കൊല്‍ക്കത്ത: അധികാരം പിടിച്ചെടുത്ത ആദ്യ ദിനം തന്നെ 'പണി' തുടങ്ങി ബി.ജെ.പി. ഉത്തര്‍പ്രദേശിലെ ബുള്‍ഡോസര്‍ രാജിന് ബംഗാളിലും തുടക്കമിട്ടിരിക്കുകയാണ് ബി.ജെ.പി. അധികാരം പിടിച്ചെടുത്തതിന് പിന്നാലെ സംസ്ഥാനത്തിന്റെ വിവിധ ഭാഗങ്ങളില്‍ വ്യാപക അക്രമവും അഴിച്ചു വിട്ടിരുന്നു ബി.ജെ.പി പ്രവര്‍ത്തകര്‍. 

കൊല്‍ക്കത്തയിലെ പ്രശസ്തമായ ന്യൂ മാര്‍ക്കറ്റ് പരിസരത്തെ ഇറച്ചിക്കടകള്‍ ബുള്‍ഡോസര്‍ ഉപയോഗിച്ച് തകര്‍ത്തു. തൃണമൂല്‍ കോണ്‍ഗ്രസ് യൂണിയന്‍ ഓഫിസുകളും വ്യാപകമായി നശിപ്പിക്കപ്പെട്ടതായി റിപ്പോര്‍ട്ടുകള്‍ പറയുന്നു. പേര് മാറ്റലുകളും സജീവമാണ്. പള്ളികളുടേത് ഉള്‍പെടെ പേര് മാറ്റി. മുസ്‌ലിമുമായി ബന്ധപ്പെട്ട പേരുകളാണ് മാറ്റിയിട്ടുള്ളത്. നോര്‍ത്ത് 24 പര്‍ഗാനാസിലെ ബരാസത്തില്‍ 'മസ്ജിദ് ബാരി റോഡ്'  'നേതാജി പള്ളി' എന്നാക്കി മാറ്റിയിരിക്കുകയാണ്. സിറാജ്-ഉദ്-ദൗളയുടെ സ്മാരക രൂപം തകര്‍ത്ത് പാര്‍ക്കിന് 'ശിവാജി ഉദ്യാനം' എന്നാണ് പുനര്‍നാമകരണം ചെയ്തിരിക്കുന്നത്. സി.ആര്‍.പി.എഫ് ജവാന്മാരുടെ സാന്നിധ്യത്തിലായിരുന്നു ഈ നടപടികള്‍ എന്നതാണ് ശ്രദ്ധേയം.

ബോംഗാവിലെ ഒരു ക്ഷേത്രത്തിന് സമീപമുള്ള ബിരിയാണി കട ഉടമകളോട്  ഒഴിഞ്ഞുപോകണമെന്ന് ബി.ജെ.പി പ്രവര്‍ത്തകര്‍ ആവശ്യപ്പെട്ടു. ഭക്ഷണ സ്വാതന്ത്ര്യത്തിന്മേലുള്ള കടന്നുകയറ്റമാണിതെന്ന് തൃണമൂല്‍ കോണ്‍ഗ്രസ് ചൂണ്ടിക്കാട്ടി. ബംഗാളിന്റെ സംസ്‌കാരത്തിന് നേരെ നടക്കുന്ന ആക്രമണമാണിതെന്നും ടി.എം.സി കൂട്ടിച്ചേര്‍ത്തു.

മുര്‍ഷിദാബാദിലെ ലാല്‍ബാഗില്‍ തര്‍ക്കഭൂമിയിലുണ്ടായിരുന്ന ഈദ്ഗാഹിന്റെ വേലി ബി.ജെ.പി പ്രവര്‍ത്തകര്‍ തകര്‍ത്തിരിക്കുകയാണ്. കോടതിയുടെ പരിഗണനയിലിരിക്കുന്ന ഭൂമിയില്‍ പൊലിസ് സാന്നിധ്യത്തിലാണ് അക്രമം നടന്നതെന്ന് സി.പി.എം മുര്‍ഷിദാബാദ് ജില്ലാ സെക്രട്ടറി സമീര്‍ മൊല്ല ചൂണ്ടിക്കാട്ടി. പള്ളി കമ്മിറ്റി പരാതി നല്‍കിയിട്ടുണ്ട്.

ALSO READ: ബംഗാളിൽ ഭരണഘടനാ പ്രതിസന്ധി; മമത വഴങ്ങുന്നില്ല, പുറത്താക്കാൻ ഗവർണർ 'ആർട്ടിക്കിൾ 164' പ്രയോഗിച്ചേക്കും; തെരുവിൽ ബുൾഡോസർ രാജ്!

ബി.ജെ.പി ഭരിക്കുന്ന സംസ്ഥാനങ്ങളില്‍ 'ക്രിമിനല്‍ നീതി' നടപ്പാക്കുന്നതിനുള്ള ഒരു ഉപകരണമാണ് ബുള്‍ഡോസര്‍. കേസോ തര്‍ക്കമോ കോടതിയില്‍ എത്തുന്നതിന് മുമ്പ് തന്നെ കുറ്റാരോപിതന്റെ വീടോ കടയോ അധികാരികള്‍ ബുള്‍ഡോസറുകള്‍ ഉപയോഗിച്ച് പൊളിച്ചുമാറ്റുന്നു.  ഈ സംവിധാനത്തിന്റെ പ്രധാന വക്താക്കളില്‍ ഒരാളാണ് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. വിവാദ സംവിധാനം ആദിത്യനാഥിന് ബുള്‍ഡോസര്‍ ബാബ എന്ന വിളിപ്പേര് തന്നെ നേടിക്കൊടുത്തിട്ടുണ്ട്. 

2024 മെയ് 17 ന് ഉത്തര്‍പ്രദേശിലെ ബരാബങ്കിയില്‍ നടന്ന ഒരു തെരഞ്ഞെടുപ്പ് റാലിയില്‍, പ്രധാനമന്ത്രി മോദി 'ബുള്‍ഡോസര്‍ നീതി'യെക്കുറിച്ച് പരാമര്‍ശിച്ചിരുന്നു. ബുള്‍ഡോസര്‍ എങ്ങനെ ഉപയോഗിക്കണമെന്ന് പ്രതിപക്ഷം യോഗി ആദിത്യനാഥില്‍ നിന്ന് പഠിക്കണമെന്നും അന്ന് മോദി തന്റെ പ്രസംഗത്തില്‍ പറഞ്ഞിരുന്നു. 

ഏതായാലും രാഷ്ട്രീയ കേന്ദ്രങ്ങളില്‍ വലിയ ചര്‍ച്ചയായിരിക്കുകയാണ് വിജയാഘോഷത്തിന്റെ ഭാഗമായി നടന്ന ബുള്‍ഡോസര്‍ നടപടി. ബംഗാളിലും യോഗി മോഡല്‍ ഭരണമാണോ വരാനിരിക്കുന്നത് എന്നതാണ് ആശങ്ക. മുഖ്യമന്ത്രി സ്ഥാനത്തേക്ക് പരിഗണിക്കപ്പെടുന്ന സുവേന്ദു അധികാരി ബംഗാളിലെ 'യോഗി' ആകുമോ എന്ന് കാത്തിരുന്ന് കാണാമെന്ന് രാഷ്ട്രീയ നിരീക്ഷകര്‍ പറയുന്നു. 
 

bjp faces criticism in west bengal after alleged bulldozer actions, shop demolitions, renaming of places, and political violence following election victory.