യൂറോപ്പിനെ ഞെട്ടിച്ചുകൊണ്ട് ഹംഗറിയില്‍ നടന്ന പൊതുതെരഞ്ഞെടുപ്പില്‍ പ്രധാനമന്ത്രി വിക്ടര്‍ ഓര്‍ബന് കനത്ത തിരിച്ചടി. 16 വര്‍ഷമായി രാജ്യം ഭരിച്ചിരുന്ന ഓര്‍ബന്റെ ഫിഡെസ് (Fidsez) പാര്‍ട്ടിയെ പരാജയപ്പെടുത്തിക്കൊണ്ട് പീറ്റര്‍ മഗ്യാറിന്റെ നേതൃത്വത്തിലുള്ള തിസ്സ (Tsiza) പാര്‍ട്ടി അധികാരം പിടിച്ചെടുത്തു. ആധുനിക ഹംഗേറിയന്‍ രാഷ്ട്രീയത്തിലെ ഏറ്റവും വലിയ രാഷ്ട്രീയ മാറ്റമായാണ് ഇത് വിലയിരുത്തപ്പെടുന്നത്.

പീറ്റര്‍ മഗ്യാറിന്റെ ഉദയം: 

മുമ്പ് ഓര്‍ബന്‍ സര്‍ക്കാരിന്റെ ഭാഗമായിരുന്ന പീറ്റര്‍ മഗ്യാര്‍, പിന്നീട് ഭരണകൂടത്തിലെ അഴിമതിക്കും ഏകാധിപത്യ പ്രവണതകള്‍ക്കുമെതിരെ തിരിയുകയായിരുന്നു. വെറും രണ്ടു വര്‍ഷം കൊണ്ട് അദ്ദേഹം രൂപീകരിച്ച തിസ്സ പാര്‍ട്ടി, ഓര്‍ബന്റെ ഭരണത്തില്‍ അതൃപ്തരായ ജനങ്ങളെ ഒന്നിപ്പിക്കുന്നതില്‍ വിജയിച്ചു. 'നമ്മള്‍ ഒരുമിച്ച് ഓര്‍ബന്‍ ഭരണകൂടത്തെ മാറ്റിമറിച്ചു, ഹംഗറിയെ സ്വതന്ത്രമാക്കി,' വിജയത്തിന് പിന്നാലെ അനുയായികളെ അഭിസംബോധന ചെയ്തുകൊണ്ട് മഗ്യാര്‍ പറഞ്ഞു.

വിക്ടര്‍ ഓര്‍ബന്റെ തോല്‍വി സമ്മതം:

 തെരഞ്ഞെടുപ്പ് ഫലം വ്യക്തമായതോടെ വിക്ടര്‍ ഓര്‍ബന്‍ തന്റെ പരാജയം സമ്മതിച്ചു. ഫലം വേദനാജനകമാണെങ്കിലും അത് വ്യക്തമാണെന്ന് അദ്ദേഹം പ്രതികരിച്ചു. 'വിജയിച്ച പാര്‍ട്ടിക്ക് ഞാന്‍ അഭിനന്ദനങ്ങള്‍ നേരുന്നു. പ്രതിപക്ഷത്തിരുന്നും ഹംഗേറിയന്‍ രാഷ്ട്രത്തെ സേവിക്കുന്നത് ഞങ്ങള്‍ തുടരും,' ബുഡാപെസ്റ്റിലെ തന്റെ അനുയായികളോട് ഓര്‍ബന്‍ പറഞ്ഞു. യൂറോപ്യന്‍ യൂണിയനില്‍ ഏറ്റവും കൂടുതല്‍ കാലം അധികാരത്തിലിരുന്ന നേതാക്കളില്‍ ഒരാളായിരുന്നു അദ്ദേഹം.

പീറ്റര്‍ മഗ്യാറിന്റെ ഭൂരിപക്ഷവും ഭാവിയും: 

പ്രാഥമിക കണക്കുകള്‍ പ്രകാരം പീറ്റര്‍ മഗ്യാറിന്റെ പാര്‍ട്ടിക്ക് പാര്‍ലമെന്റില്‍ മൂന്നില്‍ രണ്ട് ഭൂരിപക്ഷം (Supermajortiy) ലഭിക്കാനാണ് സാധ്യത. ഇത് ഭരണഘടനയില്‍ മാറ്റങ്ങള്‍ വരുത്താനും ഓര്‍ബന്‍ കൊണ്ടുവന്ന പല വിവാദ നിയമങ്ങളും റദ്ദാക്കാനും മഗ്യാറിന് വഴിയൊരുക്കും. 199 അംഗ പാര്‍ലമെന്റില്‍ തിസ്സ പാര്‍ട്ടി 138 സീറ്റുകള്‍ വരെ നേടുമെന്നാണ് റിപ്പോര്‍ട്ടുകള്‍.

ഹംഗറിയെ യൂറോപ്പിന്റെ മുഖ്യധാരയിലേക്ക് തിരികെ കൊണ്ടുവരുമെന്നും, റഷ്യയുമായുള്ള അമിത ബന്ധം അവസാനിപ്പിക്കുമെന്നും മഗ്യാര്‍ വാഗ്ദാനം ചെയ്തിട്ടുണ്ട്. യൂറോപ്യന്‍ യൂണിയനും ഈ മാറ്റത്തെ ജനാധിപത്യത്തിന്റെ തിരിച്ചുവരവായി സ്വാഗതം ചെയ്തു.

In a major political shift in Hungary, Peter Magyar has emerged as a key figure in ending the 16-year rule of Viktor Orbán. The development marks a significant turning point in the country’s political landscape, signaling potential changes in governance and policy direction. The outcome has drawn international attention as Hungary enters a new political phase after over a decade of Orbán’s leadership.