കൊച്ചി: ബോളിവുഡ് സംവിധായകൻ സനോജ് മിശ്രയ്‌ക്കെതിരെ ലൈംഗികാതിക്രമ ആരോപണവുമായി കുംഭമേളയിലെ ചിത്രങ്ങളിലൂടെ വൈറലായ മൊണാലിസ. സിനിമാ സെറ്റിൽ വെച്ച് സംവിധായകൻ തന്നോട് മോശമായി പെരുമാറിയെന്നും പലതവണ ശരീരത്തിൽ കയറിപ്പിടിച്ചെന്നും മൊണാലിസ വെളിപ്പെടുത്തി. കൊച്ചിയിൽ നടത്തിയ വാർത്താ സമ്മേളനത്തിൽ പൊട്ടിക്കരഞ്ഞുകൊണ്ടാണ് താൻ നേരിട്ട ദുരനുഭവങ്ങൾ അവർ വിവരിച്ചത്.

പ്രായപൂർത്തിയാകും മുൻപേ അതിക്രമം

തനിക്ക് 18 വയസ്സ് തികയുന്നതിന് മുൻപാണ് സനോജ് മിശ്രയിൽ നിന്ന് ഇത്തരത്തിലുള്ള ദുരനുഭവങ്ങൾ ഉണ്ടായതെന്ന് മൊണാലിസ പറഞ്ഞു. ആദ്യ സിനിമയായതിനാൽ വീട്ടുകാരോട് പരാതിപ്പെട്ടപ്പോൾ അവർ അത് കാര്യമാക്കിയില്ലെന്നും അതുകൊണ്ടാണ് അന്ന് പുറത്തുപറയാൻ കഴിയാതിരുന്നതെന്നും അവർ കൂട്ടിച്ചേർത്തു. ഭർത്താവ് ഫർമാൻ ഖാനൊപ്പമാണ് മൊണാലിസ മാധ്യമങ്ങളെ കണ്ടത്.

ജീവന് ഭീഷണി; നാട്ടിലേക്ക് മടങ്ങാൻ ഭയം

സംവിധായകനെതിരെ നിയമനടപടിയുമായി മുന്നോട്ട് പോകാനാണ് തീരുമാനമെന്ന് മൊണാലിസ വ്യക്തമാക്കി. നിലവിൽ കേരളത്തിൽ താമസിക്കുന്ന ഇവർക്ക് നാട്ടിലേക്ക് മടങ്ങാൻ ആഗ്രഹമുണ്ടെങ്കിലും അത് വലിയ വെല്ലുവിളിയാണെന്ന് അവർ പറഞ്ഞു. തങ്ങളുടെ ജീവന് ഭീഷണിയുണ്ടെന്നും കഴിഞ്ഞ ദിവസം ഇവർ വെളിപ്പെടുത്തിയിരുന്നു.

കേരളത്തിൽ വെച്ചായിരുന്നു മൊണാലിസയുടെയും ഫർമാൻ ഖാന്റെയും വിവാഹം നടന്നത്. വിവാദങ്ങൾക്കും ഭീഷണികൾക്കും ഇടയിൽ സുരക്ഷിതമായ ഒരിടം തേടുകയാണ് തങ്ങളെന്നും അവർ വാർത്താ സമ്മേളനത്തിൽ പറഞ്ഞു.