മനാമ: സോഷ്യല്‍ മീഡിയ പ്ലാറ്റ്‌ഫോമുകളിലൂടെ കൃത്രിമ ബുദ്ധി സാങ്കേതികവിദ്യ ദുരുപയോഗം ചെയ്യുന്ന പ്രവണത വര്‍ധിക്കുന്ന സാഹചര്യത്തില്‍ ബഹ്‌റൈനില്‍ സുരക്ഷാ ഏജന്‍സികളുടെ മുന്നറിയിപ്പ്. വ്യക്തികളുടെ ചിത്രങ്ങളും വീഡിയോകളും അനുമതിയില്ലാതെ മാറ്റം വരുത്തി പ്രചരിപ്പിക്കുന്നതും വ്യാജ ഉള്ളടക്കങ്ങള്‍ നിര്‍മിച്ച് സോഷ്യല്‍ മീഡിയയില്‍ പങ്കുവെക്കുന്നതും ഗുരുതര നിയമലംഘനമാണെന്ന് അധികൃതര്‍ വ്യക്തമാക്കി.

ആന്റി കറപ്ഷന്‍, ഇക്കണോമിക് ആന്‍ഡ് ഇലക്ട്രോണിക് സെക്യൂരിറ്റി ജനറല്‍ ഡയറക്ടറേറ്റാണ് ഇതുസംബന്ധിച്ച മുന്നറിയിപ്പ് പുറത്തിറക്കിയത്. എ.ഐ അധിഷ്ഠിത സാങ്കേതികവിദ്യകളുടെ ഉപയോഗം ലോകമെമ്പാടും വ്യാപകമാകുന്നതിനൊപ്പം അതിന്റെ ദുരുപയോഗവും വര്‍ധിച്ചുവരുന്നതായാണ് അധികൃതര്‍ ചൂണ്ടിക്കാട്ടുന്നത്. പ്രത്യേകിച്ച് യഥാര്‍ഥമല്ലാത്ത ചിത്രങ്ങളും വീഡിയോകളും സൃഷ്ടിച്ച് ആളുകളെ തെറ്റിദ്ധരിപ്പിക്കുന്ന സംഭവങ്ങള്‍ കൂടുതലായി റിപ്പോര്‍ട്ട് ചെയ്യപ്പെടുന്നുണ്ടെന്നാണ് വിലയിരുത്തല്‍.

സോഷ്യല്‍ മീഡിയയില്‍ ചില നിമിഷങ്ങള്‍ക്കുള്ളില്‍ തന്നെ ഉള്ളടക്കങ്ങള്‍ വ്യാപകമായി പ്രചരിക്കുന്ന സാഹചര്യത്തില്‍ വ്യാജ ദൃശ്യങ്ങള്‍ സമൂഹത്തില്‍ വലിയ ആശയക്കുഴപ്പത്തിനും അപകീര്‍ത്തിക്കും ഇടയാക്കാമെന്നാണ് മുന്നറിയിപ്പ്. വ്യക്തികളുടെ മാന്യതയെ ബാധിക്കുന്ന രീതിയില്‍ ചിത്രങ്ങള്‍ തിരുത്തുകയോ ശബ്ദം മാറ്റിമറിച്ചുള്ള വീഡിയോകള്‍ പ്രചരിപ്പിക്കുകയോ ചെയ്യുന്നത് സൈബര്‍ കുറ്റകൃത്യ പരിധിയില്‍പ്പെടുമെന്നും അധികൃതര്‍ വ്യക്തമാക്കി.

ALSO READ: ബഹ്‌റൈന്‍ ആകാശത്ത് അപൂര്‍വ കാഴ്ച; നാളെ 'ബ്ലൂ മൈക്രോ മൂണ്‍' ദൃശ്യമാകും

ഡീപ്‌ഫേക്ക് സാങ്കേതികവിദ്യയുടെ വ്യാപനവും സുരക്ഷാ ഏജന്‍സികളെ ആശങ്കപ്പെടുത്തുന്നുണ്ട്. എ.ഐ ഉപയോഗിച്ച് ഒരാളുടെ മുഖഭാവവും ശബ്ദവും അതീവ യാഥാര്‍ഥ്യത്തോടെ പകര്‍ത്തി വ്യാജ വീഡിയോകള്‍ നിര്‍മിക്കാന്‍ കഴിയുന്ന സാഹചര്യം നിലവിലുണ്ടെന്ന് സൈബര്‍ സുരക്ഷാ വിദഗ്ധര്‍ ചൂണ്ടിക്കാട്ടുന്നു. ഇത്തരത്തിലുള്ള ഉള്ളടക്കങ്ങള്‍ ആളുകളെ അപമാനിക്കാനും വ്യാജ പ്രചാരണങ്ങള്‍ക്കും തട്ടിപ്പുകള്‍ക്കുമായി ഉപയോഗിക്കപ്പെടാനുള്ള സാധ്യത കൂടുതലാണെന്നും മുന്നറിയിപ്പിലുണ്ട്.

സോഷ്യല്‍ മീഡിയ ഉപയോക്താക്കള്‍ പുതിയ എ.ഐ ആപ്പുകളും ഫില്‍ട്ടറുകളും ഉപയോഗിക്കുമ്പോള്‍ കൂടുതല്‍ ശ്രദ്ധ പുലര്‍ത്തണമെന്നും അധികൃതര്‍ നിര്‍ദേശിച്ചു. വ്യക്തിപരമായ ചിത്രങ്ങളും വിവരങ്ങളും പരിചയമില്ലാത്ത പ്ലാറ്റ്‌ഫോമുകളില്‍ അപ്‌ലോഡ് ചെയ്യുന്നത് സുരക്ഷാ പ്രശ്‌നങ്ങള്‍ക്ക് കാരണമാകാമെന്നാണ് മുന്നറിയിപ്പ്. വ്യാജ ഉള്ളടക്കങ്ങള്‍ തിരിച്ചറിയാന്‍ പൊതുജനങ്ങള്‍ ജാഗ്രത പാലിക്കണമെന്നും സംശയാസ്പദമായ പോസ്റ്റുകള്‍ ശ്രദ്ധയില്‍പെട്ടാല്‍ ബന്ധപ്പെട്ട ഏജന്‍സികളെ അറിയിക്കണമെന്നും നിര്‍ദേശമുണ്ട്.

നിയമലംഘനങ്ങള്‍ക്കെതിരെ കര്‍ശന നടപടികള്‍ സ്വീകരിക്കുമെന്നും അധികൃതര്‍ വ്യക്തമാക്കി. സാങ്കേതികവിദ്യയുടെ പുരോഗതി സമൂഹത്തിന്റെ നന്മയ്ക്കായി ഉപയോഗിക്കേണ്ടതാണെന്നും മറ്റുള്ളവരുടെ സ്വകാര്യതയെയും മാന്യതയെയും ബാധിക്കുന്ന രീതിയിലുള്ള ഉപയോഗം അനുവദിക്കില്ലെന്നും സുരക്ഷാ ഏജന്‍സികള്‍ ആവര്‍ത്തിച്ചു.

Bahrain authorities warm social media users against sharing fake AI-generated images and videos, stressing that misuse of artificial intelligence and deepfake technology is a serious cyber crime