തുടങ്ങിയ പാലം പണി മകന് എട്ട് വയസ്സായിട്ടും പൂർത്തിയായില്ല; അല്പം കാത്തിരിക്കൂ നിങ്ങളുടെ മകൻ വളർന്ന് എഞ്ചിനീയറായി പണി പൂർത്തിയാക്കിയേക്കാം: യുവതിയുടെ കുറിപ്പ് വൈറൽ 

പിന്നാലെ അധ്യാപകരും നാട്ടുകാരും തമ്മിൽ വാക്കേറ്റം രൂക്ഷമായതോടെ പൊലിസ് എത്തിയാണ് സ്ഥിതി ശാന്തമാക്കിയത്. അതേസമയം ഫലസ്തീൻ പതാക നോട്ട് ബുക്കിൽ വരച്ച വിദ്യാർഥികൾക്ക് അനുകൂലമായി വിവിധ വിദ്യാർഥി സംഘടനകളും സ്കൂളിലേക്ക് എത്തി. 

സമാനമായ രീതിയിൽ കാസർകോട്, കുമ്പള ഗവ. ഹയർസെക്കൻഡറി സ്‌കൂളിലും കഴിഞ്ഞ ആഴ്ച ഫലസ്തീനെ അനുകൂലിച്ചതിന് അധ്യാപകരുടെ ഭാ​ഗത്ത് നിന്ന് പ്രതിഷേധം ഉയർന്നിരുന്നു. ഫലസ്തീനെ അനുകൂലിച്ച് സ്‌കൂൾ കലോത്സവത്തിനിടെ വിദ്യാർഥികൾ അവതരിപ്പിച്ച ഫലസ്തീൻ ഐക്യദാർഢ്യ മൈം ഷോ ആണ് അധ്യാപകർ തടഞ്ഞിരുന്നത്.

സംഭവത്തിൽ കളക്ടർക്ക് പൊലിസും പൊതുവിദ്യാഭ്യാസ ഉപഡയരക്ടറും റിപ്പോർട്ട് നൽകിയിരുന്നു. അധ്യാപകരുടെ അസഹിഷ്ണുത പ്രവർത്തി വിവാദമായതോടെയാണ് അന്വേഷിച്ച് റിപ്പോർട്ട് നൽകാൻ വിദ്യാഭ്യാസ മന്ത്രി വി.ശിവൻകുട്ടിയും കലക്ടർ കെ. ഇമ്പശേഖറും നിർദേശം നൽകിയിരുന്നത്. മൈം തടഞ്ഞത്തിനു പിന്നാലെ നിർത്തിവെച്ച കലോത്സവം പിറ്റേന്ന് സ്കൂളിൽ അവതരിപ്പിച്ചിരുന്നു. വിവാദം കണക്കിലെടുത്ത് കലോത്സവം വീണ്ടും നടത്താൻ പി.ടി.എ തീരുമാനിക്കുകയായിരുന്നു. 

കുമ്പള ഗവ. ഹയർസെക്കൻഡറി സ്‌കൂളിൽ ഒക്ടോബർ മൂന്ന് വെള്ളിയാഴ്ചയായിരുന്നു സംഭവം. വിദ്യാർഥികൾ അവതരിപ്പിച്ച മൈമിന്റെ അവസാന ഭാഗത്ത് ഫലസ്തീൻ പതാകയും ഫോട്ടോകളും ഉയർത്തി ഐക്യദാർഢ്യം പ്രഖ്യാപിച്ചതോടെയാണ് പരിപാടി തീരുംമുമ്പ് അധ്യാപകർ ഇടപെട്ട് കർട്ടൻ താഴ്ത്തി നിർത്തിവച്ചത്. ഇതേതുടർന്ന് ഇന്നലത്തെ കലോത്സവ പരിപാടികൾ മാറ്റി വയ്ക്കുകയാണെന്നും സ്‌കൂൾ അധികൃതർ അറിയിക്കുകയായിരുന്നു. മൈമിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് വിവാദമായത്.   

വിവാദമായതോടെ സംഭവത്തിൽ വിദ്യാഭ്യാസ മന്ത്രിയും കലക്ടറും അടിയന്തര റിപ്പോർട്ട് തേടിയിരുന്നു. സംഭവം ശ്രദ്ധയിൽപ്പെട്ടതോടെ വിദ്യാഭ്യാസ മന്ത്രി വി. ശിവൻകുട്ടിയും അടിയന്തരമായി റിപ്പോർട്ട് ആവശ്യപ്പെട്ടിരുന്നു. ഫലസ്തീൻ വിഷയത്തിൽ നിലപാട് വ്യക്തമാക്കിയ കേരളത്തിൽ ഇത്തരം സംഭവങ്ങൾ ആവർത്തിക്കരുത്. കുമ്പള സ്‌കൂളിലെ വിദ്യാർഥികൾക്ക് ഇതേ മൈം വേദിയിൽ അവതരിപ്പിക്കാൻ അവസരം നൽകുമെന്നും മന്ത്രി ശിവൻകുട്ടി പറഞ്ഞിരുന്നു. പ്രശ്നത്തിൽ പൊലിസിനോടും പൊതുവിദ്യാഭ്യാസ ഉപഡയരക്ടറോടും അന്വേഷിച്ച് റിപ്പോർട്ട് നൽകാൻ കലക്ടർ കെ. ഇമ്പശേഖറും നിർദേശം നൽകിയിരുന്നു. വിവരം പുറത്തറിഞ്ഞതിനെ തുടർന്ന് സ്‌കൂളിലേക്കു വിവിധ വിദ്യാർഥി സംഘടനകൾ മാർച്ചും നടത്തി.

In Kerala, students were expelled from a school for drawing the Palestine flag in their notebooks, sparking controversy. The school authorities cited violation of rules, while parents and student groups criticized the action, demanding a fair inquiry.