അബുദബി: അബുദബിയിലെ റോഡുകളുടേയും പൊതുസ്ഥലങ്ങളുടേയും വൃത്തിയും ഭംഗിയും സംരക്ഷിക്കുന്നതിനായി കർശന നടപടികളുമായി അബുദബി പൊലിസ്. ഓടുന്ന വാഹനങ്ങളിൽ നിന്ന് റോഡിലേക്ക് മാലിന്യം വലിച്ചെറിയുന്നവർക്കെതിരെ കടുത്ത മുന്നറിയിപ്പാണ് അധികൃതർ നൽകിയിരിക്കുന്നത്. നിയമലംഘകർക്ക് 1,000 ദിർഹം പിഴയും ഡ്രൈവിംഗ് റെക്കോർഡിൽ 6 ബ്ലാക്ക് പോയിന്റുകളും ശിക്ഷയായി ചുമത്തുമെന്ന് പൊലിസ് അറിയിച്ചു.

വാഹനമോടിക്കുന്നവർക്കിടയിൽ ബോധവൽക്കരണം ശക്തമാക്കുന്നതിന്റെ ഭാഗമായി, ക്യാമറകളിൽ പതിഞ്ഞ നിയമലംഘനങ്ങളുടെ തത്സമയ ദൃശ്യങ്ങളും അബുദബി പൊലിസ് പുറത്തുവിട്ടിട്ടുണ്ട്.

ക്യാമറക്കണ്ണുകളിൽ കുടുങ്ങി നിയമലംഘകർ

അബുദബി മോണിറ്ററിംഗ് ആൻഡ് കൺട്രോൾ സെന്ററുമായി സഹകരിച്ചാണ് പൊലിസ് നിരീക്ഷണ വീഡിയോ പുറത്തുവിട്ടത്. ഇമാറാത്തിലെ അത്യാധുനിക നിരീക്ഷണ ക്യാമറ സംവിധാനങ്ങൾ ഉപയോഗിച്ച് ഇത്തരം നിയമലംഘകരെ കൃത്യമായി തിരിച്ചറിയാൻ സാധിക്കുമെന്ന് അധികൃതർ വ്യക്തമാക്കി. റോഡ് ശൃംഖലകളിലുടനീളം നിരീക്ഷണം ശക്തമാക്കാനും ഗതാഗത നിയമങ്ങൾ കർശനമായി നടപ്പാക്കാനും ഈ സാങ്കേതികവിദ്യ സഹായിക്കുന്നുണ്ട്.

റോഡുകളിലേക്ക് മാലിന്യം തള്ളുന്നത് നഗരത്തിന്റെ ഭംഗി കെടുത്തുക മാത്രമല്ല, ഗുരുതരമായ പരിസ്ഥിതി മലിനീകരണത്തിനും പൊതുജനാരോഗ്യ പ്രശ്നങ്ങൾക്കും കാരണമാകുമെന്ന് പൊലിസ് ചൂണ്ടിക്കാട്ടി. സുരക്ഷിതവും സംഘടിതവും പരിസ്ഥിതി സൗഹൃദപരവുമായ നഗരമെന്ന അബുദബിയുടെ ആഗോള പ്രശസ്തി നിലനിർത്താൻ ഓരോ റോഡ് ഉപയോക്താക്കൾക്കും ഉത്തരവാദിത്തമുണ്ടെന്ന് അധികൃതർ ഓർമ്മിപ്പിച്ചു.

യുഎഇ ട്രാഫിക് നിയമത്തിലെ ആർട്ടിക്കിൾ 71 പ്രകാരം വാഹനങ്ങളിൽ നിന്ന് മാലിന്യം വലിച്ചെറിയുന്നത് കടുത്ത ശിക്ഷാർഹമായ കുറ്റമാണ്.

കേവലം പിഴ ഈടാക്കുന്നതിനപ്പുറം, യാത്രക്കാരുടെ പെരുമാറ്റത്തിൽ മാറ്റം വരുത്താൻ ഡ്രൈവർമാർ മുൻകൈ എടുക്കണമെന്ന് പൊലിസ് ആവശ്യപ്പെട്ടു. വാഹനത്തിനുള്ളിലെ മാലിന്യങ്ങൾ ശേഖരിച്ച് നിശ്ചിത മാലിന്യ നിക്ഷേപ കേന്ദ്രങ്ങളിൽ മാത്രം തള്ളാൻ ശ്രദ്ധിക്കണം. ചെറിയ ജാഗ്രതയിലൂടെ വലിയ രീതിയിലുള്ള പരിസ്ഥിതി സംരക്ഷണവും നഗര ശുചിത്വവും ഉറപ്പാക്കാൻ പൊതുജനങ്ങൾക്ക് സാധിക്കുമെന്നും അധികൃതർ കൂട്ടിച്ചേർത്തു.

ALSO READ: മരുഭൂമിയിലെ മഞ്ഞുലോകം മുതൽ ബുർജ് ഖലീഫ വരെ: ദുബൈയുടെ ചരിത്രം തിരുത്തിയ 11 വൻകിട പദ്ധതികൾ

Abu Dhabi Police has warned motorists against throwing waste from vehicles, stressing the importance of keeping roads clean. Offenders face a fine of AED 1,000 and six black points as authorities intensify efforts to protect public spaces.