ദോഹ: മിഡില്‍ ഈസ്റ്റിലെ യുദ്ധസൂചനകളെത്തുടര്‍ന്ന് നിര്‍ത്തിവെച്ചിരുന്ന സമുദ്ര ഗതാഗത നിയന്ത്രണങ്ങള്‍ ഖത്തര്‍ പൂര്‍ണ്ണമായും പിന്‍വലിച്ചു. ഇന്നലെ അര്‍ധരാത്രി മുതല്‍ എല്ലാത്തരം കപ്പലുകള്‍ക്കും ഖത്തര്‍ സമുദ്രപരിധിയിലൂടെ 24 മണിക്കൂറും തടസ്സമില്ലാതെ സഞ്ചരിക്കാമെന്ന് ഗതാഗത മന്ത്രാലയം അറിയിച്ചു. ഇതോടെ മേഖലയിലെ ചരക്കുനീക്കവും മറ്റ് നാവിക പ്രവര്‍ത്തനങ്ങളും പൂര്‍ണ്ണതോതില്‍ പുനരാരംഭിക്കും.
ഫെബ്രുവരി 28ന് ഇറാനെ ഇസ്രായേലും യു.എസും ആക്രമിച്ചതിനെത്തുടര്‍ന്ന് സുരക്ഷാ മുന്‍കരുതലിന്റെ ഭാഗമായാണ് ഖത്തര്‍ കപ്പല്‍ ഗതാഗതത്തിന് നിയന്ത്രണങ്ങള്‍ ഏര്‍പ്പെടുത്തിയത്. തുടര്‍ന്ന് ഹോര്‍മുസ് കടലിടുക്ക് ഉള്‍പ്പെടെയുള്ള ഭാഗങ്ങളില്‍ ഇറാന്‍ തിരിച്ചടി നല്‍കിയതോടെ മേഖലയിലെ നാവിക ഗതാഗതം അനിശ്ചിതത്വത്തിലായിരുന്നു. ഏപ്രില്‍ എട്ടിന് പ്രഖ്യാപിച്ച വെടിനിര്‍ത്തലിനു ശേഷം ഘട്ടംഘട്ടമായാണ് നിയന്ത്രണങ്ങളില്‍ ഇളവ് വരുത്തിയത്.

മാര്‍ച്ച് 30 മുതല്‍ ഭാഗികമായി തുറന്ന പാതകളില്‍ ഏപ്രില്‍ 12 മുതല്‍ പകല്‍ സമയങ്ങളില്‍ മാത്രമാണ് ഗതാഗതം അനുവദിച്ചിരുന്നത്. നിലവില്‍ മേഖലയിലെ സാഹചര്യം മെച്ചപ്പെട്ട സാഹചര്യത്തിലാണ് നിയന്ത്രണങ്ങള്‍ പൂര്‍ണ്ണമായും നീക്കാന്‍ തീരുമാനിച്ചത്. പാകിസ്ഥാന്റെ മധ്യസ്ഥതയില്‍ ഇസ്ലാമാബാദില്‍ നടന്ന ചര്‍ച്ചകളില്‍ അന്തിമ തീരുമാനമായില്ലെങ്കിലും, യുഎസ് പ്രസിഡന്റ് ഡൊണാള്‍ഡ് ട്രംപ് വെടിനിര്‍ത്തല്‍ കാലാവധി ഏകപക്ഷീയമായി നീട്ടിയത് മേഖലയില്‍ സമാധാനം നിലനില്‍ക്കാന്‍ സഹായകമായി. സമുദ്ര ഗതാഗതം പൂര്‍ണ്ണസ്ഥിതിയിലായത് ഖത്തറിലേക്കുള്ള ചരക്ക് ഇറക്കുമതിക്കും വ്യാപാര മേഖലയ്ക്കും വലിയ ആശ്വാസമാകും.

Summary: Qatar has resumed full maritime navigation activities following disruptions caused by the recent conflict, authorities said, signaling a return to normal operations in its territorial waters.In a statement, the ministry said maritime activities will resume fully around the clock for all types of vessels starting from Saturday, May 2.