ന്യൂഡൽഹി: രാജ്യത്തെ പെട്രോൾ ഡീസൽ വില വീണ്ടും വർധിപ്പിച്ചു. പെട്രോൾ വില ലിറ്ററിന് 87 പൈസയും ഡീസലിന് 91 പൈസയുമാണ് വർധിപ്പിച്ചത്. 10 ദിവസത്തിനുള്ളിൽ ഇത് മൂന്നാം തവണയാണ് പെട്രോൾ, ഡീസൽ വില വർധിപ്പിക്കുന്നത്. ഇതോടെ സംസ്ഥാന തലസ്ഥാനമായ തിരുവനന്തപുരത്ത് 112.62 രൂപയാവും പെട്രോൾ വില. ഡൽഹിയിൽ പെട്രോൾ വില ലിറ്ററിന് 98.64 രൂപയിൽ നിന്ന് 99.51 രൂപയായും ഡീസൽ വില 91.58ൽ നിന്ന് 92.49 രൂപയായും വർധിക്കും. വിവിധ സംസ്ഥാനങ്ങളിലെ തെരഞ്ഞെടുപ്പുകൾ പൂർത്തിയായി ഫലം പുറത്തുവന്നതിന് പിന്നാലെ ഈ  മാസം 15ന് ഇന്ധന വില ലിറ്ററിന് മൂന്ന് രൂപ വീതം കൂട്ടിയിരുന്നു. മെയ് 19 ന് 90പൈസയും വർധിപ്പിച്ചു. ഇതോടെ പത്ത് ദിവസത്തിനിടെ ഇന്ധന വിലയിൽ അഞ്ചുരൂപയുടെ വർധനവാണ് ഉണ്ടായിരിക്കുന്നത്. പശ്ചിമേഷ്യൻ സംഘർഷത്തിന്റെ പശ്ചാത്തലത്തിലാണ് കേന്ദ്ര സർക്കാർ ഇന്ധന വില വർധിപ്പിക്കാൻ കമ്പനികൾക്ക് മൗനാനുവാദം നൽകിയിരിക്കുന്നത്. 
രാജ്യത്ത് പെട്രോൾ, ഡീസൽ ക്ഷാമം ഉണ്ടെന്ന അഭ്യൂഹം ഇന്ത്യൻ  പെട്രോളിയം പ്രകൃതി വാതക മന്ത്രാലം ഇന്നലെ തള്ളിക്കളഞ്ഞിരുന്നു. ഇന്ത്യയിൽ ആവശ്യത്തിന് പെട്രോൾ, ഡീസൽ ശേഖരമുണ്ടെന്നും വിതരണം സാധാരണപോലെ തുടരുന്നുണ്ടെന്നും മന്ത്രാലയം ട്വീറ്റിൽ വ്യക്തമാക്കി. എല്ലാവർക്കും ഇന്ധന ലഭ്യത ഉറപ്പാക്കാൻ പൊതുജനം സഹകരിക്കണമെന്നും മന്ത്രാലയം അഭ്യർഥിച്ചു.