ഹൈദരാബാദ്: തെലങ്കാനയിലെ മീര്‍പേട്ടില്‍ റോഡിലുണ്ടായ വാക്കുതര്‍ക്കത്തിനിടെ ബോണറ്റില്‍ തൂങ്ങിക്കിടന്ന മധ്യവയസ്‌കനുമായി 2 കിലോമീറ്ററോളം കാറോടിച്ച ഡ്രൈവര്‍ക്കായി തിരച്ചില്‍. എസ്.കെ ജിലാനി എന്നയാളാണ് കാറിന്റെ ബോണറ്റില്‍ തൂങ്ങിക്കിടന്നത്. ഇയാളുടെ സ്‌കൂട്ടര്‍ കാറില്‍ തട്ടിയതുമായി ബന്ധപ്പെട്ടാണ് തര്‍ക്കമുണ്ടായത്. 

മകനോടൊപ്പം സ്‌കൂട്ടറില്‍ യാത്ര ചെയ്യുകയായിരുന്നു ജീലാനി. ഇതിനിടെ കാര്‍ സ്‌കൂട്ടറില്‍ തട്ടി. ഇതു ചോദ്യം ചെയ്തപ്പോള്‍ കാര്‍ ഡ്രൈവര്‍ ജീലാനിയുടെ മകന്റെ മുടിയില്‍ പിടിച്ച് വലിക്കുകയും, കാര്‍ മുന്നോട്ട് എടുക്കുകയും ചെയ്യുകയായിരുന്നു. ജീലാനിയുടെ മകന്‍ സ്‌കൂട്ടറില്‍ നിന്ന് റോഡിലേക്ക് വീഴുകയും ചെയ്തു. മകനെ രക്ഷിക്കാനായി പിതാവ് കാറിന് മുന്നിലേക്ക് ചാടി. കാര്‍ മുന്നോട്ട് എടുത്തതോടെ ബോണറ്റില്‍ തൂങ്ങിക്കിടന്ന ജീലാനിയുമായി 2 കിലോമീറ്ററോളമാണ് വാഹനം സഞ്ചരിച്ചത്. 

സംഭവത്തിന്റെ ദൃശ്യങ്ങള്‍ പിറകെയുണ്ടായിരുന്ന മറ്റൊരു യാത്രക്കാരന്‍ പകര്‍ത്തിയിരുന്നു. ബാലാപ്പൂരിന് സമീപമെത്തിയപ്പോഴാണ് കാര്‍ നിര്‍ത്തിയത്. ജീലാനി ബോണറ്റില്‍ നിന്ന് ഇറങ്ങിയ സമയംകൊണ്ട് ഡ്രൈവര്‍ കാറുമായി രക്ഷപ്പെട്ടു. സംഭവത്തില്‍ മീര്‍പേട്ട് പൊലിസ് കേസെടുത്ത് അന്വേഷണം ആരംഭിച്ചു. 

search is underway for a driver who drove about 2 kilometers with a middle-aged man clinging to the bonnet during a road altercation in Meerpet, Telangana.