അബുദബി: കള്ളപ്പണ മാഫിയക്കെതിരെ കടുത്ത നടപടികളുമായി യുഎഇ. കള്ളപ്പണം വെളുപ്പിക്കൽ, തീവ്രവാദ ധനസഹായം എന്നിവയ്‌ക്കെതിരായ ദേശീയ സമിതി പുറത്തുവിട്ട 2025-ലെ റിപ്പോർട്ടിലാണ് ഞെട്ടിക്കുന്ന ഈ കണക്കുകളുള്ളത്. രാജ്യത്തിന്റെ ശക്തമായ നിയമ പരിഷ്കാരങ്ങളുടെ ഫലമായി 4.23 ബില്യൺ ദിർഹമാണ് (ഏകദേശം 9,600 കോടിയിലധികം ഇന്ത്യൻ രൂപ) യുഎഇ അധികൃതർ ഒറ്റവർഷം കൊണ്ട് കണ്ടുകെട്ടിയത്.

ബാങ്കുകൾക്കും മറ്റ് ധനകാര്യ സ്ഥാപനങ്ങൾക്കും കോടികളുടെ പിഴ

സാമ്പത്തിക കുറ്റകൃത്യങ്ങളിൽ ഏർപ്പെടുന്നവർക്ക് മാത്രമല്ല, അവർക്ക് കൂട്ടുനിൽക്കുന്ന സ്ഥാപനങ്ങൾക്കും യുഎഇ കൃത്യമായ പണി നൽകിയിട്ടുണ്ട്.

ധനകാര്യ സ്ഥാപനങ്ങൾക്ക് വിനയായി പരിശോധന: ബാങ്കുകളിലും വെർച്വൽ അസറ്റ് സേവന ദാതാക്കളിലും (VASP) നടത്തിയ 781 പരിശോധനകളിലൂടെ 384 ദശലക്ഷം ദിർഹം പിഴ ചുമത്തി.

മറ്റ് ബിസിനസ് മേഖലകൾക്കും പിടിവീണു: നോൺ-ഫിനാൻഷ്യൽ ബിസിനസുകളിലും പ്രൊഫഷണലുകളിലും (DNFBPs) 8,900 പരിശോധനകൾ നടത്തി 160.33 ദശലക്ഷം ദിർഹം പിഴ ഈടാക്കി.

സംശയാസ്പദമായ ഇടപാടുകൾ: മുൻ വർഷങ്ങളെ അപേക്ഷിച്ച് സംശയാസ്പദമായ ഇടപാട് റിപ്പോർട്ടുകൾ (STRs) 28% വർദ്ധിച്ച് 80,000 എണ്ണമായി. ഇതിൽ 82 ശതമാനവും ബാങ്കുകൾ വഴിയുള്ളവയായിരുന്നു.

അന്താരാഷ്ട്ര സഹകരണം: വിദേശ രാജ്യങ്ങളിൽ നിന്നുള്ള കുറ്റവാളികളെ കൈമാറാനുള്ള അഭ്യർത്ഥനകളിൽ 25.3% വർദ്ധനവുണ്ടായി (ആകെ 559 അഭ്യർത്ഥനകൾ).

തീവ്രവാദ ധനസഹായം: തീവ്രവാദ ധനസഹായവുമായി ബന്ധപ്പെട്ട 56 പുതിയ അന്വേഷണങ്ങൾ ആരംഭിക്കുകയും 256 സംശയാസ്പദമായ റിപ്പോർട്ടുകൾ കണ്ടെത്തുകയും ചെയ്തു.

"വെല്ലുവിളികൾ മുൻകൂട്ടി കാണാനും സാമ്പത്തിക കുറ്റകൃത്യങ്ങളെ ഫലപ്രദമായി ചെറുക്കാനും കഴിവുള്ള ശക്തമായ മേൽനോട്ട ചട്ടക്കൂടാണ് യുഎഇയിലുള്ളത്. പുതിയ നിയമം രാജ്യത്തിന്റെ സാമ്പത്തിക സുരക്ഷിതത്വം കൂടുതൽ വർദ്ധിപ്പിച്ചു." യുഎഇ സെൻട്രൽ ബാങ്ക് ഗവർണറായ  ഖാലിദ് മുഹമ്മദ് ബാലാമ വ്യക്തമാക്കി.

കള്ളപ്പണം വെളുപ്പിക്കുന്നതിനെതിരെ ആഗോളതലത്തിൽ പ്രവർത്തിക്കുന്ന ഫിനാൻഷ്യൽ ആക്ഷൻ ടാസ്‌ക് ഫോഴ്‌സിന്റെ (FATF) മാനദണ്ഡങ്ങൾ കൃത്യമായി പാലിച്ചാണ് യുഎഇ ഈ നേട്ടം കൈവരിച്ചത്. വരും വർഷങ്ങളിൽ കൂടുതൽ സ്മാർട്ട് നിരീക്ഷണ സംവിധാനങ്ങളിലൂടെ സാമ്പത്തിക കുറ്റകൃത്യങ്ങൾ പൂർണ്ണമായി ഇല്ലാതാക്കാനാണ് യുഎഇ ലക്ഷ്യമിടുന്നത്.

ALSO READ: അശ്രദ്ധമായ ഡ്രൈവിംഗും പെട്ടെന്നുള്ള ലെയ്ൻ മാറ്റവും അപകടങ്ങൾക്ക് കാരണമാകുന്നു; മുന്നറിയിപ്പുമായി അബുദബി പൊലിസ്

The UAE intensified its fight against money laundering, seizing Dh4.23 billion in illicit assets last year as authorities strengthened enforcement measures against financial crimes and illegal networks.