ലഖ്‌നൗ: ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിനായി ഏറ്റവും കൂടുതൽ വിക്കറ്റുകൾ നേടുന്ന ബൗളറെന്ന റെക്കോർഡ് ഇനി ജോഫ്ര ആർച്ചറുടെ പേരിൽ. ലഖ്‌നൗവിലെ ഏകാന സ്റ്റേഡിയത്തിൽ നടന്ന മത്സരത്തിൽ ലഖ്‌നൗ സൂപ്പർ ജയന്റ്‌സിനെതിരെ നടത്തിയ തകർപ്പൻ പ്രകടനമാണ് ആർച്ചറെ റെക്കോർഡ് ബുക്കിൽ ഒന്നാമതെത്തിച്ചത്.

ചാഹലിന്റെ റെക്കോർഡ് തകർന്നു

മത്സരത്തിന് മുൻപ് 66 വിക്കറ്റുകളുമായി യുസ്‌വേന്ദ്ര ചാഹലായിരുന്നു രാജസ്ഥാൻ നിരയിൽ ഒന്നാമത്. എന്നാൽ ലഖ്‌നൗവിനെതിരെ നാല് ഓവറിൽ വെറും 20 റൺസ് മാത്രം വഴങ്ങി മൂന്ന് വിക്കറ്റുകൾ വീഴ്ത്തിയതോടെ ആർച്ചറുടെ ആകെ വിക്കറ്റ് സമ്പാദ്യം 68 ആയി ഉയർന്നു.18-ാം ഓവറിലെ മൂന്നാം പന്തിൽ മായങ്ക് യാദവിനെ പുറത്താക്കിയതോടെയാണ് ചാഹലിന്റെ 66 വിക്കറ്റുകളെന്ന നേട്ടം ആർച്ചർ മറികടന്നത്.ഐഡൻ മാർക്രാമിനെ പൂജ്യത്തിന് പുറത്താക്കിയാണ് ആർച്ചർ വിക്കറ്റ് വേട്ട തുടങ്ങിയത്.

Good morning from ouRR highest wicket-taker 😂🥳 pic.twitter.com/saLwHXE9vF

— Rajasthan Royals (@rajasthanroyals) April 23, 2026

 ഷെയ്ൻ വാട്‌സനെയും പിന്നിലാക്കി

ഐപിഎല്ലിലും ചാമ്പ്യൻസ് ലീഗ് ടി20യിലുമായി രാജസ്ഥാന് വേണ്ടി ആകെ 67 വിക്കറ്റുകൾ നേടിയ ഓസീസ് ഇതിഹാസം ഷെയ്ൻ വാട്‌സന്റെ റെക്കോർഡും ആർച്ചർ തിരുത്തിക്കുറിച്ചു. ടി20 ക്രിക്കറ്റിൽ രാജസ്ഥാൻ ജേഴ്സിയിൽ ഏറ്റവും കൂടുതൽ വിക്കറ്റുകൾ (68) നേടിയ ബൗളറും ഇപ്പോൾ ആർച്ചറാണ്.

മടങ്ങിവരവിലെ വിശ്വരൂപം

2018 മുതൽ 2021 വരെ രാജസ്ഥാന്റെ ഭാഗമായിരുന്ന ആർച്ചർ പിന്നീട് മുംബൈ ഇന്ത്യൻസിലേക്ക് മാറിയിരുന്നു. എന്നാൽ 2025 മെഗാ ലേലത്തിലൂടെ രാജസ്ഥാൻ താരത്തെ വീണ്ടും ടീമിലെത്തിക്കുകയായിരുന്നു. റിയാൻ പരാഗ് നയിക്കുന്ന രാജസ്ഥാൻ നിരയിലെ കുന്തമുനയായി താൻ ഇപ്പോഴും തുടരുന്നുവെന്ന് ആർച്ചർ ഈ പ്രകടനത്തിലൂടെ തെളിയിച്ചു.

തന്റെ പഴയ തട്ടകത്തിലേക്ക് മടങ്ങിയെത്തിയ ആർച്ചർ വിക്കറ്റ് വേട്ടയിൽ ഒന്നാമതെത്തിയത് രാജസ്ഥാൻ ആരാധകർക്ക് ഇരട്ടി മധുരമാണ് നൽകുന്നത്. ഈ സീസണിൽ മികച്ച ഫോമിലുള്ള ആർച്ചറുടെ സാന്നിധ്യം ടീമിന്റെ കിരീട പ്രതീക്ഷകൾക്ക് വലിയ കരുത്ത് പകരുന്നതാണ്.