തിരുവനന്തപുരം: സ്‌കൂളുകള്‍ക്ക് അവധി ലഭിച്ചതോടെ കുടുംബത്തോടൊപ്പം വിനോദ യാത്രകള്‍ക്കായി തയ്യാറെടുക്കുകയാണ് മലയാളി കുടുംബങ്ങള്‍. എന്നാല്‍ ദൂരയാത്രകള്‍ പോകുമ്പോള്‍ പൂട്ടിയിട്ട വീടുകളുടെ സുരക്ഷ എന്നും ഒരു ആശങ്കയാണ്. ഈ സാഹചര്യത്തില്‍ ജനങ്ങളുടെ മനോവിഷമം പരിഹരിക്കാനും മോഷണങ്ങള്‍ തടയാനുമായി പ്രത്യേക സുരക്ഷാ പദ്ധതിയുമായി കേരള പൊലിസ് രംഗത്തെത്തിയിരിക്കുകയാണ്.

കേരള പൊലിസിന്റെ ഔദ്യോഗിക മൊബൈല്‍ ആപ്പായ 'പോള്‍ ആപ്പ്' (Pol-App) വഴി ഈ സേവനം ലഭ്യമാകും. വീട് പൂട്ടി യാത്ര പോകുന്നവര്‍ക്ക് ആപ്പിലെ 'Locked House Information' എന്ന സൗകര്യം പ്രയോജനപ്പെടുത്തി പൊലിസിനെ വിവരം അറിയിക്കാം.

ശ്രദ്ധിക്കേണ്ട കാര്യങ്ങള്‍

നിരീക്ഷണ കാലാവധി- നിങ്ങള്‍ വിവരങ്ങള്‍ നല്‍കിക്കഴിഞ്ഞാല്‍ പരമാവധി 14 ദിവസം വരെ ആ വീടും പരിസരവും പൊലിസിന്റെ പ്രത്യേക നിരീക്ഷണത്തിലായിരിക്കും.

നല്‍കേണ്ട വിവരങ്ങള്‍- യാത്ര തുടങ്ങുന്ന ദിവസം, വീടിന്റെ ലൊക്കേഷന്‍, വീട്ടുപേര്, അത്യാവശ്യ ഘട്ടങ്ങളില്‍ ബന്ധപ്പെടാന്‍ സമീപത്തുള്ള ബന്ധുക്കളുടെയോ അയല്‍വാസികളുടെയോ പേരും ഫോണ്‍ നമ്പറും എന്നിവ ആപ്പില്‍ രേഖപ്പെടുത്തണം.

ലഭ്യത- ഗൂഗിള്‍ പ്ലേ സ്റ്റോറിലും ആപ്പിള്‍ ആപ്പ് സ്റ്റോറിലും 'Pol-App' ലഭ്യമാണ്.

യാത്ര പോകുന്നവര്‍ ഈ സൗകര്യം പരമാവധി പ്രയോജനപ്പെടുത്തണമെന്നും വീടിന് പുറത്ത് ലൈറ്റുകള്‍ ഇട്ടു പോകുന്നതും മറ്റും ശ്രദ്ധിക്കണമെന്നും പൊലിസ് നിര്‍ദേശിക്കുന്നു.