ദുബൈ: ഐസിപിയുടെ പേരും ലോഗോയും ദുരുപയോഗം ചെയ്ത് നടക്കുന്ന തട്ടിപ്പുകൾക്കെതിരെ മുന്നറിയിപ്പുമായി യുഎഇ അധികൃതർ. വ്യാജ ഫോൺ കോളുകൾ, സന്ദേശങ്ങൾ, അനധികൃത വെബ്‌സൈറ്റുകൾ എന്നിവ വഴി ഉപഭോക്താക്കളുടെ വിവരങ്ങൾ ചോർത്താനും ഹാക്കിംഗിനുമാണ് തട്ടിപ്പുകാർ ശ്രമിക്കുന്നതെന്ന് അതോറിറ്റി പുറത്തിറക്കിയ അറിയിപ്പിൽ വ്യക്തമാക്കി.

ഉപഭോക്താക്കൾ ശ്രദ്ധിക്കേണ്ട കാര്യങ്ങൾ

ഒടിപി പങ്കിടരുത്: ഐസിപി ജീവനക്കാർ ഒരിക്കലും ഫോണിലൂടെ ഒടിപി അല്ലെങ്കിൽ യുഎഇ പാസ് വെരിഫിക്കേഷൻ കോഡുകൾ ആവശ്യപ്പെടില്ല. ഇവ ആരുമായും പങ്കിടരുത്.

ഔദ്യോഗിക ചാനലുകൾ മാത്രം ഉപയോഗിക്കുക: സേവനങ്ങൾക്കായി ഐസിപിയുടെ ഔദ്യോഗിക സ്മാർട്ട് ആപ്പ് അല്ലെങ്കിൽ വെബ്‌സൈറ്റ് (www.icp.gov.ae) മാത്രം സന്ദർശിക്കുക.

സംശയാസ്പദമായ ലിങ്കുകൾ: അജ്ഞാത സന്ദേശങ്ങളിൽ വരുന്ന ലിങ്കുകളിൽ ക്ലിക്ക് ചെയ്യുകയോ സ്വകാര്യ-സാമ്പത്തിക വിവരങ്ങൾ കൈമാറുകയോ ചെയ്യരുത്.

ALSO READ: യുഎഇയിൽ സ്കൂളുകൾക്ക് വലിയ പെരുന്നാൾ അവധി പ്രഖ്യാപിച്ചു; വിദ്യാർഥികളെ കാത്തിരിക്കുന്നത് 9 ദിവസം നീണ്ട ഇടവേള

എമിറേറ്റ്സ് ഐഡി, ഗോൾഡൻ വിസ, ബ്ലൂ റെസിഡൻസി തുടങ്ങിയ സുപ്രധാന സേവനങ്ങൾ നൽകുന്ന ഐസിപിയുടെ പേരിൽ വ്യാജ വാഗ്ദാനങ്ങൾ നൽകി ആളുകളെ വഞ്ചിക്കുന്നവർക്കെതിരെ നിയമനടപടികൾ സ്വീകരിക്കുമെന്ന് അതോറിറ്റി വ്യക്തമാക്കിയിട്ടുണ്ട്. ഇത്തരം തട്ടിപ്പ് ശ്രമങ്ങളെക്കുറിച്ച് ജാഗ്രത പാലിക്കണമെന്നും സുരക്ഷിതമായ ഔദ്യോഗിക മാർഗ്ഗങ്ങൾ മാത്രം ആശയവിനിമയത്തിനായി തിരഞ്ഞെടുക്കണമെന്നും അധികൃതർ ആവർത്തിച്ചു.

uae authorities have warned residents about a new scam involving the misuse of icp name and logo. residents are advised to stay alert and avoid sharing personal details with suspicious sources.