ന്യൂഡൽഹി: ലോകത്തിലെ ഓരോ രാജ്യങ്ങളുടെയും പാസ്‌പോർട്ടിന്റെ സ്ഥാനം നിർണയിക്കുന്ന ഹെൻലി പാസ്പോർട്ട് ഇൻഡക്സിൽ ഇന്ത്യക്ക് നിരാശ. കഴിഞ്ഞ വർഷം ഉണ്ടായിരുന്ന 80-ാം സ്ഥാനത്ത് നിന്ന് അഞ്ച് സ്ഥാനം പിന്നോട്ട് പോയി 85-ാം സ്ഥാനത്താണ് ഇത്തവണ ഇന്ത്യൻ പാസ്പോർട്ട്. 2006ൽ ആണ് ഇന്ത്യ സൂചികയിൽ ഏറ്റവും ഉയർന്ന റാങ്കിലെത്തിയത്. പിന്നീട് ഓരോ വർഷവും കുത്തനെ ഇടിയുകയായിരുന്നു. 2021ലാണ് ഏറ്റവും താഴ്ന്ന അവസ്ഥയിലെത്തിയത്. അന്ന് 90ലായിരുന്നു രാജ്യം.

ഇന്ത്യൻ പാസ്​പോർട്ട് സ്ഥാനം നഷ്ടപ്പെട്ടത് വിസയില്ലാതെ സന്ദർശിക്കാവുന്ന രാജ്യങ്ങളുടെ എണ്ണത്തിൽ വന്ന കുറവിനെ തുടർന്നാണ്. ഇന്ത്യൻ പാസ്​പോർട്ടുള്ളവർക്ക് വിസയില്ലാതെ 57 രാജ്യങ്ങളാണ് ഇനി സന്ദർശിക്കാനാവുക. കഴിഞ്ഞ വർഷം ഇത് 59 രാജ്യങ്ങൾ ആയിരുന്നു. പാസ്പോർട്ട് സ്ഥാനം നിർണയിക്കുന്ന ഹെൻലി ആന്റ് പാർട്ണേഴ്സ് ലണ്ടൻ ആസ്ഥാനമാക്കി പ്രവർത്തിക്കുന്ന സ്ഥാപനമാണ്. വിസ ആവശ്യമില്ലാതെ സഞ്ചരിക്കാൻ കഴിയുന്ന ലോക രാജ്യങ്ങളുടെ എണ്ണം അനുസരിച്ച് ആണ് ലോകത്തിലെ പാസ്‌പോർട്ടുകളുടെ കരുത്ത് എല്ലാവർഷവും പട്ടികപ്പെടുത്തുന്നത്.

ലോകത്തിലെ ഏറ്റവും കരുത്തുറ്റ പാസ്പോർട്ട് സിംഗപ്പൂരിന്റേതാണ്. 193 രാജ്യങ്ങളിലേക്ക് വിസ ഇല്ലാതെ ചെല്ലാൻ സിംഗപ്പൂർ പാസ്പോർട്ട് ഉള്ളവർക്ക് സാധിക്കും. രണ്ടാം സ്ഥാനത്തുള്ള ദക്ഷിണ കൊറിയയ്ക്ക് 190 രാജ്യങ്ങളിലേക്ക് വിസ രഹിതമായി സഞ്ചരിക്കാം. 189 രാജ്യങ്ങളിലേക്ക് വിസ ഫ്രീ ആയി എത്താൻ കഴിയുന്ന ജപ്പാൻ ആണ് മൂന്നാം സ്ഥാനത്ത്. 

227 രാജ്യങ്ങളുള്ള പട്ടികയിൽ യു.എൻ അംഗീകരിച്ച 193 പാസ്പോർട്ടുകളും ആറ് ടെറിട്ടറികളുമാണ് ഉള്ളത്. പട്ടികയിലെ അവസാന സ്ഥാനത്ത് അഫ്ഗാനിസ്ഥാൻ ആണ്. പുറകിൽ നിന്ന് രണ്ടാം സ്ഥാനത്ത് സിറിയയും മൂന്നാം സ്ഥാനത്ത് ഇറാഖുമാണ്.

കാലിടറി അമേരിക്ക, കരുത്തുകാട്ടി യുഎഇ

ചരിത്രത്തിലാദ്യമായി ലോകത്തിലെ ഏറ്റവും ശക്തമായ 10 പാസ്പോർട്ടുകളുടെ പട്ടികയിൽ നിന്ന് അമേരിക്ക പുറത്തായി. 12-ാം സ്ഥാനത്തേക്ക് പിന്തള്ളപ്പെട്ട അമേരിക്കയ്ക്ക് ഒപ്പം ഈ സ്ഥാനത്ത് മലേഷ്യയും ഉണ്ട്. 36 രാജ്യങ്ങൾ അമേരിക്കൻ പാസ്‌പോർട്ടിന് വിസ ഫ്രീ എൻട്രി നിഷേധിച്ചതാണ് അമേരിക്കയ്ക്ക് തിരിച്ചടിയായത്. അമേരിക്കൻ പാസ്പോർട്ട് ഉപയോഗിച്ച് ഇപ്പോൾ വിസ രഹിതമായി 180 രാജ്യങ്ങളിലേക്കാണ് പോവാനാവുക. 

2025 ഹെൻലി പാസ്പോർട്ട് ഇൻഡക്സിൽ ഞെട്ടിച്ച പ്രകടനം നടത്തിയ രാജ്യം യുഎഇ ആണ്. 42ൽ ഉണ്ടായിരുന്ന യുഎഇ ആദ്യ പത്തിൽ ഇടം പിടിച്ചാണ് ലോകത്തെ ഞെട്ടിച്ചത്. എട്ടാം സ്ഥാനത്തേക്കാണ് യുഎഇ കുതിച്ചുചാട്ടം നടത്തിയത്.