വേനല്‍ച്ചൂടിന് പിന്നാലെ അപ്രതീക്ഷിതമായി പെയ്ത അതിശക്തമായ മഴ ബംഗളുരു നഗരത്തില്‍ വന്‍നാശനഷ്ടങ്ങളാണ് ഉണ്ടാക്കിയത്. ബംഗളുരുവിലെ ബൗറിങ് ആന്‍ഡ് ലേഡി കഴ്‌സണ്‍ ആശുപത്രിയുടെ മതില്‍ ഇടിഞ്ഞുവീണ് മലയാളികള്‍ അടക്കം ഏഴുപേരാണ് മരണപ്പെട്ടത്. അതിനിടെ സമൂഹമാധ്യമങ്ങളില്‍ മറ്റൊരു ചിത്രവും വൈറലായി. ചര്‍ച്ച് സ്ട്രീറ്റിലെ പ്രശസ്തമായ ദി ബുക്ക് വേം എന്ന പുസ്തകശാലയില്‍ വെള്ളം കയറി പുസ്തകങ്ങളെല്ലാം നശിച്ചുപോയ ഒരു ദൃശ്യമായിരുന്നു അത്. 

ഏതാണ്ട് 4000 മുതല്‍ 5000 പുസ്തകങ്ങളാണ് വെള്ളപ്പൊക്കത്തില്‍ നശിച്ചത്. ഇവിടെത്തെ സ്‌റ്റോക്കിന്റെ ഭൂരിഭാഗവും വെള്ളത്തില്‍ മുങ്ങി. പുസ്തകശാല തന്നെയാണ് ചിത്രങ്ങള്‍ ഇന്‍സ്റ്റഗ്രാമില്‍ ഷെയര്‍ ചെയ്തിരിക്കുന്നത്. ആലിപ്പഴം വീണുകിടക്കുന്ന ഒരു സ്ഥലത്തിന്റെ ചിത്രവും ഇവര്‍ ഷെയര്‍ ചെയ്തിട്ടുണ്ട്. അട്ടിവെച്ച പുസ്തകങ്ങളുടെ അടിയിലുള്ള പുസ്തകങ്ങളെല്ലാം നനഞ്ഞിട്ടുണ്ട്. ചില പുസ്തകങ്ങള്‍ വെള്ളത്തിലൂടെ ഒഴുകിനടക്കുന്നതും ദൃശ്യങ്ങളിലുണ്ട്. 

വേനലവധി കണക്കിലെടുത്ത് കഴിഞ്ഞ ദിവസങ്ങളില്‍ പുതിയ സ്റ്റോറ്റുകള്‍ വന്നിരുന്നുവെന്നും അവയെല്ലാം വെള്ളത്തിലായെന്നും ദി ബുക്ക് വേംസ് ബെംഗളൂരുവിന്റെ ഉടമ കൃഷ്ണ, ഡെക്കാന്‍ ഹെറാള്‍ഡിനോട് പറഞ്ഞു. നഷ്ടം കുറയ്ക്കാനായി പുസ്തകങ്ങള്‍ ഉണക്കിയെടുത്ത് വില കുറച്ച് കൊടുക്കാന്‍ പദ്ധതിയിടുന്നതായും അദ്ദേഹം പറഞ്ഞു. എന്നാല്‍ ചില പുസ്തകങ്ങളെല്ലാം വീണ്ടെടുക്കാന്‍ കഴിയാത്ത വിധം നശിച്ചുവെന്നും അവ ഉപേക്ഷിക്കേണ്ടി വരുമെന്നും അദ്ദേഹം പറഞ്ഞു. 

പല പ്രസാധകരും ഇപ്പോള്‍ പുനരുപയോഗിച്ച പേപ്പറാണ് ഉപയോഗിക്കുന്നത്, അത് ഗുണനിലവാരം കുറഞ്ഞതും വെള്ളത്തിലായാല്‍ വീണ്ടും ഉപയോഗിക്കാന്‍ കഴിയാത്തവയാണെന്നും അദ്ദേഹം പറഞ്ഞു.