ചെന്നൈ: തമിഴ്‌നാട്ടിലെ വിരുദുനഗറിലെ പടക്ക നിര്‍മാണശാലയില്‍ വീണ്ടും സ്‌ഫോടനം. വനജ ഫയര്‍ വര്‍ക്‌സില്‍ ആദ്യം സ്‌ഫോടനമുണ്ടായ സ്ഥലത്ത് രക്ഷാപ്രവര്‍ത്തനം നടത്തുന്നതിനിടയിലണ് വീണ്ടും സ്‌ഫോടനമുണ്ടായത്. അപകടത്തില്‍ പൊലിസുകാരടക്കം 15 പേര്‍ക്ക് പരിക്കേറ്റു. ഇവരെ വിരുദുനഗര്‍ സര്‍ക്കാര്‍ ആശുപത്രിയില്‍ പ്രവേശിപ്പിച്ചു. 

ഇന്ന് ഉച്ചയോടെയാണ് സ്ഥലത്ത് ആദ്യ സ്‌ഫോടനമുണ്ടായത്. അപകടത്തില്‍ ഇതുവരെ 23 പേര്‍ മരിച്ചതായാണ് റിപ്പോര്‍ട്ട്. ആറുപേര്‍ ഗുരുതര പരിക്കുകളോടെ ആശുപത്രിയില്‍ ചികിത്സയിലാണ്. വി മുത്തുലിംഗപുരം ഗ്രാമത്തില്‍ പ്രവര്‍ത്തിക്കുന്ന വനജ ഫയര്‍ വര്‍ക്‌സ് എന്ന സ്ഥാപനത്തിലാണ് നാടിനെ നടുക്കിയ ദുരന്തമുണ്ടായത്. വെടിമരുന്ന് സൂക്ഷിച്ചിരുന്ന മുറിയില്‍ തൊഴിലാളികള്‍ ജോലി ചെയ്തുകൊണ്ടിരിക്കെ രാസവസ്തുക്കളുടെ മിശ്രിതത്തിലുണ്ടായ ഉരസല്‍ കാരണമാണ് സ്‌ഫോടനമുണ്ടായതെന്നാണ് പ്രാഥമിക വിവരം. 

കെട്ടിടാവശിഷ്ടങ്ങള്‍ക്കിടയില്‍ കൂടുതല്‍ പേര്‍ കുടുങ്ങിക്കിടക്കുന്നുണ്ടോ എന്ന് പരിശോധിക്കാന്‍ ജെസിബി യന്ത്രങ്ങള്‍ ഉപയോഗിച്ച് പരിശോധന പുരോഗമിക്കുകയാണ്. ദുരന്തത്തില്‍ അന്വേഷണത്തിനായി നാല് പൊലിസ് സംഘങ്ങളെ നിയോഗിച്ചതായി എസ്.പി അറിയിച്ചു.

ALSO READ: ഇടുക്കിയിൽ വിവാഹസംഘം സഞ്ചരിച്ച ജീപ്പ് കൊക്കയിലേക്ക് മറിഞ്ഞ് അപകടം; രണ്ടു മരണം; മൂന്ന് പേർക്ക് ഗുരുതര പരുക്ക്