തിരുവനന്തപുരം: സംസ്ഥാനത്തെ എല്ലാ സ്റ്റേജ് കാര്യേജുകളിലും സീറ്റുകള്‍ തമ്മില്‍ നിയമാനുസൃത അകലം പാലിക്കുന്നുണ്ടെന്ന് പരിശോധിച്ച് ഉറപ്പാക്കണമെന്ന് ട്രാന്‍സ്‌പോര്‍ട്ട് കമീഷണര്‍ക്ക് മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ. ബൈജുനാഥ് നിര്‍ദേശം നല്‍കി. സ്വകാര്യ ബസുകളില്‍ സീറ്റുകള്‍ക്കിടയില്‍ നിശ്ചിത അകലം പാലിക്കാതിരുന്നതിനാല്‍ യാത്രക്കാരുടെ കാല്‍മുട്ടുകള്‍ കുടുങ്ങുന്നുവെന്ന പരാതിയിലാണ് ഈ ഉത്തരവ്.

കോഴിക്കോട് പേരാമ്പ്ര സ്വദേശി ടി.സി വിജീഷിന്റെ പരാതിയെ തുടര്‍ന്നാണ് കമ്മീഷന്റെ ഇടപെടല്‍. സ്വകാര്യ ബസുകളില്‍ കൂടുതല്‍ സീറ്റുകള്‍ കുത്തിനിറയ്ക്കുന്നത് യാത്രക്കാര്‍ക്ക് അസൗകര്യമുണ്ടാക്കുന്നുവെന്ന് പരാതിയില്‍ ചൂണ്ടിക്കാട്ടിയിരുന്നു. ഈ നിര്‍ദേശങ്ങള്‍ എല്ലാ ആര്‍.ടി.ഒമാര്‍ക്കും നല്‍കണമെന്നും ഉത്തരവില്‍ വ്യക്തമാക്കിയിട്ടുണ്ട്.

സ്വകാര്യ ബസുകളിലെ സീറ്റുകള്‍ തമ്മില്‍ 68.5 സെന്റീമീറ്റര്‍ അകലം ഉണ്ടായിരിക്കണമെന്നാണ് ആര്‍.ടി.ഒ മനുഷ്യാവകാശ കമ്മീഷന് റിപോര്‍ട്ട് നല്‍കിയിരിക്കുന്നത്. യാത്രക്കാര്‍ക്ക് പരാതി ഉണ്ടെങ്കില്‍ ബസ് നമ്പര്‍ അധികൃതരെ അറിയിക്കാവുന്നതാണ്. വാഹന പരിശോധനയ്ക്കിടെ നിയമലംഘനം കണ്ടെത്തിയാല്‍ കര്‍ശന നടപടി സ്വീകരിക്കുമെന്നും റിപോര്‍ട്ടില്‍ ഉറപ്പ് നല്‍കി. യാത്രക്കാരുടെ സുരക്ഷയില്‍ വിട്ടുവീഴ്ച വേണ്ടെന്നും കെ. ബൈജുനാഥ് ഓര്‍മിപ്പിച്ചു.

Kerala Human Rights Commission orders Transport Commissioner to enforce 68.5 cm seat spacing in all stage carriages after complaints of knees getting stuck in private buses due to overcrowding.