കുവൈത്ത് സിറ്റി: കുവൈത്തിലെ വൈദ്യുതി, ജല ശുദ്ധീകരണ ശാലയ്ക്ക് നേരെയുണ്ടായ ഇറാന്‍ ആക്രമണത്തില്‍ ഒരു ഇന്ത്യന്‍ തൊഴിലാളി കൊല്ലപ്പെട്ടു. ഇന്ത്യന്‍ സമയം ഇന്ന് പുലര്‍ച്ചെ പ്ലാന്റിലെ സര്‍വീസ് കെട്ടിടത്തിന് നേരെയാണ് ആക്രമണം ഉണ്ടായതെന്നും അടിസ്ഥാന സൗകര്യങ്ങള്‍ക്ക് കനത്ത നാശനഷ്ടങ്ങള്‍ സംഭവിച്ചതായും കുവൈത്ത് വൈദ്യുതിജല മന്ത്രാലയം അറിയിച്ചു.
ആക്രമണത്തിന് പിന്നാലെ അടിയന്തര പദ്ധതികളുടെ ഭാഗമായി സാങ്കേതിക, രക്ഷാപ്രവര്‍ത്തന സംഘങ്ങളെ ഉടന്‍ തന്നെ സംഭവസ്ഥലത്തേക്ക് അയച്ചു. പ്ലാന്റിന്റെ പ്രവര്‍ത്തനം തടസ്സമില്ലാതെ സാധാരണ നിലയില്‍ തുടരുന്നുണ്ടെന്ന് ഉറപ്പാക്കാന്‍ നടപടികള്‍ സ്വീകരിച്ചിട്ടുണ്ട്. കേടുപാടുകള്‍ സംഭവിച്ച പ്രദേശം പൂര്‍ണ്ണമായും സുരക്ഷിതമാക്കുന്നതിനായി സുരക്ഷാ ഏജന്‍സികളുമായും മറ്റ് ബന്ധപ്പെട്ട വകുപ്പുകളുമായും ഏകോപിപ്പിച്ച് പ്രവര്‍ത്തിക്കുകയാണെന്നും മന്ത്രാലയം വ്യക്തമാക്കി. 
കുവൈത്തിലെ ആക്രമണത്തെക്കുറിച്ച് ഇറാന്റെ ഭാഗത്തുനിന്ന് ഔദ്യോഗിക പ്രതികരണങ്ങള്‍ ഒന്നും വന്നിട്ടില്ല. എന്നാല്‍ പ്ലാന്റിന് വലിയ നാശനഷ്ടങ്ങള്‍ ഉണ്ടായെന്ന കുവൈത്ത് മന്ത്രാലയത്തിന്റെ പ്രസ്താവന ഇറാനിയന്‍ ഔദ്യോഗിക മാധ്യമങ്ങള്‍ റിപ്പോര്‍ട്ട് ചെയ്തു.

Summary: An Indian worker was killed, and major material damage was caused after an Iranian attack late Sunday on a service building at a power generation and water desalination plant in Kuwait, the country’s Electricity Ministry said early Monday. Technical and emergency response teams were immediately sent to the site to deal with the aftermath of the attack and ensure the normal continuation of operations, it added.