ന്യൂഡൽഹി: രാജ്യം വലിയ ആകാംക്ഷയോടെ കാത്തിരിക്കുന്ന 2026-ലെ കേന്ദ്ര ബജറ്റ് നാളെ പാർലമെന്റിൽ അവതരിപ്പിക്കും. മൂന്നാം മോദി സർക്കാരിന്റെ മൂന്നാം ബജറ്റാണിത്. പതിവ് രീതികളിൽ നിന്ന് വിഭിന്നമായി ഒരു ഞായറാഴ്ച ബജറ്റ് അവതരിപ്പിക്കുന്നു എന്ന പ്രത്യേകതയും ഇത്തവണയുണ്ട്. നാളെ രാവിലെ 11 മണിക്കാണ് ധനമന്ത്രി നിർമല സീതാരാമൻ ബജറ്റ് പ്രസംഗം ആരംഭിക്കുക. തുടർച്ചയായി ഒൻപതാം തവണയാണ് നിർമല സീതാരാമൻ കേന്ദ്ര ബജറ്റ് അവതരിപ്പിക്കുന്നത്. ഇതോടെ ഇന്ത്യയുടെ ചരിത്രത്തിൽ തുടർച്ചയായി ഏറ്റവും കൂടുതൽ ബജറ്റ് അവതരിപ്പിക്കുന്ന ധനമന്ത്രി എന്ന റെക്കോർഡ് അവർക്ക് സ്വന്തമാകും.

ALSO READ: കേരളത്തെ അപമാനിക്കാൻ സംഘപരിവാർ നീക്കം; 'ദ കേരള സ്റ്റോറി 2' നെതിരെ മന്ത്രി സജി ചെറിയാൻ; രാഷ്ട്രീയത്തിനതീതമായ പ്രതിരോധത്തിന് ആഹ്വാനം

ഇന്ത്യയിൽ ഏറ്റവും കൂടുതൽ ബജറ്റുകൾ അവതരിപ്പിച്ച വ്യക്തി എന്ന ബഹുമതി മൊറാർജി ദേശായിക്ക് സ്വന്തമാണ്. 10 ബജറ്റുകളാണ് പാർലമെന്റിൽ അദ്ദേഹം അവതരിപ്പിച്ചത്. നാളെ ബജറ്റ് അവതരിപ്പിക്കുന്നതോടെ, നിർമല സീതാരാമൻ തന്റെ ഒമ്പതാമത്തെ ബജറ്റ് പൂർത്തിയാക്കി ഈ പട്ടികയിൽ രണ്ടാം സ്ഥാനത്തേക്ക് ഉയരും. വിവിധ കാലയളവുകളിലായി 9 ബജറ്റുകൾ അവതരിപ്പിച്ചുകൊണ്ട് മുൻ ധനമന്ത്രി പി. ചിദംബരവും ഈ റെക്കോർഡുകളിൽ മുൻപന്തിയിലുണ്ട്.

2019-ൽ രണ്ടാം മോദി സർക്കാരിന്റെ കാലത്താണ് നിർമല സീതാരാമൻ ധനമന്ത്രിയായി ചുമതലയേറ്റത്. തുടർന്ന് 2024-ൽ മൂന്നാം മോദി സർക്കാർ അധികാരത്തിൽ വന്നപ്പോഴും ധനമന്ത്രി സ്ഥാനത്ത് അവർ തുടരുകയായിരുന്നു. സ്വതന്ത്ര ഇന്ത്യയുടെ 88-ാമത് ബജറ്റാണ് നാളെ അവതരിപ്പിക്കപ്പെടുന്നത്.

എന്തുകൊണ്ട് ഞായറാഴ്ച?

സാധാരണയായി പ്രവൃത്തിദിവസങ്ങളിൽ അവതരിപ്പിക്കാറുള്ള ബജറ്റ് ഇത്തവണ ഞായറാഴ്ചയാക്കിയത് വലിയ ചർച്ചകൾക്ക് വഴിവെച്ചിട്ടുണ്ട്. എന്നാൽ വാരാന്ത്യങ്ങളിൽ ബജറ്റ് വരുന്നത് ആദ്യമായല്ല. കഴിഞ്ഞ വർഷത്തെ (2025) ബജറ്റ് ഒരു ശനിയാഴ്ചയായിരുന്നു. മുൻപ് അരുൺ ജെയ്റ്റ്‌ലി 2015-ലും 2016-ലും ശനിയാഴ്ചകളിൽ ബജറ്റ് അവതരിപ്പിച്ചിട്ടുണ്ട്.

2017 മുതലാണ് ബജറ്റ് തീയതി ഫെബ്രുവരി അവസാന വാരത്തിൽ നിന്നും ഫെബ്രുവരി ഒന്നിലേക്ക് മാറ്റിയത്. ബജറ്റ് നിർദ്ദേശങ്ങൾ പുതിയ സാമ്പത്തിക വർഷത്തിന്റെ തുടക്കത്തിൽ തന്നെ നടപ്പിലാക്കുന്നു എന്ന് ഉറപ്പാക്കാനായിരുന്നു ഈ മാറ്റം. ഈ ക്രമീകരണത്തിന്റെ ഭാഗമായാണ് ഇത്തവണ ഫെബ്രുവരി ഒന്ന് ഞായറാഴ്ചയായിട്ടും ബജറ്റ് അവതരണവുമായി മുന്നോട്ട് പോകാൻ സർക്കാർ തീരുമാനിച്ചത്.

സാധാരണക്കാർക്കും നിക്ഷേപകർക്കും ഒരുപോലെ പ്രതീക്ഷ നൽകുന്ന ഒന്നാകും ഈ ബജറ്റെന്നാണ് വിലയിരുത്തപ്പെടുന്നത്. ആദായനികുതി ഇളവുകൾ, കാർഷിക മേഖലയ്ക്കുള്ള പ്രഖ്യാപനങ്ങൾ, തൊഴിലവസരങ്ങൾ സൃഷ്ടിക്കുന്നതിനുള്ള പദ്ധതികൾ എന്നിവയിൽ നിർണായകമായ പ്രഖ്യാപനങ്ങൾ നാളെയുണ്ടാകുമോ എന്നാണ് രാജ്യം ഉറ്റുനോക്കുന്നത്.

union budget 2026: a historic sunday presentation.  finance minister nirmala sitharaman is set to present the union budget 2026 tomorrow, february 1, at 11 am. breaking traditional norms, the budget is being presented on a sunday to maintain the post-2017 practice of a february 1 rollout. this marks a significant milestone for nirmala sitharaman as she presents her 9th consecutive budget, making her the first finance minister in indian history to achieve such a long unbroken streak.