റിയാദ്: പശ്ചിമേഷ്യയിലെ നിലവിലെ സവിശേഷ സാഹചര്യം പരിഗണിച്ച്, കൃത്യസമയത്ത് മടങ്ങാൻ കഴിയാതെ വിസ കാലാവധി തീർന്നുപോയവർക്ക്  ആശ്വാസവുമായി സഊദി ഭരണകൂടം. ഇത്തരം യാത്രക്കാർക്ക് പ്രത്യേക പിഴയോ മറ്റ് നിയമനടപടികളോ നേരിടാതെ തന്നെ രാജ്യം വിടാൻ അനുമതി നൽകുന്ന പുതിയ മാർഗ്ഗനിർദ്ദേശങ്ങൾ ജവാസാത്ത് പുറത്തിറക്കി.

ഫാമിലി വിസിറ്റ്, ബിസിനസ്‌ വിസിറ്റ്, ടൂറിസ്റ്റ് വിസിറ്റ് തുടങ്ങിയ വിവിധ തരം സന്ദർശക വിസകൾ, ഉംറ വിസ, ട്രാൻസിറ്റ് വിസ, ഫൈനൽ എക്സിറ്റ് വിസ എന്നിവ കൈവശമുള്ളവർക്ക് ആനുകൂല്യം ലഭിക്കും. ഇവർക്ക് നിയമ നടപടികൾ നേരിടാതെ ഏപ്രിൽ 18 ന് മുന്നേ സഊദി വിടാനോ അത് വരെ വിസ പുതുക്കാനോ ആണ് അവസരം നൽകിയത്. 2026 ഫെബ്രുവരി 25 മുതൽ വിസ കാലാവധി അവസാനിച്ചവർക്കാണ് ഇളവ് ബാധകമാകുന്നത്.

ഈ ആനുകൂല്യത്തിന് അർഹരായവർ 2026 ഏപ്രിൽ 18-ന് മുൻപായി രാജ്യം വിടണമെന്ന് ഓർമിപ്പിച്ചു ആഭ്യന്തര മന്ത്രാലയം, നിശ്ചിത സമയപരിധിക്കുള്ളിൽ മടങ്ങാത്തവർക്കെതിരെ രാജ്യത്തെ നിലവിലുള്ള നിയമമനുസരിച്ചുള്ള ശിക്ഷാ നടപടികൾ സ്വീകരിക്കുമെന്നും മുന്നറിയിപ്പ് നൽകി.