ദുബൈ: യുഎഇയിലെ സ്കൂൾ ബസ് സർവീസുകൾ താൽക്കാലികമായി നിർത്തിവെക്കാനുള്ള വിദ്യാഭ്യാസ മന്ത്രാലയത്തിന്റെ (MoE) തീരുമാനത്തെത്തുടർന്ന് രക്ഷിതാക്കൾ പ്രതിസന്ധിയിൽ. ഏപ്രിൽ 20 തിങ്കളാഴ്ച മുതൽ സ്കൂളുകളിൽ നേരിട്ടുള്ള ക്ലാസുകൾ പുനരാരംഭിക്കാനിരിക്കെ, ബസ് സർവീസുകൾ ഇല്ലാത്തത് ജോലിക്ക് പോകുന്ന ദമ്പതികൾക്കും മറ്റും വലിയ ബുദ്ധിമുട്ടാണ് സൃഷ്ടിക്കുന്നത്. ഇതോടെ ഓൺലൈൻ പഠനം തുടരുന്നതും ടാക്സികളെ ആശ്രയിക്കുന്നതും ഉൾപ്പെടെയുള്ള ബദൽ ക്രമീകരണങ്ങളിലേക്ക് കുടുംബങ്ങൾ നീങ്ങുകയാണ്.

ഒരു മാസത്തിലധികം നീണ്ട ഓൺലൈൻ ക്ലാസുകൾക്ക് ശേഷം നേരിട്ടുള്ള പഠനത്തിലേക്ക് മാറാൻ മന്ത്രാലയം അനുമതി നൽകിയിരുന്നു. എന്നാൽ ബസ് സർവീസുകൾ ഉടൻ പുനരാരംഭിക്കില്ലെന്ന അറിയിപ്പ് വന്നതോടെ പലരും തങ്ങളുടെ തീരുമാനങ്ങളിൽ മാറ്റം വരുത്തി.

കുട്ടികളെ സ്കൂളിൽ എത്തിക്കാൻ മറ്റ് മാർഗ്ഗങ്ങളില്ലാത്തതിനാൽ പല രക്ഷിതാക്കളും തൽക്കാലം ഓൺലൈൻ പഠനം തന്നെ മതിയെന്ന് തീരുമാനിച്ചിരിക്കുകയാണ്. "സ്കൂൾ ട്രാൻസ്പോർട്ട് ഇല്ലാത്ത സാഹചര്യത്തിൽ മകനെ വീട്ടിലിരുത്തി പഠിപ്പിക്കാനാണ് തീരുമാനം," ദുബൈയിൽ താമസിക്കുന്ന മറീന പോൾ പറഞ്ഞു.

ALSO READ: ദുബൈയിൽ എയർ ടാക്സി ഉടൻ; ലോകത്തിലെ ആദ്യ വെർട്ടിപോർട്ട് സന്ദർശിച്ച് ശൈഖ് ഹംദാൻ

ചില രക്ഷിതാക്കൾ കുട്ടികളെ സ്കൂളിലെത്തിക്കാൻ ടാക്സി സർവീസുകളെ ആശ്രയിക്കാൻ ആലോചിക്കുന്നുണ്ട്. സ്വന്തം വാഹനങ്ങളിൽ കൊണ്ടുപോകുന്നതിനേക്കാൾ ഇന്ധനച്ചെലവും പാർക്കിംഗ് ഫീസും ലാഭിക്കാൻ ടാക്സികൾ സഹായിക്കുമെന്ന് അബുദബിയിലെ മറിയം എന്ന രക്ഷിതാവ് അഭിപ്രായപ്പെട്ടു.

മുതിർന്ന കുട്ടികൾ സ്കൂളിൽ പോകാൻ പൊതുബസുകളെ ആശ്രയിക്കുമ്പോൾ, ചെറിയ കുട്ടികളുടെ കാര്യത്തിലാണ് രക്ഷിതാക്കൾ കൂടുതൽ ആശങ്കാകുലരാകുന്നത്.

വിദ്യാർത്ഥികൾ നേരിട്ടുള്ള ക്ലാസുകളിലേക്ക് മടങ്ങുമ്പോൾ ഉണ്ടാകുന്ന പ്രായോഗിക ബുദ്ധിമുട്ടുകൾ പരിഗണിച്ച്, ഓരോ സ്കൂളും സാഹചര്യത്തിനനുസരിച്ച് രക്ഷിതാക്കൾക്ക് ആവശ്യമായ വിട്ടുവീഴ്ചകൾ (Flexibility) നൽകണമെന്ന് വിദ്യാഭ്യാസ മന്ത്രാലയം നിർദ്ദേശിച്ചിട്ടുണ്ട്. ബസ് സർവീസുകൾ പുനരാരംഭിക്കുന്ന കാര്യം ആഴ്ചതോറുമുള്ള അവലോകനത്തിന് ശേഷം മാത്രമേ തീരുമാനിക്കൂ.

school bus services have been suspended in parts of the uae, leaving parents searching for alternative transport solutions. the situation raises concerns over student safety and daily commuting challenges.