തിരുവനന്തപുരം: ലഹരിക്കെതിരായി സംസ്ഥാന സര്‍ക്കാര്‍ പ്രഖ്യാപിച്ച ഓപ്പറേഷന്‍ തൂഫാനില്‍ നിര്‍ണായക അറസ്റ്റ് നടന്നതായി ആഭ്യന്തര മന്ത്രി രമേശ് ചെന്നിത്തല. ഇന്ത്യയിലേക്കുള്ള മയക്കുമരുന്ന് കടത്തിന്റെ പ്രധാന കണ്ണികളായ നൈജീരിയന്‍ പൗരനെയും, വിദേശ വനിതയെയും കേരള പൊലിസ് പിടികൂടിയതായി ചെന്നിത്തല അറിയിച്ചു. ഡല്‍ഹി പൊലിസിന്റെ സഹായത്തോടെയാണ് കേരള പൊലിസ് ഓപ്പറേഷന്‍ വിജയകരമായി പൂര്‍ത്തിയാക്കിയതെന്നും അദ്ദേഹം വ്യക്തമാക്കി. 

' രണ്ട് പ്രധാനപ്പെട്ട ക്യാച്ചാണ് ലഭിച്ചത്. പന്തളം പൊലിസ് സ്റ്റേഷനില്‍ രജിസ്റ്റര്‍ ചെയ്ത കേസുമായി ബന്ധപ്പെട്ട് നൈജീരിയന്‍ പൗരനെയും, പെരുനാട് പൊലിസ് സ്റ്റേഷനില്‍ രജിസ്റ്റര്‍ ചെയ്ത കേസുമായി ബന്ധപ്പെട്ട് വിദേശ വനിതയെയും അന്വേഷണ സംഘം അറസ്റ്റ് ചെയ്തിട്ടുണ്ട്. കേരളത്തിലേക്ക് മയക്കുമരുന്ന് എത്തിക്കുന്ന പ്രധാന കണ്ണികളാണ് ഇരുവരും,' ആഭ്യന്തര മന്ത്രി പറഞ്ഞു. 

നിരോധിത മയക്കുമരുന്നുകളുടെ ഉറവിടം കണ്ടെത്തി നശിപ്പിക്കാനുള്ള നിര്‍ണായക ഇടപെടലാണ് പൊലിസ് നടത്തുന്നത്. ഇതിന്റെ ഭാഗമായി സംസ്ഥാന സ്‌പെഷ്യല്‍ ബ്രാഞ്ചില്‍ തൂഫാന്‍ ഇന്റലിജന്‍സ് എന്ന പേരില്‍ ഒരു സംഘത്തെ നിയോഗിച്ചിട്ടുണ്ട്. മയക്കുമരുന്ന് വിപണനവുമായി ബന്ധപ്പെട്ട് രഹസ്യങ്ങള്‍ ആര്‍ക്ക് വേണമെങ്കിലും പൊലിസിന് കൈമാറാം. ഇതിനായി 9497979794, 9497927797 എന്നീ നമ്പറുകളില്‍ ബന്ധപ്പെടാം. മാത്രമല്ല 9995966666 എന്ന വാട്‌സ്ആപ്പ് നമ്പറിലേക്ക് മെസേജ് അയച്ചും പൊതുജനങ്ങള്‍ക്ക് വിവരം കൈമാറാമെന്നും അദ്ദേഹം വ്യക്തമാക്കി.