ആലപ്പുഴ: തുറവൂർ താലൂക്ക് ആശുപത്രിയിലെ മരുന്ന് ഗോഡൗണിലുണ്ടായ തീപിടിത്തം അണയ്ക്കാൻ പാഞ്ഞെത്തിയ അഗ്നിരക്ഷാ സേനയുടെ വഴിമുടക്കിയ കാറുടമയ്‌ക്കെതിരെ കർശന നടപടി. കുത്തിയതോട് കോടന്തുരുത്ത് സ്വദേശി സുജിത്തിനെതിരെ പട്ടണക്കാട് പൊലിസ് കേസെടുത്തു. ഇയാളുടെ ലൈസൻസ് മോട്ടോർ വാഹന വകുപ്പ് സസ്‌പെൻഡ് ചെയ്യുകയും കാർ കസ്റ്റഡിയിലെടുക്കുകയും ചെയ്തു.

സംഭവം ഇങ്ങനെ

ചൊവ്വാഴ്ച രാവിലെ പൊന്നാംവെളിയിൽ വെച്ചായിരുന്നു കേസിനാസ്പദമായ സംഭവം നടന്നത്. ആശുപത്രിയിലെ മരുന്ന് ഗോഡൗണിൽ തീ പടരുന്നത് അണയ്ക്കാൻ സൈറൺ മുഴക്കി കുതിക്കുകയായിരുന്നു ഫയർ ഫോഴ്‌സ് യൂണിറ്റ്. എന്നാൽ, അഗ്നിരക്ഷാ സേനയുടെ വാഹനത്തിന് വഴി നൽകാതെ ഏറെ ദൂരം സുജിത്ത് തന്റെ KL 32 V 7934 നമ്പറിലുള്ള കാർ മുന്നോട്ട് ഓടിക്കുകയായിരുന്നു.

നടപടികൾ കടുപ്പിച്ച് അധികൃതർ

സംഭവത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് അധികൃതർ ഉണർന്നു പ്രവർത്തിച്ചത്.ഔദ്യോഗിക കൃത്യനിർവ്വഹണം തടസ്സപ്പെടുത്തിയതിനും അപകടകരമായ രീതിയിൽ വാഹനമോടിച്ചതിനും സുജിത്തിനെതിരെ കേസെടുത്തു.അഗ്നിരക്ഷാ സേനയുടെ വഴി തടസ്സപ്പെടുത്തിയത് ഗുരുതര കുറ്റമായി കണക്കാക്കി ഡ്രൈവിങ് ലൈസൻസ് റദ്ദാക്കുകയും,നിയമലംഘനത്തിന് ഉപയോഗിച്ച കാർ പൊലിസ് പിടിച്ചെടുത്തു."ഓരോ സെക്കൻഡും വിലപ്പെട്ട രക്ഷാപ്രവർത്തന സമയത്ത് ഇത്തരം നിരുത്തരവാദപരമായ പെരുമാറ്റങ്ങൾ അനുവദിക്കാനാകില്ല. ഇത് മറ്റുള്ളവർക്ക് ഒരു പാഠമാകണം"അധികൃതർ വ്യക്തമാക്കി.

രക്ഷാപ്രവർത്തനത്തിനായി പോകുന്ന ആംബുലൻസ്, ഫയർ ഫോഴ്‌സ് തുടങ്ങിയ അടിയന്തര വാഹനങ്ങൾക്ക് വഴി നൽകാത്തവർക്കെതിരെ വിട്ടുവീഴ്ചയില്ലാത്ത നടപടി തുടരുമെന്നും അധികൃതർ മുന്നറിയിപ്പ് നൽകി.