ചവറ: വീട്ടുകാര്‍ കള്ളനെ ഭയന്ന് പാഠപുസ്തകത്തിനുള്ളില്‍ ഒളിപ്പിച്ചുവച്ച ആറ് പവന്‍ സ്വര്‍ണാഭരണങ്ങള്‍ അബദ്ധത്തില്‍ ആക്രിക്കടയിലെത്തി. കൊല്ലം തേവലക്കര പാലയ്ക്കല്‍ സ്വദേശി ഉമ്മര്‍കുട്ടി വിറ്റ പഴയ പുസ്തകങ്ങള്‍ക്കിടയിലാണ് സ്വര്‍ണ്ണമുണ്ടായിരുന്നത്. ഒടുവില്‍ ആക്രിക്കടയിലെ ടണ്‍കണക്കിന് സാധനങ്ങള്‍ക്കിടയില്‍ നടത്തിയ കഠിനമായ തിരച്ചിലിനൊടുവില്‍ ഭൂരിഭാഗം സ്വര്‍ണ്ണവും തിരികെ ലഭിച്ചു.

കഴിഞ്ഞ 21ാം തിയതിയാണ് ഉമ്മര്‍കുട്ടി വീട്ടിലെ പഴയ സാധനങ്ങളും പുസ്തകങ്ങളും പെട്ടി ഓട്ടോയില്‍ കയറ്റി കുന്നേല്‍ ജങ്ഷനിലെ ആക്രിക്കടയില്‍ വിറ്റത്. രണ്ടുദിവസം കഴിഞ്ഞ് വീട്ടുകാര്‍ സ്വര്‍ണ്ണം അന്വേഷിച്ചപ്പോഴാണ് അത് പുസ്തകത്തിനുള്ളിലായിരുന്നു എന്ന കാര്യം ഓര്‍ത്തത്. ഉടന്‍ തന്നെ കടയിലെത്തിയെങ്കിലും അപ്പോഴേക്കും പുസ്തകങ്ങള്‍ മറ്റ് ആക്രി സാധനങ്ങള്‍ക്കൊപ്പം കലര്‍ന്നിരുന്നു.

 ALSO READ: കൈക്കൂലിപ്പണം എലി വിഴുങ്ങി; വിശ്വസിക്കാനാവാതെ സുപ്രിംകോടതി; ഉദ്യോഗസ്ഥയ്ക്ക് ജാമ്യം

വീട്ടുകാരും കടയിലെ അഞ്ച് തൊഴിലാളികളും ചേര്‍ന്ന് ആക്രിക്കൂമ്പാരത്തിനിടയില്‍ നടത്തിയ പരിശോധനയിലാണ് കമ്മല്‍, വള, മോതിരം എന്നിവ ആദ്യം ലഭിച്ചത്. പിറ്റേന്ന് നടത്തിയ തിരച്ചിലില്‍ മാലയും കണ്ടെത്തി. തിരച്ചിലിനിടയില്‍ രണ്ട് തൊഴിലാളികള്‍ക്ക് സൂര്യതാപമേല്‍ക്കുകയും ചെയ്തു. ആകെയുള്ള ആറ് പവനില്‍ നാല് ഗ്രാം ഒഴികെയുള്ള സ്വര്‍ണ്ണമാണ് തിരികെ ലഭിച്ചത്. കണ്ടെടുത്ത സ്വര്‍ണം തെക്കുംഭാഗം പൊലിസ് സ്റ്റേഷനില്‍ വച്ച് ഉടമയ്ക്ക് കൈമാറി.

Six sovereigns of gold, hidden inside textbooks to prevent theft, were accidentally sold to a scrap shop in Kollam, but were miraculously recovered after an extensive two-day search through piles of scrap.