ന്യൂഡൽഹി: പശ്ചിമ ബംഗാൾ കൂടി ബി.ജെ.പി പിടിച്ചെടുത്തതോടെ രാജ്യത്ത് ബി.ജെ.പി സഖ്യം ഭരിക്കുന്ന സംസ്ഥാന, കേന്ദ്രഭരണ പ്രദേശങ്ങൾ 22 ആയി ഉയർന്നു. തെരഞ്ഞെടുപ്പ് ഫലത്തിന് മുമ്പ് ഇത് 21 ആയിരുന്നു. നാല് സംസ്ഥാനങ്ങളിലും ഒരു കേന്ദ്രഭരണ പ്രദേശത്തേക്കുമായി നടന്ന വോട്ടെടുപ്പിൽ അസമിലും പുതുച്ചേരിയിലും ബി.ജെ.പി ഭരണം നിലനിർത്തി.

ഇതോടെ പ്രതിപക്ഷ സഖ്യം ആറു സംസ്ഥാനങ്ങളിലായി ചുരുങ്ങി. നിലവിൽ ജമ്മു കശ്മിർ, ഹിമാചൽ പ്രദേശ്, ജാർഖണ്ഡ്, തെലങ്കാന, കർണാടക, കേരളം എന്നിവയാണ് പ്രതിപക്ഷ സഖ്യം ഭരിക്കുന്ന സംസ്ഥാനങ്ങൾ. 2014ൽ എൻ.ഡി.എ 16 സംസ്ഥാനങ്ങളിലും ഇൻഡ്യാ ബ്ലോക്കിലെ നിലവിലെ ഘടകകക്ഷികൾ 10 സംസ്ഥാനങ്ങളിലും മറ്റ് പ്രാദേശിക പാർട്ടികൾ അഞ്ചു സംസ്ഥാനങ്ങളിലുമാണ് അധികാരത്തിലുണ്ടായിരുന്നത്. 2019 ആയപ്പോഴേക്കും എൻ.ഡി.എ 18 സംസ്ഥാനങ്ങളിലും ഇൻഡ്യാ സഖ്യം ആറ് എണ്ണത്തിലുമായി മാറി.

എങ്കിലും പ്രാദേശിക പാർട്ടികൾക്ക് ആറു സംസ്ഥാനങ്ങളിൽ അധികാരം നിലനിർത്താനായി. 2024 അവസാനത്തോടെ എൻ.ഡി.എ 18 സംസ്ഥാനങ്ങളിലും ഇൻഡ്യാ സഖ്യം ആറിലം പ്രാദേശിക പാർട്ടികൾ അഞ്ചിലും ആയി തുടർന്നു. ഇപ്പോൾ, ബി.ജെ.പി ഇതര ഇൻഡ്യ ബ്ലോക്ക് ഇതര പാർട്ടികൾ ഭരിക്കുന്നത് മൂന്ന് സംസ്ഥാനങ്ങൾ മാത്രമാണ്. അതേസമയം, പശ്ചിമ ബംഗാളിൽ കൂടി ബി.ജെ.പി അധികാരത്തിലേറിയതോടെ പാർട്ടി നേരിട്ടോ സഖ്യംചേർന്നോ ഭരിക്കാത്ത സംസ്ഥാനങ്ങളുടെ എണ്ണം നാലായി ചുരുങ്ങി. കേരളം, തമിഴ്‌നാട്, തെലങ്കാന, മിസോറം എന്നിവയാണിവ.

തമിഴ്‌നാട്ടിൽ ബി.ജെ.പി വിവിധ തെരഞ്ഞെടുപ്പുകളിൽ ദ്രാവിഡ പാർട്ടികളുമായി സഖ്യമുണ്ടാക്കിയിട്ടുണ്ടെങ്കിലും ഇതുവരെ സംസ്ഥാന ഭരണത്തിന്റെ ഭാഗമായിട്ടില്ല. 2014ൽ തെലങ്കാന സംസ്ഥാനം രൂപീകരിച്ചത് മുതൽ ബി.ജെ.പിക്ക് അവിടെ ഭരണം ലഭിച്ചിട്ടില്ല. അതേസമയം, അവിഭക്ത ആന്ധ്രപ്രദേശിൽ മുമ്പ് ബി.ജെ.പി ഭരണസഖ്യത്തിന്റെ ഭാഗമായിരുന്നു. വടക്കുകിഴക്കൻ സംസ്ഥാനങ്ങളിൽ മിക്കയിടത്തും ബി.ജെ.പി ഭരണത്തിലുണ്ടെങ്കിലും മിസോറമിൽ ഇതുവരെ ഭരണസഖ്യത്തിന്റെ ഭാഗമായിട്ടില്ല. സോറം പീപ്പിൾസ് മൂവ്‌മെന്റ് ആണ് നിലവിൽ മിസോറം ഭരിക്കുന്നത്.

Following recent political shifts, West Bengal has also come under the control of the NDA alliance. However, states like Kerala, Tamil Nadu, Telangana, and Mizoram continue to keep the BJP and its allies out of power. With this latest development, the total number of states and union territories governed by the NDA has risen to 22 across India.