കോഴിക്കോട്: ചരിത്ര പ്രസിദ്ധമായ കുറ്റിച്ചിറ മിശ്കാൽ പള്ളിയിൽ മുഖ്യഖാസിയായി സയ്യിദ് മുഹമ്മദ് കോയ ജമലുല്ലൈലി തങ്ങൾ ‍സ്ഥാനമേറ്റെടുത്തു. കുറ്റിച്ചിറ മിശ്കാൽ പള്ളി അങ്കണത്തിൽ പരമ്പരാഗത രീതിയിൽ നടന്ന പ്രൗഢമായ ചടങ്ങിലായിരുന്നു സ്ഥാനാരോഹണം. പാണക്കാട് സയ്യിദ് സാദിഖലി ശിഹാബ് തങ്ങൾ ചടങ്ങ് ഉദ്ഘാടനം ചെയ്തു. കോഴിക്കോട്ടെ ഖാസിമാർ ആത്മീയ ജീവിതത്തിന്റെ അടയാളങ്ങളാണെന്ന് അദ്ദേഹം പറഞ്ഞു. 

ഏറ്റെടുത്ത ദൗത്യം ജീവിതകാലമത്രയും ഉത്തരവാദിത്തോടെ നിർവഹിക്കാൻ ശ്രമിക്കുമെന്നും ഇതിനായി എല്ലാവരുടെയും പിന്തുണ ഉണ്ടാവണമെന്നും സയ്യിദ് മുഹമ്മദ് കോയ തങ്ങൾ ജമലുല്ലൈലി മറുപടിപ്രസംഗത്തിൽ പറഞ്ഞു. പ്രതിസന്ധി നിറഞ്ഞ കാലഘട്ടത്തിൽ മതത്തിന്റെ സന്ദേശങ്ങളും വിധിവിലക്കുകളും സമൂഹത്തിൽ എത്തിക്കുകയെന്ന ഭാരിച്ച ചുമതലയാണ് ഏറ്റെടുത്തത്. അല്ലാഹുവിന്റെ നിയോഗങ്ങളെ ആർക്കും തടയാനാവില്ല. നമ്മുടെ ജീവിതം എങ്ങനെയെന്ന് നേരത്തെ നിശ്ചയിച്ചുവച്ചിട്ടുണ്ട്. ആ നിശ്ചയപ്രകാരമാണ് ഈ പദവിയിലേക്ക് താൻ എത്തിയത്. ദീൻ എങ്ങനെ നിർവഹിക്കപ്പെടണമെന്ന് വളരെ ശ്രദ്ധാപൂർവം ചെയ്യേണ്ട കാര്യമാണ്. ഇക്കാര്യത്തിൽ എല്ലാവരുടെയും സഹകരണം അഭ്യർഥിക്കുന്നതായും ജമലുല്ലൈലി തങ്ങൾ പറഞ്ഞു.