ദിസ്പൂര്‍: അസമില്‍ ഭരണമുറപ്പിച്ച് എന്‍.ഡി.എ. 99 സീറ്റുകളില്‍ മുന്നേറുകയാണ്. അസമില്‍ കേവല ഭൂരിപക്ഷം നേടുന്നതിന് 64 സീറ്റുകളാണ് വേണ്ടത്. 23 സീറ്റുകളുമായി കോണ്‍ഗ്രസ് പിന്നിലാണ്. ബോഡോലാന്‍ഡ് പീപിള്‍സ് ഫ്രണ്ട് 10 ഇടത്തും അസം ഗണ പരിഷത്ത് ഒമ്പതിടത്തും ലീഡ് ചെയ്യുന്നു. 

കോണ്‍ഗ്രസിന് കനത്ത തിരിച്ചടിയാണ് അസമില്‍. പാര്‍ട്ടി അധ്യക്ഷനും എം.പിയുമായ ഗൗരവ് ഗൊഗോയ് ജോര്‍ഹട്ട് മണ്ഡലത്തില്‍ നിന്ന് പരാജയപ്പെട്ടു. ബി.ജെ.പി എം.എല്‍.എ ഹിതേന്ദ്ര നാഥ് ഗോസ്വാമിയോട് 23,182 വോട്ടിനാണ് പരാജയപ്പെട്ടത്. മാര്‍ച്ചില്‍ കോണ്‍ഗ്രസ് വിട്ട പ്രദ്യുത് ബൊര്‍ദോലോയ് ദിസ്പൂരിലും ബി.ജെ.പി ടിക്കറ്റില്‍ ലീഡ് ചെയ്യുകയാണ്. 

ഇത്തവണത്തെ തെരഞ്ഞെടുപ്പില്‍ സംസ്ഥാനത്തെ 126 മണ്ഡലങ്ങളില്‍ 85 മുതല്‍ 95 വരെ സീറ്റുകള്‍ എന്‍.ഡി.എ സഖ്യം നേടുമെന്ന് എക്‌സിറ്റ് പോള്‍ ഫലങ്ങള്‍ പുറത്ത് വന്നിരുന്നു. 85.38 ശതമാനമായിരുന്നു അസമിലെ പോളിങ്. 2021ലെ നിയമ സഭാ തെരഞ്ഞെടുപ്പില്‍ ബി.ജെ.പി സഖ്യത്തിന് 75 സീറ്റുകളാണ് ലഭിച്ചത്. അതേസമയം കോണ്‍ഗ്രസ് സഖ്യത്തിന് 50 സീറ്റുകള്‍ മാത്രമാണ് അന്ന് നേടാനായത്. ഒരു സീറ്റ് സ്വതന്ത്രനും നേടി.

nda leads in 99 seats in assam crossing majority mark while congress trails behind. key defeats and strong bjp performance shape election results.