ചെന്നൈ: ബിജെപി വിട്ടതിന് പിന്നാലെ എക്‌സ് ബയോ തിരുത്തി കെ അണ്ണാമലൈ. 'നല്ല രാഷ്ട്രീയത്തെ തിരയുന്ന ഒരു സാധാരണക്കാരന്‍' എന്നതാണ് പുതിയ ബയോ. മുന്‍പ് ബിജെപിയില്‍ ആയിരുന്ന കാലത്ത് ബിജെപി കാര്യകര്‍ത്താ എന്നായിരുന്നു അണ്ണാമലൈയുടെ എക്‌സ് ബയോ. കഴിഞ്ഞ ദിവസം ഔദ്യോഗികമായി ബിജെപിയുമായി പിരിഞ്ഞതിന് ശേഷമാണ് പുതിയ ബയോ പ്രത്യക്ഷപ്പെട്ടത്. 

തമിഴ്‌നാട് ബിജെപി മുന്‍ സംസ്ഥാന അധ്യക്ഷനായിരുന്ന കെ അണ്ണാമലൈ പാര്‍ട്ടിക്കുള്ളിലെ അസ്വാരസ്യങ്ങള്‍ക്കൊടുവിലാണ് സ്വന്തം വഴി തിരഞ്ഞെടുത്തത്. ദേശീയ നേതൃത്വവുമായി ചര്‍ച്ചകള്‍ നടത്തിയെങ്കിലും അണ്ണാമലൈ തന്റെ തീരുമാനത്തില്‍ ഉറച്ച് നില്‍ക്കുകയായിരുന്നു. 

എല്ലാവരെയും ഉള്‍ക്കൊള്ളുന്ന ജനകീയമായ അജണ്ടയുമായി പുതിയ രാഷ്ട്രീയ പ്രസ്ഥാനം ആരംഭിക്കുമെന്ന് ബിജെപി വിട്ടതിന് പിന്നാലെ അണ്ണാമലൈ പറഞ്ഞിരുന്നു. വരാനിരിക്കുന്ന തെരഞ്ഞെടുപ്പില്‍ സജീവമായി ഇടപെടുമെന്നും, ഒരു സാധാരണക്കാരന്‍ രാഷ്ട്രീയത്തിലേക്ക് വരുന്നത് വലിയ കാര്യമാണെന്നും അദ്ദേഹം കൂട്ടിച്ചേര്‍ത്തു. ബിജെപി വിട്ടതോടെ തന്റെ പൊതുജീവിതത്തിന്റെയും രാഷ്ട്രീയ യാത്രയുടെയും അടുത്ത ഘട്ടത്തിനാണ് തുടക്കമാകുന്നതെന്നും പുതിയ രാഷ്ട്രീയ മുന്നേറ്റത്തില്‍ പങ്കാളികളാകാന്‍ അണിനിരക്കണമെന്നും അണ്ണാമലൈ ജനങ്ങളോട് ആഹ്വാനം ചെയ്തു.