കോഴിക്കോട്: വെള്ളിമാട്കുന്ന് ജെഡിടി സ്‌കൂള്‍ കോംപ്ലക്‌സില്‍ ഇവിഎം മെഷീനുകള്‍ സൂക്ഷിച്ച സ്‌ട്രോങ് റൂമിന് സമീപത്തെ മെറ്റീരിയല്‍ റൂം തുറന്ന സംഭവത്തില്‍ ഹൈക്കോടതിയുടെ നിര്‍ണായക ഇടപെടല്‍. സംഭവത്തില്‍ യുഡിഎഫ് നല്‍കിയ പരാതിയില്‍ മൂന്ന് ദിവസത്തിനകം അന്തിമ തീരുമാനമെടുക്കാന്‍ കേരള ചീഫ് ഇലക്ട്രല്‍ ഓഫീസര്‍ക്ക് കോടതി നിര്‍ദേശം നല്‍കി. 

ഹൈക്കോടതിയുടെ അവധിക്കാല ബെഞ്ചിന്റേതാണ് വിധി. നടപടിക്രമങ്ങളില്‍ വീഴ്ചയുണ്ടായെന്ന പരാതി ഗൗരവമായി പരിഗണിക്കണമെന്നും കോടതി വ്യക്തമാക്കി. സംഭവത്തില്‍ ജില്ലാ കലക്ടര്‍ ഉള്‍പ്പെടെയുള്ളവര്‍ക്ക് വീഴ്ച്ച സംഭവിച്ചുവെന്ന പരാതി നിലനില്‍ക്കുന്ന സാഹചര്യത്തില്‍ ചീഫ് ഇലക്ട്രല്‍ ഓഫീസര്‍ ഇക്കാര്യം പരിശോധിച്ച് അടിയന്തര തീരുമാനമെടുക്കണം. തെരഞ്ഞെടുപ്പിന്റെ സുതാര്യത ഉറപ്പാക്കുന്നതിനായി പരാതിക്കാരെ കൂടി കേട്ട ശേഷമായിരിക്കും തുടര്‍ നടപടികള്‍ സ്വീകരിക്കുകയെന്നും കോടതി വ്യക്തമാക്കി. 

ALSO READ: സംസ്ഥാനത്ത് ലോഡ് ഷെഡ്ഡിങ്; ദിവസവും വൈകീട്ട് 6 നും 12 നും ഇടയില്‍ അരമണിക്കൂര്‍ വൈദ്യുതി മുടങ്ങും 

പേരാമ്പ്ര, കൊയിലാണ്ടി മണ്ഡലങ്ങളിലെ വോട്ടിങ് മെഷീനുകള്‍ സൂക്ഷിച്ചിട്ടുള്ള സ്‌ട്രോങ് റൂമിന് സമീപത്തെ മുറികള്‍ മുന്നറിയിപ്പില്ലാതെ തുറന്നെന്നാണ് പരാതി. സ്ഥാനാര്‍ഥികളെയോ, ഏജന്റുമാരെയോ അറിയിക്കാതെ മുറി തുറന്നത് ദുരൂഹമാണെന്ന് കോഴിക്കോട് ഡിസിസി പ്രസിഡന്റ് പ്രവീണ്‍ കുമാര്‍ ആരോപിച്ചു. കലക്ടറുടെ ഭാഗത്തുനിന്ന് വീഴ്ച്ച സംഭവിച്ചിട്ടുണ്ടെന്നും, നടപടികള്‍ സ്വീകരിക്കണമെന്നും ആവശ്യപ്പെട്ടാണ് യുഡിഎഫ് കോടതിയില്‍ ഹരജി നല്‍കിയത്.