കോഴിക്കോട്: ഷാഫി പറമ്പില്‍ എംപിയെ പരിഹസിച്ച് സിപിഎം നേതാവ് എളമരം കരീം. ഷാഫി ഒരു സംഭവമല്ലെന്നും, സോഷ്യല്‍ മീഡിയയില്‍ റീല്‍സുണ്ടാക്കി ഓളമുണ്ടാക്കുന്നതില്‍ മാത്രമാണ് ഷാഫിക്ക് സ്വാധീനമുള്ളതെന്നും എളമരം കരീം പറഞ്ഞു. കോഴിക്കോട് പ്രസ് ക്ലബ്ബില്‍ സംസാരിക്കുകയായിരുന്നു അദ്ദേഹം.

കഴിഞ്ഞ ലോക്‌സഭാ തെരഞ്ഞെടുപ്പില്‍ ഷാഫി മാത്രമല്ലല്ലോ ജയിച്ചത്, 19 മണ്ഡലങ്ങളിലും യുഡിഎഫ് അല്ലേ ജയിച്ചത്. ശൈലജ ടീച്ചറും തോമസ് ഐസക്കും മോശക്കാരയതുകൊണ്ടല്ല തോറ്റത്. ഇതുപോലെ മറ്റ് പ്രമുഖരും തോറ്റു. പാര്‍ലമെന്റ് രാഷ്ട്രീയം തികച്ചും വ്യത്യസ്തമാണ്. ദേശീയ രാഷ്ട്രീയം വരുമ്പോള്‍ ബദലാകാനും, ഏറ്റവും വലിയ ഒറ്റകക്ഷിയാകാനും സാധ്യതയുള്ള കാര്യങ്ങള്‍ ഒക്കെ ജനങ്ങള്‍ പരിഗണിക്കും. എന്നാല്‍ നിയമസഭാ തെരഞ്ഞെടുപ്പ് ഇതില്‍ നിന്നെല്ലാം തികച്ചും വ്യത്യസ്തമാണ്. 

ALSO READ: ഇറാനിൽ ഇസ്റാഈലിന്റെ വൻ വ്യോമാക്രമണം: വിമാനത്താവളങ്ങളും സൈനിക കേന്ദ്രങ്ങളും തകർത്തു; ആണവ നിലയത്തിന് ഭീഷണി 

ധൈര്യമുണ്ടെങ്കില്‍ ഷാഫി ഒരു നിയമസഭ മണ്ഡലത്തില്‍ മത്സരിക്കട്ടെ, ധര്‍മ്മടത്ത് മത്സരിക്കുമെന്നൊക്കെ പറഞ്ഞ് കേട്ടിരുന്നല്ലോ? മത്സരിപ്പിക്കാന്‍ ധൈര്യമുണ്ടായോ കോണ്‍ഗ്രസിന്. ഷാഫി അത്ര വലിയ സംഭവമാണെന്ന് ഞങ്ങള്‍ക്ക് തോന്നിയിട്ടില്ല. സ്വന്തം വ്യക്തിത്വം റീല്‍സിലൂടെ എത്തിക്കുകയാണ് അദ്ദേഹം ചെയ്യുന്നത്,' എളമരം കരീം പറഞ്ഞു.