അങ്കാറ: ഇസ്‌റാഈല്‍ പ്രധാനമന്ത്രി ബിന്യമിന്‍ നെതന്യാഹുവിനെതിരെ ആഞ്ഞടിച്ച് തുര്‍ക്കിയ പ്രസിഡന്റ് റജബ് ത്വയ്യിബ് ഉര്‍ദുഗാന്‍. ആധുനിക കാലത്തെ ഹിറ്റ്‌ലര്‍ ആണ് നെതന്യാഹുവെന്ന് അദ്ദേഹം ചൂണ്ടിക്കാട്ടി. രക്തത്തോടുള്ള ആര്‍ത്തിയും വിദ്വേഷവും കൊണ്ട് അന്ധനായിരിക്കുകയാണ് നെതന്യാഹുവെന്നും അദ്ദേഹം തുറന്നടിച്ചു. പാകിസ്താനില്‍ നടന്ന യു.എസ്-ഇറാന്‍ ചര്‍ച്ചകള്‍ പരാജയപ്പെട്ട സാഹചര്യത്തിലാണ് അദ്ദേഹത്തിന്റെ പ്രതികരണം. ഇസ്‌റാഈലില്‍ സൈനിക നടപടിക്ക് തങ്ങള്‍ മടിക്കില്ലെന്ന മുന്നറിയിപ്പും അദ്ദേഹം നല്‍കി. തുര്‍ക്കിയില്‍ നടന്ന രാഷ്ട്രീയ പരിപാടിയില്‍ സംസാരിക്കവെയായിരുന്നു അദ്ദേഹത്തിന്റെ രൂക്ഷ പ്രതികരണം.

ഇസ്‌റാഈലിനെ നിലക്ക് നിര്‍ത്താന്‍ തുര്‍ക്കിക്ക് സാധിക്കും. പാകിസ്താന്‍ മധ്യസ്ഥത വഹിച്ചില്ലായിരുന്നെങ്കില്‍ തുര്‍ക്കി ഇസ്‌റാഈലിനെ നിലക്കുനിര്‍ത്തിയേനെ-ഉര്‍ദുഗാന്‍ പറഞ്ഞു. 

ALSO READ: നെതന്യാഹുവിന്റെ ഫോണ്‍കാള്‍ ഇറാന്‍-യു.എസ് വെടിനിര്‍ത്തല്‍ ചര്‍ച്ചയുടെ ഗതിമാറ്റിയതെങ്ങനെ

'വെടിനിര്‍ത്തല്‍ ദിവസം, ഇസ്‌റാഈല്‍ നൂറുകണക്കിന് നിരപരാധികളായ ലെബനീസ് ജനതയെ കൊന്നു. നെതന്യാഹു രക്തത്താലും വിദ്വേഷത്താലും അന്ധനാണ്. യു.എസും ഇറാനും തമ്മിലുള്ള യുദ്ധത്തില്‍ പാകിസ്ഥാന്‍ മധ്യസ്ഥത വഹിച്ചിരുന്നില്ലെങ്കില്‍, ഇസ്‌റാഈലിന് അതിന്റെ സ്ഥാനം ഞങ്ങള്‍ കാണിച്ചുകൊടുക്കുമായിരുന്നു,'- ഉര്‍ദുഗാന്‍ പറഞ്ഞു. 

'ലിബിയയിലും കരാബാക്കിലും പ്രവേശിച്ചതു പോലെ ഇസ്‌റാഈലിലും നമുക്ക് കടന്നുചെല്ലാം. അത് ചെയ്യാതിരിക്കാന്‍ ഒരു കാരണവുമില്ല. ഇത്തരമൊരു നീക്കത്തിന് രാജ്യത്തിന്റെ കരുത്തും ഐക്യവും അനിവാര്യമാണ്' -അദ്ദേഹം കൂട്ടിച്ചേര്‍ത്തു. സമാധാന കരാറുകള്‍ അട്ടിമറിക്കുന്ന ഇസ്‌റാഈലിന്റെ നയങ്ങള്‍ക്കെതിരെ അന്താരാഷ്ട്ര സമൂഹം ജാഗ്രത പാലിക്കണമെന്നും തുര്‍ക്കിയ ആവശ്യപ്പെട്ടു.

ALSO READ: 'f(f(O))>f(O)' യു.എസിന്റെ ഹോര്‍മുസ് ഉപരോധ ഭീഷണിക്ക് മറുപടിയായി ഇറാന്റെ 'ഗണിതശാസ്ത്ര' താക്കീത്

എന്നാല്‍, ഉര്‍ദുഗാന്റെ പ്രസ്താവനക്കെതിരെ കടുത്ത ഭാഷയിലാണ് ഇസ്‌റാഈല്‍ പ്രധാനമന്ത്രി ബിന്യാമിന്‍ നെതന്യാഹു പ്രതികരിച്ചത്. സ്വന്തം രാജ്യത്തെ കുര്‍ദ് വംശജരെ കൂട്ടക്കൊല ചെയ്യുന്ന ഉര്‍ദുഗാന്‍ തങ്ങളെ പഠിപ്പിക്കേണ്ടതില്ലെന്നായിരുന്നു നെതന്യാഹുവിന്റെ പ്രതികരണം. ഇറാന്‍ സ്‌പോണ്‍സര്‍ ചെയ്യുന്ന ഭീകരവാദത്തെ ഇസ്‌റാഈല്‍ തകര്‍ക്കുമെന്നും നെതന്യാഹു പറഞ്ഞു. പ്രതിരോധ മന്ത്രി ഇസ്രായേല്‍ കാറ്റ്‌സും തുര്‍ക്കിയക്കെതിരെ രൂക്ഷവിമര്‍ശനവുമായി രംഗത്തെത്തിയിട്ടുണ്ട്.

ഇസ്‌ലാമാബാദില്‍ നടന്ന 21 മണിക്കൂര്‍ നീണ്ട യു.എസ്-ഇറാന്‍ ചര്‍ച്ചകള്‍  ഫലപ്രദമായ തീരുമാനങ്ങളൊന്നുമില്ലാതെ പിരിയുകയായിരുന്നു. യു.എസ് വൈസ് പ്രസിഡന്റ് ജെ.ഡി. വാന്‍സിന്റെ നേതൃത്വത്തിലുള്ള പ്രതിനിധി സംഘവും ഇറാന്‍ പ്രതിനിധികളും തമ്മിലായിരുന്നു ചര്‍ച്ച.

Recep Tayyip Erdoğan launched a sharp attack on Benjamin Netanyahu, comparing him to Adolf Hitler and accusing him of extreme aggression.