തിരുവനന്തപുരം: ബി.ജെ.പിയുടെ വട്ടിയൂര്‍ക്കാവ് പൊലിസ് സ്റ്റേഷന്‍ മാര്‍ച്ച് സംഘര്‍ഷവുമായി ബന്ധപ്പെട്ട കേസില്‍ മുന്‍ ഡി.ജി.പിയും ശാസ്തമംഗലം വാര്‍ഡ് കൗണ്‍സിലറുമായ ആര്‍ ശ്രീലേഖയെ പ്രതിചേര്‍ത്തു. സംധര്‍ഷം നടന്ന സമരം ഉദ്ഘാടനം ചെയ്തത് ശ്രീലേഖയായിരുന്നു. ഡെപ്യൂട്ടി മേയര്‍ ആശാനാഥിനെയും പ്രതിചേര്‍ത്തിട്ടുണ്ട്. ശ്രീലേഖ അഞ്ചാം പ്രതിയും ആശാനാഥ് ആറാം പ്രതിയുമാണ്. 

സംഭവവുമായി ബന്ധപ്പെട്ട് അഞ്ച് കൗണ്‍സിലര്‍മാര്‍ക്കെതിരെ നേരത്തെ കേസെടുത്തിരുന്നു. ശ്രീലേഖയെ ഒഴിവാക്കിയതിനെതിരെ വി. കെ പ്രശാന്ത് എം.എല്‍.എ കമ്മിഷണര്‍ക്കെതിരെ ഗുരുതര ആരോപണം ഉന്നയിച്ചിരുന്നു.

നെട്ടയത്ത് കഴിഞ്ഞ ദിവസമുണ്ടായ ബി.ജെ.പിസി.പി.എം സംഘര്‍ഷത്തില്‍ അറസ്റ്റിലായ ബി.ജെ.പി പ്രവര്‍ത്തകരെ മര്‍ദിച്ച പൊലിസ് ഉദ്യോഗസ്ഥര്‍ക്കെതിരെ നടപടി വേണമെന്നാവശ്യപ്പെട്ടാണ് പ്രതിഷേധം സംഘടിപ്പിച്ചത്.പ്രതിഷേധത്തിനിടെയാണ് ശ്രീലേഖ പൊലിസുകാര്‍ക്കെതിരെ മുദ്രാവാക്യം വിളിച്ചത്. 'പോടാ പുല്ലേ പൊലീസേ, കാക്കിയിട്ടൊരു ഗുണ്ടകളേ..പിണറായിയുടെ തെമ്മാടികളേ, ഞങ്ങളിലൊന്നിനെ തൊട്ടെന്നാല്‍ ഇവിടൊരു പുല്ലും നടക്കൂല. കാക്കിക്കുള്ളില്‍ പൊലീസെങ്കില്‍ നിയമം ഞങ്ങള്‍ പാലിക്കും. കാക്കിക്കുള്ളില്‍ സിപിഎം എങ്കില്‍ പോടാ പുല്ലേ പൊലീസേ. പിണറായിയുടെ പൊലീസേ ഗോ ബാക്ക്'... ഇങ്ങനെ പോകുന്നു മുദ്രാവാക്യം. മഴനനഞ്ഞുകൊണ്ടാണ് ശ്രീലേഖയും സംഘവും മുദ്രാവാക്യം വിളിച്ചത്.

അതേസമയം,പ്രതിഷേധത്തിനിടെ പൊലിസുകാരെ പോടാ പുല്ലേയെന്ന് വിളിച്ചതിന് മറുപടിയുമായി ശ്രീലേഖ രംഗത്തെത്തിയിരുന്നു . സര്‍വിസില്‍ ഇരുന്നപ്പോഴും പോടാ പുല്ലേയെന്ന് വിളിച്ചിട്ടുണ്ടെന്ന് ശ്രീലേഖ പറഞ്ഞു. ഗുരുതര തെറ്റുകള്‍ ചെയ്യുന്ന പൊലിസുകാരെ സര്‍വിസില്‍ നിന്ന് സസ്‌പെന്‍ഡ് ചെയ്തിട്ടുണ്ട്. ചിലരെ ഡിസ്മിസ് ചെയ്തിട്ടുമുണ്ട്. അന്നൊന്നും ആരും എനിക്കെതിരേ ഒന്നും പറഞ്ഞിട്ടില്ല. എന്നിട്ടാണോ വിരമിച്ച ശേഷം ഇങ്ങനെ തെറ്റുകള്‍ ചെയ്തുകൂട്ടുന്ന ഒരുത്തനെ 'പോടാ' എന്ന് വിളിച്ചതില്‍ ഇവരൊക്കെ തെറ്റ് കാണുന്നതെന്നും ശ്രീലേഖ ഫേസ്ബുക്കില്‍ കുറിച്ചു.

The Kerala Police have registered a case against former DGP R. Sreelekha and Thiruvananthapuram Deputy Mayor P.K. Raju in connection with the BJP's protest march to the Vattiyoorkavu Police Station.