മനാമ: യെമനിലെ നിലവിലെ രാഷ്ട്രീയ സംഭവവികാസങ്ങളിലും വർധിച്ചുവരുന്ന ആഭ്യന്തര സംഘർഷങ്ങളിലും കടുത്ത ആശങ്ക രേഖപ്പെടുത്തി ബഹ്റൈൻ. യെമന്റെ പരമാധികാരത്തെയും പ്രാദേശിക സുരക്ഷയെയും ബാധിക്കുന്ന വിധത്തിൽ കാര്യങ്ങൾ മാറുന്നത് ഗൗരവകരമാണെന്ന് ബഹ്‌റൈൻ വിദേശകാര്യ മന്ത്രാലയം പ്രസ്താവനയിൽ അറിയിച്ചു.

യെമനിൽ സമാധാനവും സ്ഥിരതയും പുനഃസ്ഥാപിക്കുന്നതിനായി എല്ലാ വിഭാഗങ്ങളും സംയമനം പാലിക്കണമെന്ന് ബഹ്‌റൈൻ ആഹ്വാനം ചെയ്തു. സംഘർഷങ്ങൾ ലഘൂകരിക്കുന്നതിനും സമാധാനപരമായ അന്തരീക്ഷം സൃഷ്ടിക്കുന്നതിനും യെമൻ ജനത ശരിയായ തീരുമാനങ്ങൾ കൈക്കൊള്ളുമെന്ന് പ്രതീക്ഷിക്കുന്നതായും ബഹ്റൈൻ വ്യക്തമാക്കി.

ALSO READ: 2025 ജനുവരി മുതല്‍ നവംബര്‍ വരെ ബഹ്റൈന്‍ വിമാനത്താവളത്തിലെത്തിയത് റെക്കോര്‍ഡ് യാത്രക്കാര്‍ 

തെക്കൻ യെമനിലെ പ്രശ്നങ്ങൾക്ക് ന്യായമായ പരിഹാരം കാണുന്നതിനായി എല്ലാ പ്രാദേശിക ഘടകങ്ങളെയും ഉൾപ്പെടുത്തി സമഗ്രമായ സമ്മേളനം വിളിക്കാനുള്ള യെമന്റെ പുതിയ നീക്കത്തെ ബഹ്‌റൈൻ സ്വാഗതം ചെയ്തു. നയതന്ത്ര തലത്തിലുള്ള ഇത്തരം ചർച്ചകൾ പ്രതിസന്ധി പരിഹരിക്കുന്നതിനുള്ള നല്ലൊരു ചുവടുവെപ്പാണെന്ന് വിദേശകാര്യ മന്ത്രാലയം വിലയിരുത്തി.

യെമൻ ജനതയുടെ താൽപ്പര്യങ്ങൾ സംരക്ഷിക്കുന്നതിനും മേഖലയിൽ സമാധാനം ഉറപ്പാക്കുന്നതിനും രാഷ്ട്രീയ പരിഹാരങ്ങൾ അനിവാര്യമാണെന്ന് പ്രസ്താവനയിൽ പറയുന്നു. യെമനിലെ സ്ഥിതിഗതികൾ ബഹ്‌റൈൻ സൂക്ഷ്മമായി നിരീക്ഷിച്ചു വരികയാണ്.

bahrain has expressed deep concern over ongoing conflicts in yemen and called for restoring peace through dialogue. officials emphasized protecting civilians, supporting humanitarian efforts, and promoting regional stability, urging all parties to deescalate tensions and pursue a political solution peacefully