ശിവ്പുരി: ഉഷ്ണതരംഗവും കഠിനമായ ചൂടും രാജ്യമെങ്ങും പടരുമ്പോള്‍ വേറിട്ടൊരു പ്രതിരോധ മാര്‍ഗവുമായി കേന്ദ്രമന്ത്രി ജ്യോതിരാദിത്യ സിന്ധ്യ. എത്ര കടുത്ത ചൂടിലും താന്‍ എസി ഉപയോഗിക്കാറില്ലെന്നും ചൂടിനെ മറികടക്കാന്‍ ഒരു ഉള്ളി (സവാള) കൈയില്‍ കരുതുകയാണ് തന്റെ രീതിയെന്നും മന്ത്രി വെളിപ്പെടുത്തി. മധ്യപ്രദേശിലെ ശിവ്പുരിയില്‍ നടന്ന ഒരു പൊതുപരിപാടിയില്‍ സംസാരിക്കുകയായിരുന്നു അദ്ദേഹം.

മന്ത്രിയുടെ വാക്കുകള്‍ ഇങ്ങനെ

'ഞാന്‍ എന്റെ കാറിലോ ഇരിക്കുന്ന മുറിയിലോ എസി ഉപയോഗിക്കാറില്ല. മെയ്, ജൂണ്‍ മാസങ്ങളിലെ 51 ഡിഗ്രി ചൂടില്‍ പോലും ഞാന്‍ ഇത് തുടരാറുണ്ട്. പലരും ഇതിന്റെ രഹസ്യം ചോദിക്കാറുണ്ട്. എന്റെ മനസ്സ് പഴയ ശൈലിയുള്ളതാണ്. അതിനാല്‍ നിങ്ങളുടെ കീശയില്‍ എപ്പോഴും ഒരു സവാള കരുതുക. ഇങ്ങനെ ചെയ്താല്‍ ചൂടുകാറ്റില്‍ നിന്ന് നിങ്ങള്‍ക്ക് രക്ഷ നേടാം.'

തന്റേത് ചമ്പല്‍ പ്രദേശത്തെ കരുത്തുള്ള ചര്‍മ്മമാണെന്നും ആധുനിക ഉപകരണങ്ങള്‍ക്കൊപ്പം ആയുര്‍വേദവും പരമ്പരാഗതമായ അറിവുകളും നമ്മള്‍ മറന്നു പോകരുതെന്നും വാര്‍ത്താവിനിമയ മന്ത്രി കൂടിയായ സിന്ധ്യ കൂട്ടിച്ചേര്‍ത്തു.

ഉള്ളി കീശയിലിട്ടാല്‍ ചൂട് കുറയുമോ?

ചൂടുകാലത്ത് ഉള്ളി കഴിക്കുന്നത് ശരീരത്തിന് തണുപ്പ് നല്‍കുമെന്ന് ആയുര്‍വേദത്തിലും നാട്ടുവൈദ്യത്തിലും പറയാറുണ്ട്. ഉള്ളിയിലുള്ള ക്വെര്‍സെറ്റിന്‍ (Quercetin) പോലുള്ള ഘടകങ്ങള്‍ ഇതിന് സഹായിക്കും. എന്നാല്‍ ഉള്ളി കീശയില്‍ വയ്ക്കുന്നത് കൊണ്ട് ചൂടിനെ പ്രതിരോധിക്കാന്‍ സാധിക്കുമെന്ന് ശാസ്ത്രീയമായി തെളിയിക്കപ്പെട്ടിട്ടില്ല. എന്നിരുന്നാലും ഉത്തരേന്ത്യന്‍ ഗ്രാമങ്ങളില്‍ പണ്ടുമുതലേ നിലനില്‍ക്കുന്ന ഒരു വിശ്വാസമാണിത്.

Union Minister Jyotiraditya Scindia suggests carrying an onion to tackle heatwaves, claiming he avoids AC even in 51-degree temperatures.