ഇരിങ്ങാലക്കുട: ആന ചവിട്ടിക്കൊന്ന സംഭവം വീണ്ടും. കൂടല്‍മാണിക്യം ക്ഷേത്രോത്സവത്തിനെത്തിച്ച ആന രണ്ടാം പാപ്പാനെ ചവിട്ടിക്കൊന്നു. പാലക്കാട് സ്വദേശി ശ്രീക്കുട്ടന്‍ (25) ആണ് മരിച്ചത്. വെള്ളിയാഴ്ച ഉച്ചയോടെ ദേവസ്വം പറമ്പായ കൊട്ടിലായ്ക്കലിലായിരുന്നു സംഭവം. വാഴ്വാടി കാശിനാഥന്‍ എന്ന ആനയാണ് അക്രമാസക്തനായത്.

കഴിഞ്ഞദിവസം രാത്രി വിളക്ക് എഴുന്നള്ളിപ്പിനിടെയും ഈ ആന ഇടഞ്ഞിരുന്നുവെന്നാണ് വിവരം. ആ സമയത്ത് രണ്ട് പേര്‍ക്ക് വീണു പരിക്കേറ്റിരുന്നു. എന്നാല്‍ പാപ്പാന്‍മാര്‍ ഉടന്‍ ആനയെ നിയന്ത്രിച്ച് കൊട്ടിലായ്ക്കലില്‍ തളയ്ക്കുകയായിരുന്നു. അതിനാല്‍ വലി അപകടം ഒഴിവായി. എന്നാല്‍ ഇന്ന് ഉച്ചയോടെ വീണ്ടും വിരണ്ട ആന താല്‍ക്കാലിക ഷെഡ് തകര്‍ത്തു. പിന്നാലെ പാപ്പാന്‍മാരെ ആക്രമിക്കുകയുമായിരുന്നു.

നെഞ്ചിന് ചവിട്ടേറ്റ ശ്രീക്കുട്ടനെ ഉടന്‍ ഇരിങ്ങാലക്കുട ജനറല്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പരുക്കേറ്റ ഒന്നാം പാപ്പാന്‍ അമല്‍ (28) ചികിത്സയിലാണ്. 

ALSO READ: അങ്കമാലിയില്‍ വിരണ്ടോടിയ ആനയുടെ ചവിട്ടേറ്റ് ഒരു മരണം, രണ്ടാം പാപ്പാനും ചവിട്ടേറ്റു, ഗുരുതരാവസ്ഥയില്‍

ഇന്ന് രാവിലേയും സമാന സംഭവം റിപ്പോര്‍ട്ട് ചെയ്തിരുന്നു. അങ്കമാലിയില്‍ വിരണ്ടോടിയ ആനയുടെ ചവിട്ടേറ്റ് ഒരാള്‍ മരിച്ചിരുന്നു. അങ്കമാലി കിടങ്ങൂര്‍ മഹാവിഷ്ണുക്ഷേത്രത്തിലായിരുന്നു സംഭവം. പ്രദേശത്തുണ്ടായിരുന്ന ലോറി ഡ്രൈവര്‍ വിഷ്ണു എന്നയാളാണ് മരിച്ചത്. മയ്യനാട് അരുണിമ പാര്‍ത്ഥസാരഥിയെന്ന ആനയാണ് ഇടഞ്ഞത്.

രണ്ടാം പാപ്പാന് ചവിട്ടേറ്റു. ഇയാള്‍ക്ക് ഗുരുതരമായി പരിക്കേറ്റിട്ടുണ്ട്. ഇയാളെ പൊലിസ് ഉടന്‍ തന്നെ ആശുപത്രിയിലേക്ക് മാറ്റി. കൊല്ലം സ്വദേശി പ്രദീപിന് ആണ് പരുക്കേറ്റത്.

ആന ഇടഞ്ഞപ്പോള്‍ അതിനെ തളക്കാന്‍ ശ്രമിക്കുന്നതിനിടെയാണ് ആക്രമണമുണ്ടായത്. ഓട്ടോയും പിക്കപ് വാനും ജനറേറ്ററും ആന തകര്‍ത്തു.

a 25 year old mahout was killed and another injured after an elephant turned violent during a temple festival in iringalakuda, with a similar fatal incident reported earlier in angamaly.